ކޮންގްރެސްގެ ސައްހަ ކަމާއި މެދު ސުވާލު އުފެދޭ ޝަކުވާ އެއް ހުށައަޅާފަ އެއް ނެތް: އެމްޑީޕީ

އެމްޑީޕީގެ 4 ވަނަ ކޮންގްރެސްގެ ސައްހަކަމާއި މެދު ސުވާލުއުފެދޭ އެއްވެސް ޝަކުވާ އެއް ކޮންގްރެސް އާއި ގުޅިގެން ހުށައަޅާފައި ނުވާ ކަމަށް އެމްޑީޕީ ކޮންގްރެސް ކޮމިޓީގެ މުގައްރިރު އަދި އެ ޕާޓީގެ މަތި އުތުރު ޕްރޮވިންސުގެ ރައީސް އިބްރާހިމް ވަހީދު (އިބުރޭ) ވިދާޅުވެއްޖެއެވެ.

ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމެއްގައި ރާއްޖެ އެމްވީ އިން ކުރި ސުވާލަކަށް ޖަވާބުދެއްވަމުން އޭނާ ވިދާޅުވީ ކޮންގްރެސް އާއި ބެހޭގޮތުން ހުށައަޅާފައި ވަނީ 3 ގޮތްޕަކުން 11 ޝަކުވާ ކަމަށެވެ. އެހެންނަމަވެސް އޭގެ ތެރެއިން 4 މީހުން އެއްވެސް ޝަކުވާ އެއް ހުށައަޅާފައި ނުވާކަން ލިޔުމުން އަންގާފައިވާތީ ހުށަހަޅާފައިވާ ޝަކުވާތަކުގެ ސައްހަކަމާއި މެދު ސުވާލު އުފެދޭ ކަމަށް އޭނާ ވަނީ ފާހަގަކުރައްވާފައެވެ. އެ ހުރިހާ ޝަކުވާ އެއްވެސް ހުށަހަޅާފައި ވަނީ ބުރާސްފަތި ދުވަހުކަން އޭނާ ވަނީ ފާހަގަކުރައްވާފައެވެ.

ކޮންގްރެސްގެ ސައްހަކަމާއި މެދު ސުވާލު އުފައްދާ އަމިއްލަ ފަރާތަކުން އެމްޑީޕީގެ ޗެއަރޕަރސަން ފައްޔާޒް އިސްމާއިލް އަށް ސިޓީ އެއް ވަނީ ފޮނުވާފައެވެ. ހުކުރު ދުވަހު ހުށަހެޅި އެ ސިޓީ ހުށައަޅާފައި ވަނީ މުހައްމަދު އަރީފު ކިޔާ މީހެކެވެ. އެ ސިޓީގެ ކޮޕީ އެއް އިލެކްޝަންސް ކޮމިޝަން އަށް ވެސް ވަނީ ހުށަހަޅާފައެވެ. ހުކުރު ދުވަހު ފޮނުވި އެ ސިޓީގައި ބުނެފައި ވަނީ ކޮންގްރެސްގައި ބައިވެރިވާ ބައެއް ގޮފިތަކުގެ ރައީސުންނަކީ ގަަވާއިދާއި އެއްގޮތަށް ހޮވިގެން ކޮންގްރެސްގައި ބައިވެރިވާ ބައެއް ނޫން ކަަމަށް ބުނެފައެވެ. އަދި ބައެއް ގޮފިތަކުގެ އިންތިޚާބު ވެސް ބާއްވާފައި ނުވާ ކަަމަށް އެ ސިޓީގައި ވަނީ ބުނެފައެވެ.

އެހެންނަމަވެސް އެފަދަ ސިޓީ އެއް ކޮންގްރެސްގެ ކޮމިޓީ އަށް ލިބިފައި ނުވާކަމަށް އިބުރޭ ވަނީ ވިދާޅުވެފައެވެ.