ޗެލްސީގައި އިތުރަށް މަޑުކުރުމަށް ޓުޗެލް މަޝްވަރާކުރަނީ

ޗެލްސީއާއެކު ހަދާފައިވާ އެއްބަސްވުމުގެ މުއްދަތު އިތުރުކޮށް، އެ ޓީމުގައި މަޑުކުރުމަށް މަޝްވަރާކުރެވެމުންދާ ކަމަށް ތޯމަސް ޓުޗެލް ބުނެފިއެވެ.

ޗެލްސީގެ ކޯޗުކަމާ ޓުޗެލް ހަވާލުވީ 2021 ވަނަ އަހަރުއެވެ. އޭގެ ފަހުން އޭނާ ވަނީ އެ ޓީމާއެކު ގިނަ ކާމިޔާބީތަކެއް ހޯދާފައެވެ. ބޮޑެތި ކުލަބުތަކަށް އިރުޝާދު ދީފައިވާ ޓުޗެލްއާއެކު ޗެލްސީން އަންނަނީ ރަނގަޅު ނަތީޖާތަކެއް ނެރެމުންނެވެ.

ޗެލްސީގައި އިތުރަށް މަޑުކުރުމާ ގުޅޭގޮތުން ވާހަކަދައްކަމުން ޓުޗެލް ބުނީ, އެކަމުގެ ވާހަކަތައް މިހާރު ދެކެވެމުންދާ ކަމަށެވެ. އަދި އޭނާގެ މީހުން ކުލަބުގެ އޯނަރުންނާ ވާހަކަ ދައްކައި، ކަންކަން ހަމަޖައްސާ ކަމަށެވެ. މީގެ އިތުރުން، ޗެލްސީގައި ހުރެވުމަކީ އޭނާއަށް ލިބޭ ބޮޑު އުފަލެއް ކަމަށާއި، ކުލަބުގައި ހުރީ ހިތްހަމަ ޖެހިގެން ކަމަށެވެ.

އުމުރުން 48 އަހަރުގެ ކޯޗު ވަނީ ޖަރުމަނު ލީގުގެ ބްރޫޝިއާ ޑޯޓްމުންޑާއި، ފްރާންސް ލީގުގެ ޕެރިސް ސެއިންޓް ޖާމަން (ޕީއެސްޖީ) ފަދަ ބޮޑެތި ކުލަބުތަކަށް އިރުޝާދުދީފައެވެ.

ޗެލްސީއާއެކު ޓުޗެލް ވަނީ ތިން ތައްޓެއް ކާމިޔާބުކޮށްފައެވެ. އޭގެ ތެރޭގައި ޔުއެފާ ޗެމްޕިއަންސް ލީގު، ޔުއެފާ ސުޕަރ ކަޕް އަދި ފީފާ ކުލަބް ވޯލްޑް ކަޕް ހިމެނެއެވެ. މީގެ އިތުރުން އެފްއޭ ކަޕްގެ ރަނަރަޕްކަން ދެފަހަރު، އަދި ކަރަބޯ ކަޕްގެ ރަނަރަޕްކަން އެއްފަހަރު ހޯދާފައިވެއެވެ.