ކްލޮޕް ޤަބޫލުކުރާ ގޮތުގައި މިފަހަރުގެ ލީގު ރޭހަށް ވާދަކުރާނީ ސިޓީ އާއި ލިވަޕޫލް އެކަންޏެއް ނޫން

އޭނާ އަށް ފެންނަ ގޮތުގައި މި ސީޒަނުގެ އިނގިރޭސި ޕްރިމިއަރ ލީގު ހޯދުމުގެ ރޭހުގައި ވާދަކުރާނީ މެންޗެސްޓަރ ސިޓީ އާއި ލިވަޕޫލް އެކަނި ނޫން ކަމަށް ޔާގަން ކްލޮޕް ބުނެފިއެވެ.

ލިވަޕޫލްގެ ކޯޗު ކްލޮޕް މިހެން ބުނީ ޕްރިމިއަރ ލީގުގައި ކްރިސްޓަލް ޕެލެސް އަތުން އެއްވަރުވީ މެޗަށްފަހުއެވެ. ފާއިތުވި ހަތަރު ވަރަކަށް ސީޒަންގެ ޕްރިމިއަރ ލީގުގައި އޮތީ ސިޓީ އާއި ލިވަޕޫލްގެ ވާދަވެރިކަމެވެ. އޭގެ ތެރެއިން 19-2018 ވަނަ ސީޒަނާއި، 22-2021 ވަނަ ސީޒަންގައި ސިޓީން ލީގު ކާމިޔާބުކުރީ އެންމެ ފަހު މެޗުންނެވެ.

ކްލޮޕްގެ ވާހަކައިގައި ވަނީ އާސެނަލް އަދި ޓޮޓެންހަމް ފާހަގަކޮށްފައެވެ. މީގެ އިތުރުން އޭނާ ވަނީ ސިޓީއަށް އާލިން ހާލަންޑުގެ މުހިންމު ކަމާ މެދު ވެސް ވާހަކަ ދައްކާފައެވެ. ކްލޮޕް ބުނީ ކޮމިއުނިޓީ ޝީލްޑު މެޗުގައި ލިވަޕޫލުން ސިޓީ ބަލިކުރިކަމަށާއި، އެންމެންގެ ސުވާލަކަށްވީ ހާލަންޑު ލަނޑު ޖަހާނެތޯއެވެ. އޭނާ ބުނީ ސިޓީއާއެކު ހާލަންޑަށް ދެވެނީ ކޮން ހިސާބަކަށްތޯ ބެލުން މުހިންމު ނޫން ކަމަށާއި، އެންމެ މުހިންމީ ސިޓީއާ އެއް ލެވެލަށް ލިވަޕޫލުން ދިޔުން ކަމަށެވެ. ކްލޮޕް ފާހަގަކުރި ގޮތުގައި ލިވަޕޫން މަސައްކަތް ކުރަނީ ވެސް އެކަމަށެވެ.

އިތުރަށް ކްލޮޕް ބުނީ ދެ ލީގު ރޭހުގައި އޭނާއަށް ފެންނަނީ ދެ ޓީމުގެ ވާދަވެރިކަމެއް ނޫން ކަމަށެވެ. އޭނާ ބުނީ އެންޓޯނިއޯ ކޮންޓޭއާއެކު ޓޮޓެންހަމް އޮތީ ރަނގަޅު ހާލަތެއްގައި ކަމަށާއި، އާސެނަލާ ދެކޮޅަށް ކުޅެން މިހާރު ވަރަށް އުނދަގޫވާނެ ކަމަށެވެ. އޭނާ ބުނީ މި ސީޒަނުގައި އާސެނަލް ފެންނަނީ ވަރަށް ބޮޑަށް ތައްޔާރަށް އޮތް މަންޒަރު ކަމަށެވެ.

ލީގުގައި ކޮންމެ ޓީމަކުން ވެސް މިހާތަނަށް ދެ މެޗު ކުޅެފައިވާއިރު، އެއް ވަނައިގައި އޮތީ ސިޓީއެވެ. އާސެނަލް ދެ ވަނައިގައި އޮތް އިރު، ތިން ވަނައިގައި އޮތީ ބްރެންޓްފޯޑެވެ. އަދި ހަތަރު ވަނައިގައި އޮތީ ޓޮޓެންހަމްއެވެ. ލިވަޕޫލް އޮތީ 12 ވަނައިގައެވެ.