ރައީސް މުލީ އެއަރޕޯޓުގެ މަސައްކަތްދާ ގޮތް ބައްލަވާލައްވައިފި

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މުލަކަތޮޅު މުލީ އެއަރޕޯޓުގެ މަސައްކަތް ބައްލަވާލައްވައިފިއެވެ.

ރައީސް މުލީ އެއަރޕޯޓުގެ މަސައްކަތް ބައްލަވާލައްވާފައިވަނީ އެމަނިކުފާނު މުލަކަތޮޅުގެ 5 ރަށަކަށް ކުރެއްވި ދަތުރުފުޅުގެ ތެރެއިން ހޯމަ ދުވަހުގެ ހެނދުނު، އެއަރޕޯޓުގެ މަސައްކަތްކުރާ ސަރަހައްދަށް ވަޑައިގެންނެވެ. އެމަނިކުފާނު ވަނީ އެއަރޕޯޓުގެ މަސައްކަތްތައްދާގޮތާއި، މިހާތަނަށް ކޮށްފައިވާ މަސައްކަތްތައް ބައްލަވާލައްވާ ކަންކަން އޮޅުން ފިލުއްވާފައެވެ.

Advertisement

އެމަނިކުފާނުގެ އަރިހުގައި މިނިސްޓަރ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ އަދި ސަރުކާރުގެ އިސް ބޭފުޅުން ބައިވެރިވެވަޑައިގެންނެވިއެވެ. މުލީ އެއަރޕޯޓުގެ މަސައްކަތް ކުރަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިންނެވެ. މިއީ މި ސަރުކާރުން ކުރިއަށްގެންދާ މަޝްރޫއެކެވެ.

މުލަކަތޮޅުގެ މުލީ އެއަރޕޯޓް ހުޅުވޭވަރަށް ތަރައްޤީކޮށް ނިންމާ، ކުރިއަށް އޮތް އަހަރުގެ މެދުތެރޭގައި އެ ތަނުގެ ޚިދުމަތް ދެވޭ ވަރު ވާނެ ކަމަށް އެމްޓީސީސީން ވަނީ ބުނެފައެވެ. އެމްޓީސީސީގެ ސީއީއޯ އާދަމް އާޒިމް ވިދާޅުވީ، އެ އާޕޯޓަކީ މުޅި މުލަކަތޮޅު ރައްޔިތުން އިންތިޒާރުކުރަމުންދާ މަސައްކަތެއް ކަމަށެވެ. އެ އެއާޕޯޓް ނިމުމަކީ އެ ސަރަހައްދުގެ އިގްތިސާދަށް ބޮޑު ކުރިއެރުމެއް ލިބިގެންދާނެ ކަމެއް ކަަމަށް އާޒިމް ވަނީ ވިދާޅުވެފައެވެ.

އެމްޓީސީސީއާއި ހަވާލު ކުރެވުނު މި މަޝްރޫއުގެ ދަށުން އެއަރޕޯޓް މަސައްކަތައް މިހާރު ހިއްކާފައިވާ ބިމުގެ އިތުރަށް ބޭނުންވާ ބިން ހިއްކުމާއި ރިވެޓްމަންޓް ޖެހުމުގެ މަސައްކަތް ކުރުމާއި، 1200 މީޓަރުގެ ރަންވޭއެއް ހެދުމާއި، ޓަރމިނަލް ބިލްޑިންގ ހެދުމުގެ އިތުރުން އެއަރޕޯޓަށް ބޭނުންވާ އިތުރު ވަސީލަތްތައް ޤާއިމްކުރުން ހިމެނެއެވެ.

221,733,478.22 (ދުއިސައްތަ އެކާވިސް މިލިއަން ހަތް ލައްކަ ތިރީސް ތިންހާސް ހަތަރު ސަތޭކަ ހަތްދިހަ އަށެއް) ރުފިޔާގެ މި މަޝްރޫއުގެ ދަށުން 14 ހެކްޓަރުގެ ބިން ހިއްކުމާއި 1812 މީޓަރުގެ ސަރަހައްދެއްގެ ގޮނޑުދޮށް ހިމާޔަތް ކުރުމާއި 1200 މީޓަރު ދިގު 30 މީޓަރު ފުޅާ ރަންވޭއެއް ގާއިމުކުރުމާއި ޓެކްސީވޭއަކާއި އޭޕްރަންއެއް އެޅުމުގެ މަސައްކަތް ކުރާނެ ކަމަށް އެމްޓީސީސީން ބުންޏެވެ.