ޒިޔަތުއާއި އަދީބުގެ ހެކިބަސް އެއް ދުވަހެއްގައި ނެގުމަށް، މިއަދުގެ އަޑުއެހުން ފަސްކޮށްފި
އަބްދުﷲ ޒިޔަތުގެ ހެކިބަސް ނަގާގޮތަށް ކުރިން އޮތީ ހަމަޖެހިފައި
ރައީސް ޔާމީނުގެ މައްޗަށް އުފުލާފައިވާ ދައުވާތަކުގެ އަޑުއެހުންތައް ކްރިމިނަލް ކޯޓުގައި ކުރިއަށްދޭ
ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން, މަގާމުގެ ނުފޫޒު ބޭނުންކުރައްވައިގެން ކުރީގެ ރައީސް އަބްދުﷲ ޔާމީން ރިޝްވަތު ނެންގެވިކަމަށް ތުހުމަތުކުރެވޭ މައްސަލައިގެ އަޑުއެހުން އެހެން ދުވަހަކަށް ފަސްކޮށްފިއެވެ.
މި މައްސަލަ ކޯޓުގައި ކުރިއަށްދަނީ ރައީސް ޔާމީން އާއި، ޔޫސުފް ނައީމްގެ ދައުވާތައް އެކުއެކީގައެވެ.
މި މައްސަލައިގައި މިހާރު ކުރިއަށްދަނީ ހެކިބަސް ނެގުމުގެ މަރުހަލާއެވެ.
މި އަޑުއެހުމުގައި އެމްއެމްޕީއާރްސީގެ ކުރީގެ މެނޭޖިންގ ޑިރެކްޓަރ އަބްދުﷲ ޒިޔަތުގެ ހެކިބަސް ނަގާގޮތަށް އޮތީ ހަމަޖެހިފައެވެ. އެހެންނަމަވެސް، އަޑުއެހުން ފެށުމާއެކު ޔޫސުފް ނައީމްގެ ވަކީލު ހަމްޒާ ލަތީފް ވަނީ އެކަމަށް އިއުތިރާޒު ކުރައްވާފައެވެ.
ވަކީލު ހަމްޒާ ލަތީފް ވިދާޅުވީ، އެއްކަމަކާއި ގުޅިގެން 2 ފަރާތަކުން ހެކިބަސްދޭއިރު، އަބްދުﷲ ޒިޔަތުއާއި އަހުމަދު އަދީބުގެ ހެކިބަސް ދެ ދުވަހަކު ނަގައިފިނަމަ އެކަކުގެ ހެކިބަހަށް ބަލައި، އަނެކަކުގެ ހެކިބަސް ފަރުމާ ކޮށްފާނެ ކަމަށެވެ. ވުމާއެކު، ޔޫސުފް ނައީމްގެ ވަކީލު ވަނީ އެ ދެ ހެކިންގެ ހެކިބަސް އެއް ދުވަހެއްގައި ނެގުމަށް އެދިފައެވެ.
އެކަމަށް ރައީސް ޔާމީނުގެ ވަކީލުންވެސް ވަނީ ތާއީދު ކުރައްވާފައެވެ. އެގޮތުން އެކަން ބަޔާންކޮށް އާދިއްތަ ދުވަހު ކޯޓަށް ސިޓީއެއްވެސް ހުށައަޅާފައިވާނެކަމަށް ރައީސް ޔާމީނުގެ ވަކީލުން ވިދާޅުވިއެވެ.
ރައީސް ޔާމީނުގެ ވަކީލުން ވަނީ އެ ދެ ފަރާތަކީ ރައީސް ޔާމީނާމެދު އަދާވަތްތެރިކަމެއްވެސް އޮވެދާނެ ބައެއް ކަމަށް ބަޔާން ކުރައްވާފައެވެ. އަދި ވަކި ގޮތަކަށް ހެކި ބައްޓަން ކުރުމަށް ކުޑަވެސް ފުރުސަތެއް އޮތްނަމަ، އެ ފުރުސަތެއް ނުދެއްވުމަށް ވަނީ އެދިލައްވާފައެވެ.
އެކަމާ ގުޅިގެން ދައުލަތުގެ ވަކީލު ވިދާޅުވީ، ޝަރީއަތުން މީގެ ކުރިންވެސް ހެކިބަސް ނެގުމުގެ އަޑުއެހުންތައް ކުރިއަށް ގެންދާއިރު އެއް ހެކިވެރިޔަކު ހާޒިރު ކުރުމަށް ނިންމާފައިވާ ކަމަށާއި، އެ ދެ ހެކިންގެ ހެކިބަސް ވަކިން ނެގުމަށް ދިފާއުން ކުރިން އެދިފައި ނުވާ ކަމަށެވެ.
އެހެންނަމަވެސް ދައުލަތުންވެސް ވަނީ އެ ދެ ހެކިންގެ ހެކިބަސް އެއް ދުވަހެއްގައި ނެގުމާއި މެދު ދައުލަތުގެ އިއުތިރާޒެއް ނެތްކަން ފާހަގަކޮށްފައެވެ.
ދައުލަތާއި ދިފާއުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ އެ ކޯޓުގެ އިސްގާޒީ އަހުމަދު ޝަކީލު ވަނީ އޯގަސްޓު މަހުގެ 30 ވަނަ ދުވަހަށް އެ ދެ ހެކިންގެ ހެކިބަސް ނެގުމަށް އަޑުއެހުން ފަސް ކުރައްވާފައެވެ.
އޭގެ އިތުރުން، އޯގަސްޓު 18 އާއި 23 ގައިވެސް އިތުރު ހެކިންގެ ހެކިބަސް ނެގުމަށް ވަނީ ތާވަލު ކުރެވިފައެވެ.
މި މައްސަލައިގެ އެންމެ ފަހުން އަޑުއެހުމެއް ބާއްވާފައިވަނީ 9 އޯގަސްޓުގައެވެ. އެ ދުވަހުގެ އަޑުއެހުމުގައި ރައީސް ޔާމީންގެ ގާތް އެކުވެރިއެއްގެ ގޮތުގައި މަސައްކަތްކުރެއްވި ދިއްގަރު ދާއިރާގެ ކުރީގެ މެމްބަރު އަހުމަދު ނާޒިމް ވަނީ ރައީސް ޔާމީނާ ދެކޮޅަށް ހެކިބަސް ދެއްވާފައެވެ.
