ސަރުކާރުން ވަކި ރަށެއް، ވަކި ވިސްނުމެއް ބާކީއެއް ނުކުރާނެ
މ.ވޭވަށު ބަނދަރު ހުޅުވުމުގެ ރަސްމިއްޔާތުގައި ރައީސް ވާހަކަފުޅު ދައްކަވަނީ
ފާއިތުވި ސަރުކާރުތަކުގައި މެދު ރާއްޖެތެރޭގެ ރަށްތަކަކީ ވަރަށް ބޮޑަށް އަޅާނުލެވިފައި އޮތް ސަރަހައްދެއް ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
މ.ވޭވަށުގެ ބަނދަރު ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ޞާލިޙް ވިދާޅުވީ ކުރީ ސަރުކާރުތަކުން ގިނަ މަޝްރޫޢުތައް ހިންގަނީ އުތުރާއި ދެކުނުގެ ރަށްތަކުން ފެށިގެން ކަމަށެވެ. އަދި އެ މަޝްރޫޢުތައް ވަކި ހިސާބަކުން ހުއްޓޭ އިރު އެންމެ ބޮޑަށް އަޅާ ނުލެވި އޮންނަނީ މެދު ރާއްޖެ ތެރެއަށް ކަމަށް އެމަނިކުފާނު ފާހަގަކުރެއްވިއެވެ. އެހެންނަމަވެސް މި ސަރުކާރުން ވަކި އަތޮޅެއް ވަކި ރަށެއް ބާކީ ނުކުރާނެ ކަމަށް ރައީސް ވިދާޅުވިއެވެ.
މި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ މި ދައުރު ނިމޭއިރު، ލަފާފުރުމުގެ ދަތިކަން ހައްލުނުވާ އެއްވެސް ރަށެއް ނޯންނާނެ ކަމަށެވެ. އެމަނިކުފާނު ވިދާޅުވީ ލަފާފުރުމުގެ ދަތިކަމަކީ ވޭވަށުގެ އިތުރުން ރާއްޖޭގެ އެހެން ހިސާބުތަކަށް ވެސް ދިމާވެފައިވާ އެންމެ ބޮޑު އެއް މައްސަލަ ކަމަށެވެ. ޚާއްސަކޮށް ވޭވަށް ފަދަ އާބާދީ ކުޑަ ރަށްރަށުގައި ލަފާފުރުމުގެ ދަތިކަން ހައްލު ނުކުރެވި ގިނަ ދުވަސްތަކެއްވާކަން އެމަނިކުފާނު ވަނީ ފާހަގަކުރައްވާފައެވެ. އެހެންނަމަވެސް ސަރުކާރުގެ އަމާޒަކީ އެފަދަ އަސާސީ ޚިދުމަތްތައް ފޯރުކޮށްދޭ އިރު ރަށުގެ އާބާދީ އާއި ކުޑަބޮޑުމިނަށް ބެލުމަށް ފަހު ތަފާތުކުރުމަކާއި ނުލާ، ޚިދުމަތްތައް ފޯރުކޮށްދިނުން ކަމަށް ރައީސް ޞާލިޙް ވިދާޅުވިއެވެ.
މީގެ އިތުރުން ރައީސް ވަނީ ބަނދަރެއް ނެތުމުން ވޭވަށަށް ދިމާވެފައިވާ ދަތިކަމަށް ވެސް އަލިއަޅުއްވާލައްވާފައެވެ. އެގޮތުން އެ ރަށަކީ މަސް ގަނެ ހިއްކައިގެން ބޭރަށް މަސް އެކްސްޕޯޓްކުރާ ރަށެއްކަމަށް ވާއިރު، ދޯނިފަހަރަށް ރަށަށް ވަދެނުކުމެވާނެ ފަސޭހަ ގޮތެއް ނެތުމަކީ އެ ރަށަށް ދިމާވެފައިވާ ބޮޑު ގޮންޖެހުމެއް ކަމަށް ރައީސް ވިދާޅުވިއެވެ. އެ ރަށުގައި ދުވާލަކަށް 25 ޓަނުގެ މަސް ކައްކާއިރު މިއީ ކުޑަ އާބާދީއަކާއި އަޅާ ބަލާ ނަމަ ބޮޑު އަދަދެއްކަން އެމަނިކުފާނު ފާހަގަކުރެއްވިއެވެ. އެފަދަ މުހިންމު މަސައްކަތައް ރަނގަޅަށް ކުރިއަށް ގެންދިއުމަށް ބޭނުންވަނީ ޒަމާނީ ބަނދަރެއްކަމަށާއި، މިހާރު ސަރުކާރުން ތަރައްޤީކުރި މިބަނދަރު އެއްވެސް ދަތިކަމެއް ނެތި ގިނަ އަހަރުތަކެއް ވަންދެން ބޭނުންކުރެވޭނެ ކަމަށް އުއްމީދު ކުރައްވާކަމަށް ރައީސް ސާލިހު ވިދާޅުވިއެވެ.
