މިނީ ބަސް ދުއްވިޔަސް ޓެކްސީ ޑްރައިވަރުންނަށް ގެއްލުމެއްނެތް!

މާލެތެރޭގައި މިނީ ބަހުގެ ޚިދުމަތްދޭން މަސައްކަތް ފެށުމާއި އެކު ގިނަ ބަޔަކަށް އެޚަބަރުވީ ހިތްހަމަޖެހޭ ޚަބަރަކަށެވެ. ކުޑަ އަގެއްގައި މާލެތެރޭގެ ދަތުރުތައް ކުރެވޭނެތީއެވެ. ސްކޫލް ގަޑިތަކުގައި ދަރިން ގޮވައިގެން ފަސޭހަކަމާއެކު ދަތުރުކުރެވޭނެތީއެވެ. އަދިވެސް މިފަދަ އެތަކެއް ސަބަބުތަކާހުރެއެވެ.

ނަމަވެސް މާލެ ސަރަޙައްދުގައި ޓެކްސީގެ ޚިދުމަތްދޭ ފަރާތްތަކަށް މިޚަބަރުވީ އަޑުއަހާލަން އެހާ ފަސޭހަ ޚަބަރަކަށް ނޫނެވެ. މިނީ ބަހުގެ ޓެސްޓު ދަތުރުތައް މާލެތެރޭގައި ފެށުމަކީވެސް ޓެކްސީ ޑްރައިވަރުންގެ ހިތްތަކަށް ނުތަނަވަސްކަން ގެނުވި ކަމެކެވެ. އެފަރާތްތަކަށް ލިބޭ ދަތުރު މަދުވެދާނެތީއެވެ. އާމްދަނީ ކުޑަވެދާނެތީއެވެ.

ކޮންމެއަކަސް މިނީ ބަހުގެ ޚިދުމަތަކީ ޓެކްސީ ޑްރައިވަރުންނަށް އެއްވެސް ގޮތަކަށް ކަމުދާ ޚިދުމަތަކަށް ނުވިއެވެ. އެހެންކަމުން މިހާރު ވަނީ އެފަރާތްތަކުގެ ޝަކުވާތައް ގިނަވެފައެވެ. މި ޚިދުމަތާއެކު މަޖީދީމަގު އިތުރަށް ބާރުބޮޑުވާނެކަމަށް ބުނާ ޓެކްސީ ޑްރައިވަރުން ގިނައެވެ. އަދި މާލެ ތެރެއިން އެފަރާތްތަކަށް ލިބޭ ދަތުރުގެ އަދަދު ބޮޑުތަނުން ދަށްވާނެކަމަށްބުނެ ޝަކުވާ ނުކުރާ ޑްރައިވަރެއް މަދެވެ. ނުވިތާކަށް ޕެޓްރޯލްގެ އަގު އިންތިހާއަށް އުފުލިފައިވާ މި ދަނޑިވަޅުގައި މިނީ ބަސް ތައާރަފްކުރުމުން ޑްރައިވަރުން އިނދަޖެހޭނެކަން ސަރުކާރަށް ހަމަ ނުވިސްނެނީތޯވެސް މި ފަރާތްތަކުން އަންނަނީ ސުވާލު އުފައްދަމުންނެވެ.

މިއީ މުޅިއަކުން ދޮގު ވާހަކަތަކެއްވެސް ނޫނެވެ. އެކަމަކު، މާލެތެރޭގެ ދަތުރުތައް ނަގަނީ ކިތައް ޓެކްސީ ޑްރައިވަރުންތޯ، މިއީވެސް ކޮށްލަން ރަނގަޅު ސުވާލެކެވެ. މާލެތެރޭގެ ދަތުރުތައް ނުނަގާ، ހަމައެކަނި ހުޅުމާލެއަށް ނުވަތަ އެއަރޕޯޓަށް ޑްރައިވަރުން ދަތުރުނަގާ ވާހަކަވެސް އަބަދުވެސް ފޯރިގަަދަކޮށް ދެކެވެއެވެ. ޓެކްސީ ޑްރައިވަރުންގެ ޝަކުވާތަކަށް އާންމުން ރައްދުދެމުން އަންނަނީ މިފަދަ ހަގީގަތްތައް ހާމަކުރަމުންނެވެ. މާލެތެރޭގައި ދަތުރުކުރާނެ ޓެކްސީއެއް ނުލިބޭ ވާހަކައިންނެވެ. ބްރިޖު މަތީގައި ދަތުރު ކުރުމަށް ޓެކްސީ ޑްރައިވަރުން ފޫގަޅާފައި ހުންނަ ވާހަކައިންނެވެ.

މިނީ ބަހާއެކު ދަތުރުތަކަށް އަންނާނެ ބަދަލުތަކަށް ވިސްނާލުންވެސް މުހިންމެވެ. ގިނަ ދިވެހީން ބޭނުންވާނީ ސީދާ އެމީހާ ދާންބޭނުންވާ ތަނެއްގެ ދޮރުމައްޗަށް އުޅަނދު މަޑުކޮށްލާށެވެ. ނަމަވެސް މިނީ ބަހުގައި ދަތުރުކުރެވެނީ ވަކި ގަޑިތަކެއްގައި، ވަކި މަގުތަކެއްގައި އެކަންޏެވެ. އެހެންކަމަށް ވާނަމަ ޓެކްސީ ޑްރައިވަރުންނަށް މާލެތެރޭގެ ދަތުރުތައް ލިބޭނެއެވެ. ބަހުގެ ޚިދުމަތާއެކު ޓެކްސީ ޑްރައިވަރުންނަށް ލިބޭ ދަތުރު މަދުވާނަމަ، މާލެ އާއި ހުޅުމާލެއާއި ދެމެދު މިހާރުވެސް ބަސް ދަތުރުކުރާއިރު، ޓެކްސީތަކަށް ދަތުރު ނުލިބޭނެތާއެވެ.

ޓެކްސީ ޑްރައިވަރުންގެ އާމްދަނީއަށް ބަލާއިރު، ހައެއްކަ ގަޑިއިރު ރަނގަޅަށް މަސައްކަތް ކޮށްފިނަމަ، ޕެޓްރޯލު ޚަރަދަށް ކަނޑާފައި ހާހެއްހާ ރުފިޔާ ގެއަށް ގެންދަން ލިބޭކަމަށް ގިނަ ޑްރައިވަރުން ބުނެއެވެ. ދުވާލަކު ހައެއްކަ ގަޑިއިރު މަސައްކަތް ކޮށްގެން 1،000 ރުފިޔާ މަދުތޯވެސް ސުވާލު އުފައްދަންވީ ވަގުތު މިއީއެވެ. މަހެއްގެ މައްޗަށް ގާތްގަނޑަކަށް 30،000 ރުފިޔާ މަދުތޯ ސުވާލު އުފައްދާނެ ރައްޔިތުންވެސް މި ދަނޑިވަޅުގައި މަދެއް ނޫނެވެ.

މި ސަބަބުތަކަށްޓަކާ ގިނަ ބަޔަކު އަންނަނީ މިނީ ބަހަށް ހަނާ އަޅަމުންނެވެ. އަދި ޓެކްސީ ޑްރައިވަރުންގެ ޝަކުވާތަކަށް ހަތަރެސްފައިން "ހޯހޯ" ގޮވަމުންނެވެ.