ކޮންގްރެސްގެ ނިންމުމާއި ޚިލާފުވެއްޖެނަމަ ނަޝީދު ޕާޓީ އިން ވަކި ކުރަން ޖެހޭނެ: މޫސަ
ޕްރައިމަރީއެއް ބާއްވައިފި ނަމަ ރައީސް ނަޝީދު ހިތްހަމަޖެހިވަޑައިނުގަންނަވާ ނަތީޖާއެއް ގަބޫލުފުޅު ނުކުރައްވަފާނެ ކަމަށް ވިދާޅުވި
ރައީސް ނަޝީދު އާއި ރީކޯ މޫސާމަނިކު
މޯލްޑިވްސް ޑިމޮކްރެޓިކް ޕާޓީގެ ކޮންގްރެސް އިން ނިންމާ ގޮތަކާއި ޚިލާފު ވެވަޑައިގެންފިނަމަ އެ ޕާޓީގެ ރައީސް، އަދި ކުރީގެ ރައީސް މުޙައްމަދު ނަޝީދު ޕާޓީ އިން ވަކި ކުރަން ޖެހޭނެ ކަމަށް އެމްޑީޕީގެ ކުރީގެ ޗެއާޕަރސަން (ރީކޯ) މޫސާ މަނިކު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމް ގައި ވާހަކަދައްކަވަމުން މޫސަ ވިދާޅުވީ އެމްޑީޕީއަކީ މިހާރު ވެސް ވެރިކަމުގައި އޮތް ޕާޓީއަށްވާތީ އެ ޕާޓީގެ ފަރާތުން ކުރިއަށް އޮތް ރިޔާސީ އިންތިޚާބް އަށް ބޭފުޅަކު ހޮވުމަށް ޕްރައިމަރީއެއް ބާއްވަން ޖެހޭކަމަށް ދެކެވަޑައިނުގަންނަވާ ކަމަށެވެ. އަދި އޭނާ ޗެއާޕަރސަންގެ މަގާމުގައި ހުންނެވިނަމަ ޕާޓީގެ އަސާސީ ގަވާއިދަށް އެ ބަދަލު ގެންނަވާނެ ކަމަށް ވެސް ވިދާޅުވިއެވެ.
ވެރިކަމުގައި ތިބެ، ދެވަނަ ފަހަރަށް ވެރިކަމަށް ކުރިމަތިލާނެ ބޭފުޅަކު ހޯދަން ޕްރައިމަރީ ބާއްވަން ނުޖެހޭ ސަބަބެއް ކަމަށް މޫސަ ވިދާޅުވީ ޕާޓީތެރޭގައި ދެބަސްވުންތައް އުފެދި ހަމަނުޖެހުންތައް އުފެދިގެންދާނެތީއެވެ. އޭނާ ވިދާޅުވީ އެފަދަ ހާލަތެއް ތަޖުރިބާކުރެއްވި ކަމަށާއި ޕްރައިމަރީއެއް ބާއްވައިފިނަމަ ނުކުންނާނެ ނަތީޖާ ރަނގަޅު ނުވާނެ ކަމަށެވެ. އަދި ޕްރައިމަރީއެއް ބާއްވައިފިނަމަ ނުކުންނަ ނަތީޖާ ރައީސް ނަޝީދު ގަބޫލުފުޅު ނުކުރައްވަފާނެ ކަމަށް ބެލެވޭ ކަމަށް ވެސް މުސަ ވިދާޅުވިއެވެ.
އެމްޑީޕީގެ ކޮންގްރެސް އިން ނިންމާ ނިންމުން ރައީސް --ނަޝީދު ގަބޫލުފުޅު ނުކުރައްވާ ކަމަށްވާނަމަ އެމަނިކުފާނު ވަގުތުން ޕާޓީ އިން ކަނޑާލަން ޖެހޭނެ ކަމަށް މޫސަ ވިދާޅުވިއެވެ. އެއީ އޭނާއަށް ވެސް ހެދިގޮތް ކަން ފާހަގަކުރައްވައި މޫސަ ވިދާޅުވީ ކޮންގްރެސް އިން ނިންމާ ނިންމުމަކާއި ދެކޮޅު ހަދައިފިނަމަ ކޮންމެ މީހަކުވެސް ޕާޓީ އިން ވަކި ކުރަން ޖެހޭނެ ކަމަށެވެ.
އަންނަ އަހަރު ބާއްވާ ރިޔާސީ އިންތިޅާބުގައި އެމްޑީޕީ އިން ވާދަ ކުރާނެ ކެންޑިޑޭޓަކާ ގުޅޭ ބަހުސްތައް މިހާރު ވެސް ކުރަމުން އަންނައިރު ގިނަ ފަރާތްތަކުން ގަބޫލު ކުރަނީ މިހާރު ރައީސުލްޖުމްހޫރިއްޔާގެ މަގާމުގައި ހުންނެވި އިބްރާހިމް މުޙައްމަދު ސާލިޙު އަށް ދެވަނަ ދައުރެއް ދެއްވަން ޖެހޭ ކަމަށެވެ. ނަމަވެސް އެމްޑީޕީގެ އަސާސީ ގަވާއިދުގައި އެމްޑީޕީގެ ރިޔާސީ ޓިކެޓް ދޫކުރާނީ ޕްރައިމަރީއެއް ބާއްވައިގެން ކަމަށް ބަޔާންކޮށްފައި އޮތުމުން ކޮންގްރެސް ނިންމުމަށްފަހު ޕްރައިމަރީގެ ކަންކަން ކުރިއަށްދާނެ ކަމަށް އެ ޕާޓީން ވަނީ ބުނެފައެވެ.
ޕްރައިމަރީއަކާއި ނުލައި ރިޔާސީ ޓިކެޓް ދޭނަމަ އެމްޑީޕީގެ އަސާސީ ގަވާއިދު އިސްލާހު ކުރަން ޖެހޭނެއެވެ. ނަމަވެސް އެ ގަވާއިދު އިސްލާހު ކުރަން ހަތަރުވަނަ ކޮންގްރެސްއަށް ހުށައަޅާފަ އެއް ނުވެއެވެ.
ކޮންގްރެސް ހުޅުވުމުގެ ރަސްމިއްޔާތުގައި ރައިސް ނަޝީދު ދެއްކެވި ވާހަކަފުލުގައިވަނީ ޕާޓީގެ ހުރިހާ މެމްބަރުން އެކުވެ އެކަތި ގަޑެއްގެ ގޮތުގައި ތިބުމުގެ މުހިންމު ކަން ފާހަގަ ކުރައްވާ ވާހަކަފުޅު ދައްކަވާފައެވެ. އަދި ރައީސް އިބްރާހިމް މުޙައްމަދު ސާލިޙު އަށް ވެރިކަމުގެ ދެވަނަ ދައުރެއް ދިނުން އެއީ ހުރިހާ މެމްބަރުންވެސް އެދޭ ގޮތްކަމަށް ވަނީ ވިދާޅުވެފައެވެ.
