ތިން ވަނަ ފަރާތެއްގެ ނުފޫޒު ފޯރާފައިވާތީ ދުނިޔޭގެ ފުޓުބޯޅައިގެ މައި އިދާރާ (ފީފާ) އިން އަވަށްޓެރި އިންޑިއާ ސަސްޕެންޑުކޮށްފިއެވެ.

ދާދި ފަހުން އިންޑިއާގެ ސްޕްރީމް ކޯޓުން ވަނީ އޯލް އިންޑިއާ ފުޓުބޯޅަ ފެޑެރޭޝަންގެ ރައީސް ޕްރަފުލް ޕަޓޭލް މަގާމުން ދުރުކޮށްފައެވެ. އެއަށްފަހު އެ ޤައުމުގެ ސުޕްރީމް ކޯޓުން ވަނީ އެ އިދާރާގެ ހިންގުން އެޑްމިނިސްޓްރޭޓިވް ކޮމެޓީއަކާ ހަވާލުކޮށްފައެވެ. އެ ކޮމެޓީ ވެސް އެކުލަވާލީ ސުޕްރީމް ކޯޓުންނެވެ. ފީފާގެ އުސޫލު ބުނާ ގޮތުން، ފީފާގެ މެމްބަރު ފެޑެރޭޝަންތައް ވާންޖެހޭނީ ސިޔާސީ އަދި ޤާނޫނީ ނުފޫޒުން އެއްކިބާވެފައިވާ ތަންތަނަށެވެ.

ފީފާ އާއި އޭޝިއަން ފުޓުބޯޅަ ކޮންފެޑެރޭޝަން (އޭއެފްސީ) އިން ވަނީ އިންޑިއާގެ ފުޓުބޯޅަ ސްޓޭކްހޯލްޑަރުންނާ ބައްދަލުކޮށްފައެވެ. އެ ބައްދަލުވުމުގައި ވަނީ އޭއައިއެފްއެފްއަށް ދިމާވެގެން އުޅޭ މައްސަލަ ހައްލުކުރުމާ ގުޅޭ ގޮތުން މަޝްވަރާކޮށްފައެވެ. އޭއައިއެފްއެފްގެ ޤަވާއިދު ނިމުނު ޖުލައި މަހުގެ ނިޔަލަސް ބަދަލުކުރަން ޖެހޭއިރު، ސެޕްޓެމްބަރު 15 ގައި އިންތިޚާބެއް ބާއްވަން ޖެހެއެވެ. ފީފާއިން އިން ވަނީ އޭއައިއެފްއެފް އިން އެއްވެސް ފަރާތެއްގެ ނުފޫޒެއް ނެތި، އަމިއްލައަށް ހިންގަށް ފެށުމާއެކު ސަސްޕެންޝަން އުވާލާނެކަމަށް ބުނެފައެވެ.

ފީފާގެ މި ސަސްޕެންޝަނުގެ ސަބަބުން އަންނަ އޮކްޓޫބަރު މަހު އިންޑިއާގައި ބޭއްވުމަށް ހަމަޖެހިފައިވާ 17 އަހަރުން ދަށުގެ އަންހެން ވޯލްޑް ކަޕް ނުބޭއްވޭނެއެވެ. މީގެ އިތުރުން ބައިނަލްއަޤުވާމީ މުބާރާތެއްގައި އިންޑިއާ އަދި އެ ޤައުމުގެ ކުލަބަކަށް ވެސް ބައިވެރިނުވެވޭނެއެވެ.