ބ.ކެންދޫގެ ބޭރުތޮށި ލުމުގެ މަސައްކަތުގެ 60 އިންސައްތަ ނިމިއްޖެ
މަޝްރޫޢުގެ ދަށުން ބޭރު ތޮށި ލުމާއި، ފަތާ ސަރަހައްދު ކޮނުމާއި، ގްރޮއިން ޖެހުން އަދި ރިވެޓްމެންޓް ޖެހުމަށް ވަނީ ހަމަޖެހިފައި
ކެންދޫގެ ބޭރުތޮށި ލުމުގެ މަސައްކަތުގެ 60 އިންސައްތަ ނިމިއްޖެ
ބ. ކެންދޫގެ ބޭރުތޮށި ލުމުގެ މަސައްކަތުގެ 60 އިންސައްތަ ވަނީ ނިމިފައި ކަމަށް މޯލްޑިވްސް ޓްރާސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީ އިން ހާމަކޮށްފިއެވެ.
އެ ކުންފުނިން ބުނީ ހުކުރު ދުވަހުގެ ނިޔަލަށް ކެންދޫގައި ބޭރުތޮށިލުމުގެ ބޮޑުބައި ނިމިފައިވާ ކަމަށެވެ. މީގެ އިތުރުން އެ ރަށުގެ ގޮނޑުދޮށް ހިމާޔަތް ކުރުމުގެ މަޝްރޫޢުގެ މަސައްކަތަށް ބޭނުންވާ ބޮޑުހިލައިގެ ހަތަރުވަނަ ޝިޕްމަންޓް ވަނީ ޕްރޮޖެކްޓް ސައިޓަށް ގެންދެވިފައި ކަަމަށް ވެސް އެމްޓީސީސީ އިން ވަނީ ފާހަގަކޮށްފައެވެ.
ބ.ކެންދޫގައި އެމްޓީސީސީ އިން ކުރިއަށްގެންދާ މަޝްރޫޢުގެ ދަށުން، އެ ރަށުގައި ފަތާ ސަރަޙައްދެއް ކޮނުމާއި، 803 މީޓަރު ބޭރުތޮށި ލުމާއި، 80 މީޓަރުގެ ރިވެޓްމެންޓް ޖެހުމާއި، 90 މީޓަރުގެ ގްރޮއިން ޖެހުމުގެ މަސައްކަތް ކުރުމަށް ވަނީ ހަމަޖެހިފައެވެ. މި ޕްރޮޖެކްޓުގެ އަގު 39.9 މިލިޔަން ރުފިޔާ އަށް އަރައެވެ.
