ބާސެލޯނާއާއި ބަޔާން މިއުނިކާއި އިންޓަރމިލާން އެއް ގްރޫޕަކަށް
25 އޯގަސްޓު 2022 | ބުރާސްފަތި 17:23ލެވާންޑޯސްކީއާއި ހާލާންޑަށް ކުރީގެ ކްލަބާ ދެކޮޅަށް ކުޅެން ޖެހިއްޖެ
ޗެމްޕިއަންސްލީގުގައި ޝައުގުވެރި ގްރޫޕްތަކެއް އެބައޮތް
ޔުއެފާ ޗެމްޕިއަންސް ލީގުގައި ސްޕެއިންގެ ބާސެލޯނާއާއި, ޖަރުމަނުގެ ޗެމްޕިއަން ބަޔާން މިއުނިކާއި, އިޓަލީގެ އިންޓަރ މިލާން އެއް ގްރޫޕަކަށް ލައްވާލައިފިއެވެ. އެންމެ ވަރުގަދަ ގްރޫޕްގެ ގޮތުގައި އޮތް ގްރޫޕް ސީގައި މިތިން ޓީމާއެކު ހިމެނެނީ ވިކްޓޯރިއާ ޕުލެޒަންއެވެ. ބަޔާންއާއި ބާސާ އެއް ގްރޫޕަކަށް ލައްވާލުމުން ލެވާންޑޯސްކީއަށް ގްރޫޕް ސްޓޭޖްގައި ކުޅެންޖެހޭނީ ކުރީގެ ކްލަބް ބަޔާންއާ ދެކޮޅަށެވެ.
މުބާރާތުގައި ދެން އެންމެ ޝައުގުވެރި ގްރޫޕެއްގެ ގޮތުގައި އޮތީ ހާލާންޑަށް އޭނާގެ ކުރީގެ ކްލަބާ ދެކޮޅަށް ނުކުންނަންޖެހޭ ގްރޫޕެވެ. މެންޗެސްޓަރ ސިޓީއާއި ޑޯޓްމަންޑް އޮތީ އެއް ގްރޫޕެއްގައެވެ. މިދެޓީމާއެކު ގްރޫޕް ޖީގައި އޮތީ ސެވިއްޔާއާއި, ޑެންމާކްގެ ކޯޕެންހޭގަންއެވެ. ޕީއެސްޖީ ހިމެނޭ ގްރޫޕް އެޗްގައި އިޓަލީގެ ޔުވެންޓަސް އެބައޮތެވެ, އެގްރޫޕްގައި ދެން ހިމެނެނީ ބެންފީކާއާއި, މަކާބީ ހައިފާ އެފްސީއެވެ.
ޗެމްޕިއަން ރެއާލް މެޑްރިޑަށް އޮތީ ނިސްބަތުން ފަސޭހަ ގްރޫޕެކެވެ. ރެއާލްއާއެކު ގްރޫޕް އެފްގައި ހިމެނެނީ ޖަރުމަނުގެ ލައިޕްޒިގްއާއި ޔުކްރެއިންގެ ޝަޚުތަރު ޑޮނެސްކާއި ސެލްޓިކެވެ. ރެއާލްގެ ކުރިން ޗެމްޕިއަންކަން ހޯދި ޗެލްސީ އޮތީ އޭސީ މިލާން ހިމެނޭ ގްރޫޕް އީގައެވެ. އެގްރޫޕްގައި ދެން ހިމެނެނީ ސަލްޒްބާގާއި ޑައިނަމޯ ޒަގްރެބްއެވެ. ލިވަޕޫލް އޮތީ ގްރޫޕް އޭގައެވެ. އެގްރޫޕްގައި ދެން ހިމެނެނީ އަޔެކްސްއާއި ނަޕޯލީއާއި ރޭންޖާރސްއެވެ.
ގްރޫޕް ބީގައި އޮތީ ޕޯޓޯއާއި އެތްލެޓިކޯ މެޑްރިޑާއި ބަޔާ ލެވަކޫސަންއާއި ކްލަބް ބުރޫޖްއެވެ. ގްރޫޕް ޑީގައި ހިމެނެނީ އެންމެ ފަހުގެ ޔޫރޮޕާ ލީގުގެ ޗެމްޕިއަން ފްރާންކްފާޓްއާއި ޓޮޓެންހަމްއާއި ސްޕޯޓީންގސީޕީއާއި ފްރާންސްގެ މާސޭއެވެ.
