ތަޖްރިބާ އާއި ތަމްރީން ހާސިލްކުރުމުގެ ގޮތުން ދިވެހި ނޫސްވެރިންގެ ޓީމެއް އިންޑިއާއަށް ފުރައިފިއެވެ.

މޯލްޑިވްސް މީޑިއާ ކައުންސިލް (އެމްއެމްސީ) އިން ބުނީ ނޫސްވެރިންގެ ޓީމެއް އިންޑިއާ އަށް ފުރާފައިވަނީ ދިވެހި މީޑިއާގެ މަސައްކަތްތެރިން ކުރިއެރުވުމަށް އެ ކައުންސިލުން ކުރަމުންދާ މަސައްކަތުގެ ދަށުން، އިންޑިއާ ސަރުކާރުގެ އައިޓެކް ޕްރޮގްރާމްގެ އެހީގައި ލިބުނު ފުރުސަތެއްގައި ކަމަށެވެ.

އަދި މިއީ "އިން ސަރވިސް ޓްރެއިނިންގ އޮފް އެޑިޓަރސް އެންޑް ޖާނަލިސްޓްސް އޮފް މޯލްޑިވްސް"ގެ ނަމުގައި އިންޑިއާގެ "އެމިޓީ ޔުނިވަރސިޓީ (ނޮއިޑާ)، އިން އިންތިޒާމްކުރާ ޕްރޮގްރާމެއް ކަމަށާއި އެއީ 8 ދުވަހުގެ ތަމްރީނު ޕްރޮގްރާމެއް ކަމަށް ވެސް އެ ކައުންސިލުން ބުނެއެވެ.

އެމްއެމްސީއިން ބުނީ މިޕްރޮގްރާމަކީ މީޑިއާތަކުގެ އެޑިޓަރުންނާއި ނޫސްވެރިންނަށް އަމާޒުކޮށްގެން ކުރިއަށްގެންދާ ޕްރޮގްރާމެއް ކަމަށާއި މި ޕްރޮގްރާމްގައި ޖުމްލަ 20 ފަރާތަކުން ބައިވެރިވާ ކަމަށެވެ.

މި ތަމްރީނުގެ ބައިވެރިން އިންޑިއާގެ އެކި މީޑިއާތަކާއި، ސަރުކާރުގެެ އެކި އިސް މުއައްސަސާތަކަށް ޒިޔާރަތްކުރުމަށް ވަނީ ހަމަޖެހިފައެވެެ.