އެމީ އެވޯޑަށް ނަން ހުށަހެޅިފައިވާ އެމެރިކާގެ ޖަރނަލިސްޓެއް އިންޑިޔާއަށް އެތެރެވިޔަ ނުދީ ފޮނުވާލައިފި

އެމެރިކާގައި ދެވޭ މަޝްހޫރު އެމީ އެވޯޑަށް ނަން ހުށަހެޅިފައިވާ އިންޑިޔާއަށް އުފަން، އެމެރިކާގެ ޖަރނަލިސްޓް އަންގަދު ސިންގ އިންޑިޔާއަށް އެތެރެވިޔަ ނުދީ އަނބުރާ ފޮނުވާލައިފިއެވެ. އޭނާގެ އާއިލާއިން މައުލޫމާތު ދިން ގޮތުގައި އަމިއްލަ ދަތުރެއްގައި އަންގަދު ސިންގ ބުދަ ދުވަހުގެ ރޭ ނިއުޔޯކްއިން ފުރައިގެން ގޮސް ދިއްލީގައި ބޯޓު ޖެއްސުމާ އެކު އާއިލާއަށް މެސެޖު ކުރިއެވެ. ނަމަވެސް އޭގެ ފަނަރަވަރަކަށް މިނެޓު ފަހުން އޭނާގެ ޕާސްޕޯޓް އިމިގްރޭޝަން އޮފިޝަލުން ހިފަހައްޓައިފި ކަމަށް ބުނެ އޭނަ މެސެޖު ކުރިއެވެ. އެއަށް ފަހު އޭނާ އަނބުރާ ފޮނުވާލީކަމަށް އޭނާގެ މަންމަ ބުނެފައިވެއެވެ. އޭނާ ފޮނުވާލެވުނު ސަބަބެއް އަންގާފައިނުވާކަމަށް ވެސް ވެއެވެ.

އަންގަދު ސިންގަކީ ވައިސް ނިއުސް ޗެނެލްއަށް ޑޮކިއުމަންޓްރީތައް ހަދާދެމުން އަންނަ ޖަރނަލިސްޓްއެކެވެ. އޭނާ ވަނީ އިންޑިޔާގެ ކޮވިޑް ހާލަތާއި އަދި ދަނޑުވެރިންގެ މުޒާހަރާ ކަވަރުކޮށް ވަރަށް މަޝްހޫރުވި ޑޮކިއުމަންޓްރީތަކެއް ހަދާފައެވެ.

އޭނާގެ އާއިލާއިން ބުނި ގޮތުގައި އަންގަދު ސިންގުގެ ޑޮކިއުމަންޓްރީތަކުން އޭނަ މަސައްކަތް ކުރަނީ އެކި ގައުމުތަކުގެ އާންމު ރައްޔިތުންގެ ޝުއޫރުތައް ހާމަކޮށްދިނުމަށެވެ. މިގޮތުން އޭނާ ވަނީ ސްރީލަންކާ، ހޮންގކޮންގ، މިޔަންމާ، އިންޑިޔާ އަދި ޕާކިސްތާނުގެ އާންމުންގެ އިހްތިޖާޖްތަކާއި ޝުއޫރުތައް ގެނެސްދޭ ޑޮކިއުމެޓްރީތައް ހަދާފައެވެ.

އިންޑިޔާއާއި ބެހޭގޮތުން އޭނަ ހެދި ޑޮކިއުމަންޓްރީތަކުގެ ތެރޭގައި އަލަށް އެކުލަވާލެވުނު އެގްރިކަލްޗަރަލް ގާނޫނާއި ގުޅިގެން ދަނޑުވެރިން ކުރި އިހުތިޖާޖުތަކާއި ބެހޭ ޕްރޮގްރާމަކާއި، އިންޑިޔާގެ ސިޓިޒަންޝިޕް ގާނޫނަށް ގެނައި އިސްލާހުތަކަށް ފަހު އާންމުން ކުރި އިހްތިޖާޖްތަކާ ގުޅިގެން ހެދި ޕްރޮގްރާމެއް ހިމެނެއެވެ. މީގެ އިތުރުން ކޮވިޑް19ގެ ދެވަނަ ރާޅާއި ގުޅިގެން އިންޑިޔާގެ ގިނަ ރައްޔިތުން ތަހައްމަލު ކުރަމުން ދިޔަ ވޭނާއި ކެކުޅުން ދައްކުވާދޭ ޑޮކިއުމަންޓްރީ ހިމެނެއެވެ. އޭނާ އެމީ އެވޯޑަށް ނޮމިނޭޓް ވީވެސް މި ޑޮކިއުމަންޓްރީއިންނެވެ.

އަންގަދު ސިންގ ފޮނުވާލިކަން އެނގުމުން ލިޔެފައިވާ ފޭސްބުކް ޕޯސްޓެއްގައި އޭނާގެ މަންމަ ބުނީ ކުޅަދާނަ ޖަރނަލިސްޓެއްގެ ހައިސިއްޔަތުން އޭނަ ކުރާ މަސައްކަތް ދެކެ އިންޑިޔާ ސަރުކާރުން ބިރުގަންނަނީ ކަމުގައެވެ. އަދި ސިކް ދީނުގެ މީހުންނަށް ތަފާތު ކުރެވޭ ކަމަށާއި، އަމިއްލަ ގައުމު ދެކެ ލޯބިން ވެސް ސިކް ޖަރނަލިސްޓަކަށް ތެދު ހާމަކޮށްދިނުމުގެ މަސައްކަތަކީ ވަރަށް ވެސް ދަތި އުނދަގޫ މަސައްކަތެއް ކަމަށް އޭނާ ބުނެފައިވެއެވެ.