ޔުއެފާ ޗެމްޕިއަންސް ލީގު ގްރޫޕް ސްޓޭޖުގައި އަޔެކްސް ބަލިކޮށް ލިވަޕޫލު ދެ ވަނަ ބުރުން ޖާގަ ހޯދައިފިއެވެ.

ބުދަ ދުވަހުގެ ރޭ އަޔެކްސްގެ ދަނޑުގައި އެ ޓީމާ ދެކޮޅަށް ނުކުތްއިރު، މެޗު އެއްވަރުވެގެން ވެސް ލިވަޕޫލަށް ދެ ވަނަ ބުރުގެ ޖާގައެއް ލިބޭނެއެވެ. ލިވަޕޫލުން އެ މެޗުގައި އަޔެކްސް ބަލިކުރީ 3-0 އިންނެވެ.

މެޗުގައި ލިވަޕޫލްގެ ފުރަތަމަ ލަނޑު 42 ވަނަ މިނެޓުގައި ޖޯޑަން ހެންޑަސަން ތަނަވަސްކޮށްދިން ފުރުސަތަކުން ޖެހީ މިޞްރުގެ ފޯވާޑް މުޙައްމަދު ޞަލާޙުއެވެ. ލިވަޕޫލްގެ އަނެއް ދެ ލަނޑު ފެނުނީ މެޗުގެ ދެ ވަނަ ހާފުގައެވެ. ދެ ވަނަ ހާފު ފަށައިގެން ހަތަރު ވަނަ މިނެޓުގައި ލިވަޕޫލަށް ލީޑު ފުޅާކޮށްދިނީ ޑާވިން ނޫނޭޒްއެވެ. އޭގެ ތިން މިނެޓު ފަހުން ލިވަޕޫލްގެ ތިން ވަނަ ލަނޑު ޖެހީ ހާވީ އެލިއަޓްއެވެ.

މި ގްރޫޕްގައި ނަޕޯލީން ވަނީ 0-3 އިން ރޭންޖާސް ބަލިކޮށްފައެވެ. މެޗުގައި ނަޕޯލީގެ ސިމިއޯން ދެ ލަނޑު ޖެހި އިރު، ފަހު ލަނޑު ޖެހީ ލިއޯ އޮސްޓިގާޑްއެވެ.

މި ގްރޫޕްގެ އެއް ވަނައިގައި އޮތީ ފަސް މެޗުން 15 ޕޮއިންޓާއެކު ނަޕޯލީއެވެ. ދެ ވަނައިގައި ލިވަޕޫލް އޮތީ 12 ޕޮއިންޓާއެކުއެވެ. ތިން ވަނައިގައި ތިން ޕޮއިންޓާއެކު އަޔެކްސް އޮތް އިރު، ފުލުގައި އޮތް ރޭންޖާސް އަށް ޕޮއިންޓެއް ނުލިބެއެވެ.