ރާއްޖޭގެ ފުރަތަމަ އޮޓޮމެޓިކް ފަޔަރ ސިމިއުލޭޓަރ ހިމެނޭގޮތަށް އޭވިއޭޝަން އެކަޑަމީއެއް އިފްތިތާހުކޮށްފި
ސިމިއުލޭޓަރ އަށް ނަންދީފައި ވަނީ އެ މަސައްކަތުގައި އިސްކޮށް އުޅުއްވި އަލްމަރުޙޫމް އަޙްމަދު ފަޔާޒުގެ ނަމުން
ރާއްޖޭގެ ފުރަތަމަ އޮޓޮމެޓިކް ފަޔަރ ސިމިއުލޭޓަރ ހިމެނޭގޮތަށް އޭވިއޭޝަން އެކަޑަމީއެއް އިފްތިތާހުކޮށްފި
ރާއްޖޭގެ ފުރަތަމަ އޮޓޮމެޓިކް ފަޔަރ ސިމިއުލޭޓަރ ހިމެނޭގޮތަށް ރީޖަނަލް އެއާޕޯރޓްސް ކޮމްޕެނީ (އާރު.އޭ.ސީ.އެލް) އިން އޭވިއޭޝަން އެކަޑަމީއެއް އިފްތިތާޙްކޮށްފިއެވެ.
އެ އޭވިއޭޝަން އެކެޑަމީ އިފްތިތާހުކޮށްފައި ވަނީ އެކަމަށްޓަކާ ހއ.ހޯރަފުށީގައި ބޭއްވި ޚާއްސަ ރަސްމިއްޔާތެއްގައި ހޯމަ ދުވަހުއެވެ. މި އެކަޑަމީގެ ފަޔަރ ޓްރެއިނިންގ ހިންގުމުގައި ބޭނުންކުރުމަށް ތައްޔާރުކުރި ފަޔަރ ސިމިއުލޭޓަރ އުފެއްދުމުގެ ގޮތުން އެ ސިމިއުލޭޓަރގެ ބޭސަލް މަސައްކަތް އިސްނަންގަވައި ދެއްވާފައިވަނީ އާރު.އޭ.ސީ.އެލް ކުރީގެ ފަޔަރ އެންޑް ސޭފްޓީ ޑިރެކްޓަރ، އަލްމަރުޙޫމް އަޙްމަދު ފަޔާޒެވެ. އަދި މިފަޔަރ ސިމިއުލޭޓަރ އުފެއްދުމުގެ ޢަމަލީ މަސައްކަތްފަށްޓަވާ ދެއްވާފައިވަނީ ފަޔާޒް ގެ ސީދާ ބެލުމުގެ ދަށުން 2021 ވަނަ އަހަރުގެ އޮގަސްޓް މަހުގެ ތެރޭގައެވެ.
އެހެންކަމުން މި މަޝްރޫޢު ފެށުމުގައި އަލްމަރުޙޫމް އަޙްމަދު ފަޔާޒު ކޮށްދެއްވާފައިވާ މަސައްކަތުގެ އަގުވަޒަންކުރުމުގެ ގޮތުން އާރުސީއެލްގެ ޑިރެކްޓަރުންގެ ބޯޑުގެ މެމްބަރުންނާއި މެނޭޖިންގ ޑިރެކްޓަރުން ވަނީ އެ ފަޔަރ ސިމިއުލޭޓަރއަށް "އަޙްމަދު ފަޔާޒް ފަޔަރ ސިމިއުލޭޓަރ"ގެ ނަމުން ނަން ދިނުމަށް ނިންމަވާފައެވެ.
އާރު.އޭ.ސީ.އެލް އޭވިއޭޝަން އެކަޑަމީއަކީ އޭވިއޭޝަން ރެގިއުލޭޓަރީ އޮތޯރިޓީއިން ކުންފުންޏަށް ލާޒިމުކުރާ ހުރިހާ އޭވިއޭޝަންއާއި ގުޅުންހުރި ޕްރޮގްރާމްތަކެއް ހިންގުމުގެ ޤާބިލުކަން ލިބިފައިވާ ގޮތަށް ތަޢާރަފްކުރާ އެކަޑަމީއެކެވެ. އާރު.އޭ.ސީ.އެލް ޓްރެއިނިންގ އެކަޑަމީއަކީ މޯލްޑިވްސް ސިވިލް އޭވިއޭޝަން އޮތޯރިޓީއިން ކަނޑައަޅާފައިވާ މިންގަނޑުތަކާ އެއްގޮތަށް އިންހައުސް އަދި ރާއްޖޭގެ އެކިއެކި މުއައްސަސާތަކަށް، އޭވިއޭޝަންގެ ދާއިރާއިން ބޭނުންވާ ސިވިލް އޭވިއޭޝަން އެޕްރޫވްޑް ސެޓްފިކެޓް ލެވެލްގެ ކޯސްތަށް ހިންގޭނެ ގާބިލްކަން ލިބިފައިވާ އެކަޑަމީއެއްކަން ފާހަގަކޮށްލެވެއެވެ.
މިގޮތުން މިއެކަޑެމީގައި ސިވިލް އޭވިއޭޝަން އެޕްރޫވަލް ލިބިފަވާ ގާބިލު އަދި ތަޖުރިބާހުރި 20 ޓްރޭނަރުން މަސައްކަތްކުރުމަށް ހަމަޖެހިފައިވާ ކަމަށް އާރުސީއެލް އިން ބުނެއެވެ. އަދި އެ އެކަޑަމީގެ މައިގަނޑު މަޤްޞަދަކީ ސްޓާފުންނާއި އޭވިއޭޝަންގެ އެކިއެކި ދާއިރާތަކުން ޤާބިލު އަދި ޙަރުދަނާ، ބަޔަކު ރާއްޖޭގައި އުފެއްދުން ކަމަށް ވެސް އެ ކުންފުނިން ބުނެއެވެ.
މި އެކަޑަމީގައި އެކިއެކި ފެންވަރުގެ ފަޔަރ ޓްރެއިނިންގެ އިތުރުން އޭރޯޑްރޯމް އޮޕަރޭޝަންގެ އެކިއެކި ތަމްރީނުތައް ހިންގުމަށް ވަނީ ހަމަޖެހިފައެވެ. އަދި ފަޔަރ ސިމިއުލޭޓަރ ފަޔަރ ސިމިއުލޭޓަރ އިން ފަޔަރ ފައިޓަރުންނަށް ނުވަތަ ދަރިވަރުންނަށް އެހީތެރިވެދޭނީ އަލިފާން ފެތުރޭ ސްކޭލް، ތާމަލް ސްޓްރެސް، ފެންނަ ފެނުމާއި ، ބާރުމިން، އަނދަމުންދާ ޖާގައިގެ ޙާލަތަށް އަޞަރުކުރާ ފިނިހޫނުމިން ފަދަ އަލިފާނުގެ ސުލޫކު ވަޒަންކުރުމަށް ވެސް ވަނީ ހަމަޖެހިފައެވެ.
މި އެކަޑަމީ ބިނާކުރުމުގެ މަޝްރޫޢު ކުރިއަށްގެންދިޔަ މުއްދަތުގެ ތެރޭގައި މި މަރުކަޒުގެ ފެންވަރު ރަނގަޅުކުރުމަށް ގިނަ ބަދަލުތަކެއް ގެނެސްފައިވެއެވެ. މިތަނުގެ ކުރިމަގަކީ އޭޝިއާ ސަރަހައްދުގައި ހުރި އެންމެ ފެންވަރު ރަނގަޅު އެއް ފަޔަރ ސިމިއުލޭޓަރުގެ ގޮތުގައި ރޭންކް ކުރެވުމެވެ. އެގޮތުގެމަތިން ޖުމްލަ 23 ދަރިވަރުންނާއެކު މިދިޔަ ޖުލައި މަހުގެ ތެރޭގައި ބޭސިކް ފަޔަރމަން ކޯހުގެ ތަމްރީނުވަނީ ފަށާފައެވެ. ހަމައެހެންމެ ކައިރި މުސްތަގުބަލް އެއްގައި މި ދާއިރާއިން ވަޒީފާ ޢަދާކުރަން ބޭނުންވާ މުވައްޒަފުންނަށާއި ފަރުދުންނަށް އެއާކްރާފްޓް ރެސްކިއު އެންޑް ފަޔަރފައިޓިންގ (އޭ.އާރު.އެފް.އެފް) އާއި އިމަޖެންސީ މެޑިކަލް ޓްރެއިނިންގ (އީ.އެމް.ޓީ) ޓްރެއިނިން ތައް ފަށާނެ ކަން ފާހަގަކޮށްލެވެއެވެ.
ރީޖަނަލް އެއާޕޯޓްސް ކޮމްޕެނީ ލިމިޓެޑް އަކީ ރައީސުލްޖުމްހޫރިއްޔާ، އިބްރާހިމް މުހައްމަދު ސާލިޙް ގެ ޤަރާރަކުން 30 ސެޕްޓެމްބަރ 2020 ވަނަ އަހަރު އުފެއްދެވި، ސަތޭކަ އިންސައްތަ ސަރުކާރު ޙިއްޞާވާ ކުންފުންޏެކެވެ. ދިވެހިރާއްޖޭގެ ސަރަހައްދީ ވައިގެބަނދަރުތަކުންދޭ ޚިދުމަތްތައް ދެމެހެއްޓެނިވި ގޮތެއްގައި ފޯރުކޮށްދިނުމުގެ މަޤްޞަދުގައި އުފައްދަވާފައިވާ އެ ކުންފުނިން މިވަގުތު ހިންގަމުންދަނީ 6 އެއަރޕޯޓެކެވެ. އޭގެ ތެެރޭގައި ހިމެނެނީ ހޯރަފުށި އެއަރޕޯޓް، ހަނިމާދޫ އިންޓަރނޭޝަނަލް އެއަރޕޯޓް، ކުޅުދުއްފުށި އެއަރޕޯޓް، ފުނަދޫ އެއަރޕޯޓް، މާވަރުލު އެއަރޕޯޓް އަދި ފުވައްމުލައް އެއަރޕޯޓް އެވެ. އެ ކުންފުނި އުފެދުމުގެ ކުރިން ސަރަހައްދީ ވައިގެބަނދަރުތަކުގެ މަސައްކަތްތައް ބަލަހައްޓަމުން ގެންދެވީ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންގެ ރީޖަނަލް އެއަރޕޯޓްސް ސެކްޝަނުންނެވެ
