ރާއްޖެ މިވަނީ ކޮރަޕްޝަންގެ ހާއްޔަކަށްވެފައި: ޔާމީން
20 އޯގަސްޓު 2022 | ހޮނިހިރު 04:15ޒީރޯ ޓޮލެރެންސްގެ މާނަ އޮޅޭ ހިސާބަށް ކަންކަން ގޮސްފައިވާކަމަށް ވިދާޅުވި
ޕީޕީއެމް/ޕީއެންސީގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީން
ރާއްޖެވަނީ ކޮރަޕްޝަންގެ ހާއްޔަކަށް ވެފައިކަމަށް އިދިކޮޅު ޕީޕީއެމް/ޕީއެންސީގެ ކޯލިޝަންގެ ލީޑަރ އަދި ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
އެމަނިކުފާނަށް ރިޔާސީ ޓިކެޓް ހަވާލުކުރުމަށް "ހަވާލޭ ވަތަން" ނަމުގައި ބޭއްވި ޖަލްސާގައި ވާހަކަދައްކަވަމުން ޔާމީން ވިދާޅުވީ، މިސަރުކާރުން އެންމެ ގަޔާވެގެން ދައްކާ ވާހަކައަކީ ކޮރަޕްޝަނަށް ޒީރޯ ޓޯލެރެންސް ދޭ ވާހަކަ ކަމަށެވެ. ނަމަވެސް ޒީރޯ ޓޯލެރެންސްގެ މާނަ އޮޅޭ ހިސާބަށް ކަންކަން ގޮސްފައިވާކަމަށް ޔާމީން ވިދާޅުވިއެވެ.
ދުނިޔޭގެ ކޮރަޕްޝަން އިންޑެކްސްއިން ރާއްޖެ އަދިވެސް ލައްވާލަނީ އެންމެ ފުލުގައިކަމަށް ޔާމީން ވިދާޅުވިއެވެ. ޔާމީން ވަނީ މިސަރުކާރުން ކުންފުނިތަކަށް ބަދަލުގެ ގޮތުގައި ދިނުމަށް ހަދާފައިވާ ސެޓްލްމަންޓް އެގްރިމަންޓްތަކަށް ފާޑުވިދާޅުވެފައެވެ. އެގޮތުން އެމަނިކުފާނުގެ ސަރުކާރުގައި ބަންޑާރަ ނައިބުގެ އޮފީހުން ބަލައި، ގާނޫނީ ލަފާ ހޯދާފައިހުރި އެއްބަސްވުންތަކުގެ ކަންކަންވެސް، މިސަރުކާރުން ބޮޑެތި އަދަދުތަކުން އެކުންފުނިތަކަށް ދޭގޮތަށް އެއްބަސްވުންތައް ހަދާފައިވާކަމަށް ވިދާޅުވިއެވެ. އެމަނިކުފާނު ވިދާޅުވީ ގާތް ރަހުމަތްތެރިން ހިމެނޭ އެކި ކުންފުނިތަކަށް ސެޓްލްމަންޓްގެ ނަމުގައި ފައިސާ ދިނީކަމަށެވެ.
މީގެއިތުރުން އިންތިޚާބުތަކާ ދިމާކޮށް ވަކި ބަޔަކަށް މަންފާވާ ގޮތަށް ކަންކަން ކުރަމުންދާކަމަށް ވިދާޅުވިއެވެ. އިންތިޚާބުތައް އޮބްޒަރވްކުރަން އައި ކޮމަންވެލްތު ގްރޫޕުންވެސް، މިސަރުކާރުން އިންތިޚާބުގެ ކެމްޕެއިނަށް ރަސްމީ ހުރިހާ މުއައްސަސާތަކާއި ދައުލަތުގެ މުދާ ބޭނުންކޮށްގެން އިންތިޚާބުތަކުގައި މަސައްކަތްކުރިކަން ފާހަގަކޮށްފައިވާކަމަށެވެ.
މީގެއިތުރުން އިންތިޚާބުތަކާ ދިމާކޮށް ސަރުކާރުގެ ކުންފުނިތަކުން ގިނަ އަދަދަކުން ވަޒީފާތައްް ދެމުން ދާކަމަށް ވިދާޅުވެ، އެއީ ކޮރަޕްޝަންގެ އަމަލުތައްކަމަށާއި ނަމަވެސް އެކަންކަން ބެލޭނެ ގޮތެއް ނޯންނަކަމަށް ވިދާޅުވިއެވެ.
މީގެއިތުރުން ޔާމީން ވިދާޅުވީ މިސަރުކާރުގައި ދަރަނި އިތުރުވެފައިވާކަމަށެވެ.
