ޓޮޓެންހަމަށް ކުޅެމުން އަންނަ ފްރާންސްގެ ޓަންގީ އެންޑޮމްބެލޭ، ލޯނު އެއްބަސްވުމެއްގެ ދަށުން ނަޕޯލީއަށް ބަދަލުވެއްޖެއެވެ.
ލިއޯން ދޫކޮށް 2018 ވަނަ އަހަރު ޓޮޓެންހަމާ ގުޅުނު އެންޑޮމްބެލޭ ވަނީ މިހާތަނަށް އެ ޓީމަށް ކުޅެދިން 91 މެޗުގައި 10 ލަނޑު ޖަހާފައެވެ. ލޯނު އެއްބަސްވުމެއްގެ ދަށުން އޭނާ ނަޕޯލީއަށް ބަދަލުވިއިރު، މި ސީޒަނަށްފަހު ދާއިމީ އެއްބަސްވުމެއް ހެދުމުގެ ފުރުސަތުވެސް އޮންނާނެއެވެ.
ފްރާންސްގެ އެމިއެންސްއިން އެންޑޮމްބެލޭ ސީނިއަރ ކެރިއަރު ފެށީ 2014 ވަނަ އަހަރުއެވެ. އުމުރުން 25 އަހަރުގެ ފޯވާޑް ވަނީ އޭގެ ފަހުން 2017 ވަނަ އަހަރު ލޯނު އެއްބަސްވުމެއްގެ ދަށުން ލިއޯންއަށް ބަދަލުވެފައެވެ. އެއަށްފަހު 2018 ވަނަ އަހަރު ވަނީ އެ ޓީމާއެކު ދާއިމީ އެއްބަސްވުމެއް ހަދާފައެވެ. ދާއިމީ އެއްބަސްވުމުގެ ދަށުން އެއް އަހަރު އެ ޓީމަށް ކުޅެދިނުމަށްފަހު، 2019 ވަނަ އަހަރު ބަދަލުވީ ޓޮޓެންހަމަށެވެ.
ޓޮޓެންހަމަށް ބަދަލުވުމަށްފަހު ނަޕޯލީއަކީ ލޯނު އެއްބަސްވުމެއްގެ ދަށުން އޭނާ ކުޅޭ ދެވަނަ ޓީމެވެ. ލޯނު އެއްބަސްވުމުގެ ދަށުން އޭގެ ކުރިން އޭނާ ވަނީ ލިއޯންއަށް ކުޅެފައެވެ. އެފަހަރު އޭނާ ވަނީ ލިއޯންއަށް 15 މެޗު ކުޅެދީ، އެއް ލަނޑު ޖަހައިދީފައެވެ.
އެންޑޮމްބެލޭއަކީ ފްރާންސްގެ ގައުމީ ޓީމަށްވެސް ކުޅެމުން އަންނަ ކުޅުންތެރިޔެކެވެ. ގައުމީ ޓީމުގައި އޭނާ ހިމަނާފައިވަނީ 2018 ވަނަ އަހަރުއެވެ. އޭގެ ފަހުން އެންޑޮމްބެލޭ ވަނީ ގައުމީ ޓީމަށް ހަތް މެޗު ކުޅެދީފައެވެ.
