މަނިކުފާނެވެ! އަރިހުގައި ހައްތަހާވެސް ނައިބު ރައީސްކަން ބޭނުންވާ "ބާޒު"ތަކެވެ!
ނައިބު ރައީސްކަމަށް ބޭފުޅަކު އައްޔަންކުރުމާމެދު އަދި ގޮތެއް ނުނިންމަވާ
ކުރީގެ ރައީސް ޔާމީން
ހަނދާނަށް އަންނަނީ 2019 ވަނަ އަހަރު ނޮވެމްބަރު މަހުގެ 29 ވަނަ ދުވަހު، ޕީޕިއެމްގެ އޮފީސް ކުރިމަތީގައި މަނިކުފާނު ދެއްކެވި ވާހަކަތަކެވެ. ކޮރަޕްޝަނާއި ވައްކަމުގެ ތުހުމަތުތައް އަތުކުރީގައި ހިފައި، ޖަލު ގޮޅިއަށް އިސާހިތަކު ތިމަން މަނިކުފާނު ވަޑައިގަންނަވަންޖެހިދާނެކަން އަންދާޒާކުރެއްވުނު ހިސާބުން، މަނިކުފާނަށް ތާއީދުކުރާ އާއްމުންނާއި، މަނިކުފާނުގެ އިތުބާރުހިފޭ އައުވާނުންނަށް މަނިކުފާނު ކުރެއްވި ވަސިއްޔަތެވެ. ރައްޔިތުންނާ މުޚާތަބުކުރައްވަން ދެން އިތުރު ފުރުސަތެއް ލިބިވަޑައިގަންނަވާނެ ދުވަހެއް އެނގިވަޑައިނުގެންނެވި ހާލު، މަނިކުފާނަށް އެންމެ މުހިންމުވީ އެދުވަހުވެސް މަނިކުފާނު އެ ޕާޓީއެއްގެ ރައީސްކަމުގެ ސަލާމަތާމެދު އާދޭސް ދެންނެވުމެވެ. މަނިކުފާނުގެ ކަންބޮޑުވެވަޑައިގަތުމަކަށްވީ މަނިކުފާނުގެ ޣައިރު ހާޒިރުގައި، މަނިކުފާނު އެހާމެ އުނދަނގުލުން ހޯއްދެވި ޕާޓީ، ބަޔަކު ގެންގޮސްފާނެކަމުގެ ބިރުވެރި އުދާހެވެ. އެ ދުވަހު ޕާޓީގެ މައްޗަށް މިނިކާ ބާޒުތަކެއް ސަވާރުވިޔަނުދެއްވުމަށް ޕާޓީގެ އާންމު މެންބަރުންނަށް މަނިކުފާނު އިލްތިމާސްކުރެއްވީމެވެ.
އެއީވެސް ދުވަހެކެވެ. މަނިކުފާނު ޖަލަށް ވަޑައިގެންނެވުމުން ވެރިކަމަށް ފައިނެންގެވި ބޭފުޅުން މަދު ނޫންކަން ޚުދު މަނިކުފާނަށް އެނގިވަޑައިގަންނަވާނެއެވެ. އަދި މަނިކުފާނު މިނިވަންކުރުމަށް މަސައްކަތްކުރުމުގެ ތަސްވީރު ބޭރުފުށުން ދެއްކެވިކަމުގައި ވީނަމަވެސް އެކިއެކި ސައްލާތަކުގައި މަނިކުފާނުގެ ޒަޢާމަތު މިހާރު ބޮއްސުންލައިފިކަމަށް ބުނި ބޭފުޅުންވެސް ތިބީ މަދެއްކޮށްނޫނެވެ. އާއިލީ ޖާހަތާއި، މީސްކޮޅު ގިނަ މީހުން، އެވެރިންނަށް ތާޢީދުކުރާ މީހުންގެ މެދުގައި ފެތުރި މީހުން އަދިވެސް ތިބީ ހަމަ މަނިކުފާނުގެ ޕާޓީގެ މަތިފަޑީގައި ނޫންތޯއެވެ؟
މި އަދު މަނިކުފާނު އަނބުރާ ވަޑައިގެން، ވެރިކަމާއި ދިމާއަށް ހުންގާނު އަނބުރާލައްވާފައިވާއިރު، މަނިކުފާނު ވިދާޅުވިފަދަ ބާޒުތަކުގެ މިސްރާބުވެސް ބަދަލުވެފައިވާކަހަލައެވެ. އޭރު ބޭނުންވީ ޕާޓީގެ ހައިބަތާއި އާރާއި ބާރެވެ. ޕާޓީގެ ފަންވަރާއި ނުފޫޒެވެ. ޕާޓީގައި ބަސްވިދާޅުވާނެ ހިތްވަރާއި އާއްމުންގެ ސަމާލުކަމެވެ. ޕާޓީގެ ތައްޕާހުގައި ވިޔަސް މަނިކުފާނުގެ އަރިހުގައި ވިޔަސް މި ބޭބޭފުޅުން ބޭނުމީ ވެރިކަމުގެ ކޮއިލާ ވީހާވެސް ގާތުގައި ތިއްބެވުމެވެ. މަނިކުފާނެވެ! މަނިކުފާނު ޖަލުން މިނިވަންވެ ވަޑައިގެން ހުންނެވުމުން ވެރިކަމަށް ވާދަކުރާ ރިޔާސީ ޓިކެޓްގައި ބޮޑު އަކުރުން ފަވާލެވޭ ނަމަކަށް އެ ބޭބޭފުޅުންގެ ނަންފުޅު ވުމުގެ ހުވަފެން ބިލާހަކަށް ވެއްޖެއެވެ.
އެހެންވީމައި ދެން މިސްރާބު އޮންނާނީ މަނިކުފާނުގެ ރަނިންމޭޓަކަށް ވުން ނޫންތޯއެވެ. މިނިވަންކަމާއެކު މަނިކުފާނު ހިންދެމިލާ ފުރަތަމަ ބޭއްވި ނޫސްވެރިންގެ ބައްދަލުވުމުގައި ރަނިން މޭޓްކަމުން ނުފެންނާނެ ބޭފުޅަކީ އަހުމަދު އަދީބު ކަމަށް ވިދާޅުވިއެވެ. އެކަމަކު މަނިކުފާނުގެ އަރިހުގައި އުޅުއްވައި، އެއް ތަށިން ފަރީއްކުޅުއްވައި އުޅުއްވުމަށްފަހު ހިތްޕުޅުން ނުފިލާވަރުގެ ދިލަ ހޫނު ލޮޓި ލިބިވަޑައިގެންފައިހުރީ ހަމައެކަނި އަދީބުގެ ފަރާތަކުން ނޫނެއް ނޫންތޯއެވެ؟
މަނިކުފާނުގެ ކައިރީގައި ތިއްބެވި ބޭފުޅުންގެ ތެރޭގައި ގިނައީ އަރިހުގައި ނައިބު ރައީސްކަމާ ހަމައަށް ވަޑައިގަންނަވަން ބޭނުންވާ ބޭފުޅުންނެވެ. ޕާޓީގެ ތެރޭގައި ކިޔާ އުޅޭ އަޑު އިވެނީ، މަނިކުފާނުގެ އާއިލީ ގާތް ގުޅުން އޮތް ބޭފުޅުންވެސް ނިކަން އުންމީދުގައި ތިއްބެވި ވާހަކައެވެ. އަދި ގްރާސްރޫޓާ އޮތް ގުޅުން ބަދަހިކުރައްވައި، އެ ބޭބޭފުޅުންގެ ތާއީދު އިހުނަށްވުރެ ބޮޑަށް ޕާޓީ ތެރޭގައި ފަތުރާލައްވާ ވާހަކައެވެ.
ދެން އޮތީ މަނިކުފާނު ނެތް ތަނުގައި ޕާޓީގެ "ޕޯޑިއަމް"އަކަށް ވެވަޑައިގެންނެވި ބޭފުޅުންނެވެ. މި ބޭބޭފުޅުންގެ ތެރޭގައި މަނިކުފާނުގެ ލޯބިވާ ބޭބޭފުޅު ރައީސް މައުމޫންގެ ފޮޓޯ ޖައްސަވައިގެން މަޖިލީހަށް ހޮވިވަޑައިގަތް ބޭފުޅުންނާއި، އެމަނިކުފާނުގެ ކުޑަ ސިޓީއަކުން ވިދާޅުވި ވިދާޅުވުމަށް ރައްޔިތުން ވޯޓުދެއްވައިގެން ހޮވިވަޑައިގަތް ބޭފުޅުން އެބަ ތިއްބެވިއެވެ. އެހެންވީމާ ބޭބޭފުޅާމެދު ނުބެހެއްޓެވި ޚާލިސްކަމެއް، އިޚުލާސްތެރިކަމެއް މަނިކުފާނަށް ވަކިން އޮންނާނެތޯއެވެ؟ އެދުންފުޅެއްނެތި މި ބޭބޭފުޅުން ވެދުމެއް ނުކުރައްވާކަން ޚުދު މަނިކުފާނަށް މިހާރު ބަހާއި އަމަލުންވެސް ވާނީ ދަސްވެވަޑައިގަންނަވާފައެވެ!
އަދި ނިމުނީކީ ނޫނެވެ! ބައެއް ބޭފުޅުން ނައިބު ރައީސްކަމާ ހަމައަށް ވަޑައިގަންނަވަން ގެންގުޅުއްވަނީ ހިންގުންތެރިކަމުގެ އުކުޅެވެ. އަމަލަށްވުރެ ބަސް ގިނަކުރައްވައި، ތަފާސް ހިސާބުތަކާއި ކުލަ ގަދަ ކުރެހުންތަކުން އެ ބޭފުޅުން ދައްކަވަމުން ގެންދަވަނީ، ތިމަން މަނިކުފާނަށްވުރެ ވަކި ވެރިކަމުގައި މަނިކުފާނާއެކު ބައިވެރިވުމަށް އަރަފޯދިގެންވާ މީހަކު ނެތްކަމެވެ. މިއީ މަނިކުފާނުގެ ޕާޓީގެ އިސް ފައްތަރުގެ ހާލެވެ. ހައްތަހާވެސް މަނިކުފާނަށްވުރެ، މަނިކުފާނަށް އިޚުލާސްތެރިވުމަށްވުރެ ނައިބު ރައީސްކަމުގެ ފޮނިކަން ތަޖުރިބާކުރަން ބޭނުންވާ، މަނިކުފާނުގެ ބަސް ފުޅުން ނަމަ "ބާޒު"ތަކެވެ!
