އަޔެކްސްގައި އެންޓޮނީ ހުރީ ހިތްހަމަ ޖެހިގެން

އަޔެކްސްގައި ހުރީ ހިތްހަމަ ޖެހިގެން ކަމަށް އެ ޓީމަށް ކުޅެމުން އަންނަ ބްރެޒިލްގެ އެންޓޮނީ މަތިއުސް ބުނެފިއެވެ.

އޭނާ މިހެން ބުނީ މެންޗެސްޓަރ ޔުނައިޓެޑުގެ ކޯޗު އެރިކް ޓެން ހާގް ހޯދަން ބޭނުންވާ ފުޓުބޯޅަ ކުޅުންތެރިންގެ ތެރޭގައި އޭނާ ހިމެނޭ ކަމަށް ބައެއް މީޑިއާތަކުގައި ރިޕޯޓުކޮށްފައި ވަނިކޮށެވެ. 2020 ވަނަ އަހަރު އަޔެކްސް އަށް ބަދަލުވިި އެންޓޮނީ ވަނީ ޓެން ހާގްގެ އިރުޝާދުގެ ދަށުން އެ ޓީމުގައި ކުޅެފައެވެ. އަޔެކްސް ދޫކޮށް ޓެން ހާގް ޔުނައިޓެޑާ ހަވާލުވީ ނިމުނު ސީޒަނަށްފަހުއެވެ.

އެކަމާ ގުޅޭ ގޮތުން ވާހަކަ ދައްކަމުން އެންޓޮނީ ބުނީ ޔުނައިޓެޑަށް ދާން އެދި ޓެން ހާގް އޭނާ އަށް ގުޅާނެ ކަމެއް ބުނާކަށް ނޭންގޭ ކަމަށެވެ. އޭނާ ބުނީ އެކަމުގައި ޓެން ހާގް މަޝްވަރާ ކުރަން ޖެހޭނީ އޭނާގެ އެޖެންޓާ ކަމަށެވެ. އެންޓޮނީ ބުނީ އޭނާގެ ހުރިހާ ފޯކަސްއެއް ހުރީ އަޔެކްސް އަށް ކަމަށެވެ. އިތުރަށް އޭނާ ބުނީ އަންނަން ހުރި ކަމެއް އަންނާނެ ކަމަށާއި، ވާނެ ގޮތެއް ޖެހޭނީ ބަލަން ތިބެން ކަމަށެވެ.

އަޔެކްސްއާ ގުޅޭ ގޮތުން އެންޓޮނީ ބުނީ، އެ ޓީމުގައި އޭނާ ހުރީ ހިތްހަމަ ޖެހިގެން ކަމަށެވެ. އޭނާ ބުނީ ކޮންމެ މިނެޓަކާއި، ކޮންމެ ކަމެއް އޭނާ ދޭނީ އަޔެކްސް އަށް ކަމަށެވެ. އެންޓޮނީ ވަނީ އަޔެކްސް އާއި އެ ސިޓީ ދެކެ އޭނާ ލޯބިވާ ކަމަށް ބުނެފައެވެ.

އުމުރުން 22 އަހަރުގެ އެންޓޮނީ ވަނީ އަޔެކްސް އަށް ކުޅެދިން 82 މެޗުގައި 25 ލަނޑު ޖަހާފައެވެ. މި ސީޒަނުގައި އޭނާ ވަނީ އަޔެކްސް އަށް ކުޅެދިން ތިން މެޗުގައި ދެ ލަނޑު ޖަހާފައެވެ. އެންޓޮނީ އަކީ ބްރެޒިލްގެ ޤައުމީ ޓީމުގައި ވެސް ހިމެނޭ ކުޅުންތެރިޔެކެވެ.