"ވީކެންޑް ވިތު އެމްއެންޑީއެފް" ނަމުގައި ޕްރޮގްރާމެއް ކުރިއަށް ގެންގޮސްފި
މިޕްރޮގްރާމް ކުރިއަށް ގެންދިޔައީ އޮގަސްޓް މަހުގެ 13 ވަނަ ދުވަހުގެ ހެނދުނު 6 އިން ހަވީރު 6 އަށް ގިރިފުށީ ޓްރެއިނިންގ ސެންޓަރުގައި
ވީކްއެންޑް ވިޓް އެމްއެންޑީއެފް
ޑިފެންސް މިނިސްޓްރީގެ މުވައްޒަފުންނަށް އަމާޒުކޮށްގެން އެމްއެންޑީއެފުން "ވީކެންޑް ވިތު އެމްއެންޑީއެފް" ނަމުގައި ޕްރޮގްރާމެއް ހިންގައިފި އެވެ.
މިޕްރޮގްރާމްގެ މަގްޞަދަކީ ޑިފެންސް މިނިސްޓްރީގެ މުވައްޒަފުން މަސައްކަތުގެ މާހައުލުން ބޭރުވެލައި މަޖާ މާހައުލެއްގައި ލައިފްސްޓައިލްގެ ބައެއް ސްކިލްސް ދަސްކުރުމާއި، އާއިލާއާއެކު ވަގުތު ހޭދަކޮށްލުންކަމުގައި އެމްއެންޑީއެފުން ބުނެއެވެ.
މި ޕްރޮގްރާމްގައި ޓީމް ބިލްޑިންގ އެކްޓިވިޓީތަކާއި، ލީޑަރޝިޕް އެކްޓިވިޓީތަކުގެ އިތުރުން ކޮމްޕެޓިޓިވް ފިޓްނަސް އެކްޓިވިޓީތަކާއި ސީ ސަވައިލަންސް ފަދަ ބައިތައް ވަނީ ކުރިއަށްގެން ގޮސްފައެވެ. ޑިފެންސް މިނިސްޓްރީގެ 30 މުވައްޒަފުންނާއި އެ މުވައްޒަފުންގެ އާއިލާތަކުގެ 15 މެމްބަރުންނާއެކު، ޖުމްލަ 45 ފަރާތަކުން ބައިވެރިވި މި ޕްރޮގްރާމްގެ، ލެކްޗަރާއިންނަށާއި މުދައްރިބުންގެ ގޮތުގައި ހަރަކާތްތެރިވެފައި ވަނީ އެމްއެންޑީއެފްގެ އެކި ދާއިރާތަކުގައި މަސައްކަތްކުރާ ސިފައިންނެވެ.
އޮގަސްޓް މަހުގެ 13 ވަނަ ދުވަހުގެ ހެނދުނު 6 އިން ހަވީރު 6 އަށް ގިރިފުށީ ޓްރެއިނިންގ ސެންޓަރުގައި ކުރިއަށްގެންދިޔަ މި ޕްރޮގްރާމްގައި ކުރިއަށްދިޔަ ގޮތް ބައްލަވައިލެއްވުމަށް ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދު ދީދީ ގިރިފުށީ ޓްރެއިނިންގ ސެންޓަރަށް ޒިޔާރަތްކުރެއްވިއެވެ.
އެމްއެންޑީއެފުން ވަނީ މީގެ ކުރިން ވެސް ރައްޔިތުން ހިއްސާވާ ބައެއް ކުންފުނިތަކާއި، މިނިވަން މުވައްސަސާތަކާއި، ސަރުކާރުގެ ބައެއް ވުޒާރާތަކަށް އަމާޒުކޮށްގެން "ވީކެންޑް ވިތު އެމްއެންޑީއެފް" ޕްރޮގްރާމް ހިންގާފައެވެ.
