މަސް ހިފަން މޫދަށްފޭބި ތިން މީހުން އެމްއެންޑީއެފް އިން ހޯދައިފި
ގެއްލިގެން ހޯދާފައިވަނީ ބިދޭސީއަކާ ދެ ދިވެހިން
އެމްއެންޑީއެފް ކޯސްޓްގާޑް
މަސްހިފަން މޫދަށް ފޭބި ތިން މީހުން ގެއްލިގެން ހޯދަމުން ދަނިކޮށް އެމްއެންޑީއެފް އިން ހޯދައިފި އެވެ.
މި ތިން މީހުންގެ ޚަބަރެއްނުވެގެން ހޯދުމުގެ މަސައްކަތް އެމްއެންޑީއެފް މާލޭ އޭރިއާ ކޯސްޓްގާޑް ސްކޮޑްރަންއިން ފަށާފައިވަނީ އެމްއެންޑީއެފް މެރިޓައިމް ރެސްކިއު ކޯޑިނޭޝަން ސެންޓަރަށް ހޮނިހިރު ދުވަހުގެ ރޭ 21:50 ހާއިރު ލިބުނު ރިޕޯޓަކާއެކުގައެވެ.
މި ތިން މީހުން ފެނިފައިވަނީ މާލޭ އޭރިއާ ކޯސްޓްގާޑް ސްކޮޑްރަންގެ ހާބާ ކްރާފްޓުން އެމީހުން ހޯދުމުގެ މަސައްކަތްކުރަނިކޮށެވެ.
މި ހާދިސާގައި ގެއްލިގެން ހޯދާފައިވަނީ ޑިންގީއެއްގައި މަސް ހިފުމަށް އެނބޫދޫ ފިނޮޅުކައިރިއަށް ނިކުތް ފަސް މީހުންގެ ތެރެއިން ތިންމީހުންވެ. ޑިންގީގައި ތިބި ފަސް މީހުންގެ ތެރެއިން ދިވެއްސަކާއި ބިދޭސީއަކު ކޯސްޓްގާޑް ހާބާ ކްރާފްޓަށް ނަގާފައިވަނީ ކައިރި ފިނޮޅަކަށް އަރައި ތިއްބައެވެ.
ގެއްލިގެން ހޯދަމުން ދަނިކޮށް ފެނުނީ ދެ ދިވެހިންނާ ބިދޭސީއެއްކަމަށް އެމްއެންޑީއެފް އިން މައުލޫމާތު ދެއެވެ. އެހެންނަމަވެސް މި ތިން މީހުންގެ ހާލު ރަނގަޅުކަމެއް އަދި ސާފެއް ނުވެއެވެ.
