ކަސެމީރޯ އެދުނީ ރޮނާލްޑޯ ޔުނައިޓެޑުގައި މަޑުކުރުމަށް

ކްރިސްޓިއާނޯ ރޮނާލްޑޯ މެންޗެސްޓަރ ޔުނައިޓެޑުގައި މަޑުކުރުމަށް އެދޭ ކަމަށް ރެއާލް މެޑްރިޑް ދޫކޮށް ޔުނައިޓެޑަށް ބަދަލުވި މިޑްފީލްޑަރު ކަސެމީރޯ ބުނެފިއެވެ.

ކަސެމީރޯ އާއި ރޮނާލްޑޯ ވަނީ މީގެ ކުރިން އެކުގައި ރެއާލަށް ކުޅެފައެވެ. އޭގެ ފަހުން ރޮނާލްޑޯ ވަނީ ރެއާލް ދޫކޮށް ޔުވެންޓަސް އަށް ބަދަލުވެފައެވެ. އޭރު މި ދެ ކުޅުންތެރިން ވެސް ފާހަގަ ވެފައިވަނީ ރެއާލަށް މުހިންމު ދެ ކުޅުންތެރިންގެ ގޮތުގައެވެ.

ރެއާލަށް އަލްވަދާއު ކިޔަމުން ކަސެމީރޯ ބުނީ އޭނާ އުންމީދު ކުރަނީ ރޮނާލްޑޯ ޔުނައިޓެޑުގައި މަޑުކުރާނެކަމަށެވެ. އަލުން އަނެއްކާ ވެސް ރޮނާލްޑޯއާއެކު ކުޅެން ބޭނުންވާކަން ފާހަގަކުރަމުން ކަސެމީރޯ ބުނީ ރޮނާލްޑޯއަކީ ތަފާތު މޮޅު ކުޅުންތެރިޔެއް ކަމަށެވެ. އަދި އަލުން ރޮނާލްޑޯއާ އެއް ޓީމަކަށް ކުޅެން ކެތްމަދުވެފައިވާ ކަމަށް ވެސް އޭނާ ބުންޏެވެ.

ޔުނައިޓެޑުން ކަސެމީރޯ ހޯދީ އެ ޓީމުގެ މިޑްފީލްޑުގައި ދިމާވެފައިވާ މައްސަލަ ހައްލުކުރުމަށެވެ. ލީގުގައި ލިވަޕޫލާ ދެކޮޅަށް ކުޅުނު މެޗުގެ ކުރިން ޔުނައިޓެޑުން ވަނީ އެ ޓީމުގެ ކުޅުންތެރިޔެއްގެ ގޮތުގައި ކަސެމީރޯ ދައްކާލާފައެވެ. ކަސެމީރޯގެ އިތުރުން ޔުނައިޓެޑުން އަންނަނީ އަޔެކްސްއަށް ކުޅެމުން އަންނަ އެންޓޮނީ ހޯދުމުގެ މަސައްކަތް ވެސް ކުރަމުންނެވެ. އެންޓޮނީ ޔުނައިޓެޑަށް ބަދަލުވުމަކީ ގާތް ކަމެއް ކަމަށް މީޑިއާ ރިޕޯޓުތައް ބުނެއެވެ.