މިނިވަން ދުވަހާއި ދިމާކޮށް ދޭ ހަމަލާއަކަށް ވަރުގަދަޔަށް ރައްދު ދޭނަން: ޒެލެންސްކީ
24 އޯގަސްޓު 2022 | ބުދަ 03:45މިނިވަން ދުވަހުގެ ރަސްމީ އިހުތިފާލްތައް ވަނީ ކެންސަލްކޮށްފައި
ޔޫކްރެއިންގެ ރައީސް ވޮލޮޑޮމިރް ޒެލެންސްކީ
ޔޫކްރެއިންގައި ބުދަ ދުވަހު ފާހަގަކުރާ އެޤައުމުގެ މިނިވަން ދުވަހާއި ދިމާކޮށް ރަޝިޔާއިން ދެމުންދާ ހަމަލާތައް އިތުރުކޮށްފި ނަމަ ވަރުގަދަ ރައްދެއް ދެއްވާނެ ކަމަށް ޔޫކްރެއިންގެ ރައީސް ވޮލޮޑޮމިރް ޒެލެންސްކީ ވިދާޅުވެއެޖެ އެވެ. މިއަދަކީ ސޯވިއެޓް ވެރިކަމުން ޔޫކްރެއިން މިނިވަންވިތާ 31 އަހަރު ފުރޭ މިނިވަން ދުވަހެވެ. އަދި ހަމަ މިއަދަކީ ޔޫކްރެއިން ހަނގުރާމަ ފެށުނުތާ ހަމަސް ފުރޭ ދުވަސް ވެސް މެއެވެ.
މިހަފްތާގެ ކުރީކޮޅު ޒެލެންސްކީ ވަނީ ބުދަދުވަހުގެ ޚާއްސަ މުނާސަބަތާ ދިމާކޮށް ރަޝިޔާއިން "ހުތުރު ކަމެއް" ކޮށްފާނެ ކަމަށް ބެލެވޭ ކަމަށް ވިދާޅުވެފައެވެ. އެމެރިކާގެ ސްޓޭޓް ޑިޕާޓްމަންޓުންވެސް ވަނީ ޔޫކްރެއިންގެ އާންމުން ދިރިއުޅޭ އިމާރާތްތަކަކަށް އައު ހަމަލާތަކެއް ދޭން ރަޝިޔާއިން ރާވަމުންދާކަމަށް ބުނެ ސަމާލުވުމަށް އަންގާފައެވެ.
މިނިވަން ދުވަސް ފާހަގަ ކުރުމަށް އެއްވެސް ޚާއްސަ ހަރަކާތެއް ބޭއްވުން ކިއީވްއިން ވަނީ މަނާ ވެސް ކޮށްފައެވެ.
އިތުރު ހަމަލާތައް އައިސްފާނެ ކަމަށް ލިބޭ ޚަބަރުތަކާ ގުޅިގެން ޔޫކްރެއިންގެ ބައެއް ސިޓީތަކުގައި ވަނީ ސަލާމަތީ ކަންކަން ވަރުގަދަ ކުރެވިފައެވެ. ނަމަވެސް މިނިވަން ދުވަސް ފާހަގަ ކުރުމަށް އާންމުކޮށް ސަރުކާރުން ބާއްވާ ރަސްމިއްޔާތުތައް ވަނީ ކެންސަލް ކޮށްފައެވެ.
ރަޝިޔާއިން ހިސޯރުކޮށްފައިވާ ކްރައިމިއާގައި މިހަފްތާގެ ކުރީކޮޅު ބާރުގަދަ ގޮވުންތަކެއް ގޮވުމާއި، އަދި ރަޝިޔާގެ ރައީސް ޕުޓިންގެ އަރިސް ބޭފުޅެއްގެ ދަރިކަނބަލުން ކާރުބޮމެއް ގޮއްވާލައިގެން އަވަހާރަ ކޮށްލެވުނު ހާދިސާ އާއި ގުޅިގެން އަނެއްކާވެސް ވަނީ ރަޝިޔާއާއި ޔޫކްރެއިންއާ ދެމެދު ހަނގުރާމައިގެ ނުތަނަވަސްކަން އިތުރުވެގެން ގޮސްފައެވެ.
ކާރު ބޮމެއް ގޮއްވާލައިގެން އަވަހާރަކޮށްލެވުނު ރަޝިޔާގެ ޖަރނަލިސްޓް ދަރްޔާ ދުގީނާގެ ހަންދާން އައު ކުރުމުގެ އިޙްތިފާލެއް ރަޝިޔާއިން ވަނީ ބާއްވާފައެވެ. ރަޝިޔާއިން ބުނެފައިވަނީ އޭނަ އަވަހާރަކޮށްލީ ޔޫކްރެއިނުން ކަމަށެވެ. ނަމަވެސް ޔޫކްރެއިނުން ވަނީ އެކަން ދޮގު ކޮށްފައެވެ. ރަޝިޔާގެ ޚާރިޖީ ވަޒީރު ސަރުގެއި ލަވްރޯވް ވެސް ވަނީ ދުގީނާގެ ގާތިލުންނަށް އެއްވެސް ގޮތަކަށް ހަމްދަރުދީވުމެއް ނޯންނާނެ ކަމަށް ވިދާޅުވެފައެވެ.
ޔޫކްރެއިންގެ މިނިވަން ދުވަހާއި ދިމާކޮށް އެމެރިކާއިން ވަނީ 6 ބިލިއަން ޑޮލަރުގެ އެހީގެ ޕެކެޖެއް އިއުލާނުކޮށްފައެވެ. އެއީ އެމެރިކާއިން މިހާތަނަށް ޔޫކްރެއިނަށް ދިން އެންމެ ބޮޑު އެހީގެ ޕެކޭޖެވެ.
