ބަރުލަމާނީ ގަރާރު އަނބުރާ ގެންދިއުމަށް ރައީސް ނަޝީދު މަސައްކަތް ފަށްޓަވައިފި
21 އޯގަސްޓު 2022 | އާދީއްތަ 10:46އެ ގަރާރު އަނބުރާ ގެންދިއުމާއި މެދު ރައީސް ނަޝީދު ގެންދަވަނީ، އެމަނިކުފާނަށް ތާޢީދު ކުރާ ބޭފުޅުންނާއި އެކު މަޝްވަރާކުރައްވަމުން
އެމްޑީޕީގެ 4 ވަނަ ކޮންގްރެސްގެ ތެރެއިން
ރާއްޖޭގެ ވެރިކަމުގެ ނިޒާމް ބަރުލަމާނީ ނިޒާމަކަށް ބަދަލުކުރުމަށް ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު އެމްޑީޕީގެ ކޮންގްރެސް އަށް ހުށަހެޅުއްވި ގަރާރު އަނބުރާ ގެންދިއުމުގެ މަސައްކަތް ކުރައްވާ ކަން ރާއްޖެ އެމްވީ އަށް ކަށަވަރުކުރެވިއްޖެއެވެ.
އިތުބާރު ހުރި ފަރާތަކުން މައުލޫމާތު ލިބިފައިވާ ގޮތުގައި ރައީސް ނަޝީދު ގެންދަވަނީ އެ ގަރާރު އަނބުރާ ގެންދިއުމާއި މެދު އެމަނިކުފާނަށް ތާޢީދު ކުރާ ބޭފުޅުންނާއި އެކު މަޝްވަރާކުރައްވަމުންނެވެ. ރައީސް ނަޝީދު މިފަދަ މަޝްވަރާތަކެއް ފަށްޓަވާފައި މި ވަނީ ބަރުލަމާނީ ނިޒާމަށް ވެރިކަން ބަދަލުކުރުމަށް ހުށަހެޅި ގަރާރަށް ބަހުސްކުރުމާއި މެދު ގޮތެއް ނިންމަން ނަގާ ވޯޓު ނަގަން ކުޑަތަން ވެފައި ވަނިކޮށެވެ. ގަރާރު ގެންދިއުމުގެ މައިގަނޑު ސަބަބަކީ އެ ގަރާރަށް ތާއިދު ނުލިބޭނެކަން އެނގުމުން ކަމަށް ވެސް ރާއްޖެއެމްވީ އަށް މައުލޫމާތުދިން ފަރާތުން ވަނީ ބުނެފައެވެ.
ވެރިކަމުގެ ނިޒާމާ ގުޅޭ ގަރާރެއް ރައީސް ނަޝީދު އެމްޑީޕީގެ ކޮންގްރެސްއަށް ހުށަހަޅުއްވާފައިވާއިރު ރައީސުލްޖުމްހޫރިއްޔާ އަދި އެމްޑީޕީގެ އިސް ލީޑަރު އިބްރާހިމް މުޙައްމަދު ސާލިހު ވަނީ މީގެ ކރުިން ވެސް އެ ގަރާރު އަނބުރާ ގެންދިއުމަށް އެދިވަޑައިގެންފައެވެ. ނަމަވެސް އެ ގަރާރު އަނބުރާ ނުގެންދިއުމަށް ނިންމެވުމުން އޭރު ވަނީ ގަރާރާ ގުޅޭ ބަހުސް ވެސް އެޖެންޑާ ކޮށްފައެވެ.
އާދިއްތަ ދުވަހު ކޮންގްރެސްގައި ދެ ރައީސުން ވަރަށް ގިނަ އިރުތަކެއްވަންދެން މަޝްވަރާކުރައްވާފައެެވެ. އަދި ޗެއާޕާސަން ފައްޔާޒު އިސްމާއިލްއާ ވެސް އެ ދެބޭފުޅުން މަޝްވަރާތަކެއް ކުރެއްވި އެވެ. އޭގެފަހުން, ރައީސް ސޯލިހާއި ނަޝީދު ވަނީ ވަކިވަކިން އެ ދެ ބޭފުޅުންގެ ގާތް ބޭފުޅުންނާއެކު ވަކިވަކިން މަޝްވަރާތަކެއް ކުރައްވާފައެވެ.
