ރޮޒޭނާ ރައީސް ނަޝީދަު އަށް" ދިސް އިޒް ޓޫ މަޗް، އެވަރަށް ސެލްފިޝް ވާކަށް ނުވާނެ"

ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިހާރު އަމަލުކުރައްވަނީ ވަރަށް އަމިއްލަ އެދުން ބޮޑުކޮށް ކަމަށް ވިދާޅުވެ ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒޭނާ އާދަމް ރައީސް ނަޝީދު އަށް ވަރަށް ބޮޑަށް ފާޑުވިދާޅުވެއްޖެއެވެ.

ރާއްޖެޓީވީގެ ފަލަ ސުރުހީ ޕްރޮގްރާމްގައި ވާހަކަދައްކަަމުން ރޮޒޭނާ ވިދާޅުވީ ރައީސް ނަޝީދު ބޭނުންފުޅުވާ ގޮތަށް ބޭނުންފުޅުވާ ހުރިހާ ކަމެއް ވާން ޖެހޭނެ ކަމަށް އެމަނިކުފާނު ޤަބޫލުކުރައްވާ ކަަމަށެވެ. އަދި ބޭނުންފުޅުވާ ގޮތަށް ކަންކަން ނުވެއްޖެ ނަމަ ޕާޓީ އާއި ގައުމަށް އެންމެ ރަނގަޅު ގޮތް ބެލުމުގެ ބަދަލުގައި އަމިއްލަ އެދުން އިސްކުރައްވާ ކަަމަށް ވެސް އޭނާ ވިދާޅުވިއެވެ. އެގޮތުން އެކި ގޮތް ގޮތުން ރައީސް ނަޝީދު މަސައްކަތްކުރައްވަނީ ވެރިކަމަށް ވަޑައިގަންނަވަން ކަމަށް ރޮޒޭނާ ވަނީ ފާހަގަކުރައްވާފައެވެ.

Advertisement

ރައީސްނަޝީދު ވެރިކަން ބޭނުންފުޅު ވެވަޑައިގަންނަވާތީ، ރައްޔިތުންގެ މަޖިލީހުން ރައީސް އިބްރާހިމް މުހައްމަދު ސާލިހުގެ ސަރުކާރަށް ދޭން ޖެހޭ އެއްބާރުލުން އެންމެ ރަނގަޅަށް ނުދެއްވާކަމަށް ވެސް ރޮޒޭނާ ވިދާޅުވިއެވެ.؛ އަދި ރައީސް ނަޝީދުގެ އަމަލުފުޅުތަކުގެ ސަބަބުން ޕާޓީ އާއި ސަރުކާރަށް ވެސް ގެއްލުންވަމުންދާ ކަަމަށާއި އެމަނިކުފާނުގެ އަމަލުތައް ހުންނަ ގޮތުން އާއްމުންގެ ތަރުހީބުވެސް ރައީސް ނަޝީދަށް ކުޑަވަމުންދާ ކަަަމަށް ރޮޒޭނާ ވަނީ ވިދާޅުވެފައެވެ.

ރޮޒޭނާ ވަނީ ރައީސް ނަޝީދު އާއި ރައީސް ސާލިޙު އާއި ދެބޭފުޅުންގެ ގުޅުން ހީނަރުވުމަކީ އެކަމުގެ ނޭދެވޭ އަސަރު އެމްޑީޕީ އަށް ކުރާނެ ކަމެއް ކަން ފާހަގަކުރައްވާފައެވެ. އަދި ބައެއް ކަންކަމުގައި ރައީސް ނަޝީދުގެ ޚިޔާލުފުޅަކީ އެމްޑީޕީގެ ޚިޔާލު ކަމަށް ދޭހަވާ ގޮތަށް ވާހަކަދެއްކެވުމުގެ ސަބަބުން ޕާޓީގެ އާއްމު މެމްބަރުން ނޭދޭ ގޮތަށް ރައީސް ނަޝީދަށް ވާހަދެއްކެވޭ ކަމަށެވެ. އެގޮތުން ޕީޕިއެމް އާއި އެކު މަސައްކަތްކުރުމަކީ އެމްޑީޕީގެ އާންމު މެމްބަރުން ބޭނުންވާނެ ކަމެއް ނޫން ކަަމަށް ވެސް ރޮޒޭނާ ވިދާޅުވިއެވެ.