ރޭޕްކުރި މީހާ ހޯދުމަށް އެހީވީ ރޭޕުން އުފަންވި ދަރިފުޅު

ކުޑައިރު ރޭޕާއި ޖިންސީ އަނިޔާގެ ޝިކާރައަކަށްވީ އަންހެނުންގެ ނިސްބަތް ހީކުރާވަރަށްވުރެ މަތިކަން މިވަނީ "ހޭޝްޓެގް މީޓޫ" ފަދަ ކެމްޕެއިންތަކުން އެނގި ހާމަވެފައެވެ. އެކަމާ ކުރިމަތިލާން ޖެހުނު ނަމަވެސް އަމިއްލަ ހިތުގައި އަތް އަޅާފައި އެކަން ސިއްރުކުރަނީ އާއިލާއަށް ލިބިދާނެ ހުތުރު ނަމަކަށްޓަކައެވެ. ނަމަވެސް އެއީ އެކަން ވާންވީގޮތެއްނޫނެވެ. އަނިޔާ ލިބުމުން ކެރިގެން ތެދުވެ އިންސާފު ހޯދުމަށް މަސައްކަތްކުރަންވީއެވެ. އޭރުން މަށަށްވެސް ތިކަން ދިމާވިއޭ ކިޔާފައި ނުކުންނާނެ މީހުން ބައިވަރު ތިބޭނެއެވެ.

މީގެ ތިރީހަކަށް އަހަރު ކުރިން އިންޑިޔާގެ އުއްތަރް ޕްރަދޭޝްގައި އުމުރުން އެންމެ 12 އަހަރުގެ އަންހެން ކުއްޖަކު، އަވަށްޓެރި ގެއެއްގައި އުޅުނު ފިރިހެން ދެބެންވެގެން އެތައް މަހެއްވަންދެން ރޭޕްކުރިއެވެ. އެންމެފަހުން އެކުއްޖާ ބަލިވެއިނދެ ވިހަންޖެހުނެވެ. އުމުރުން އެހާކުޑައިރު ތުއްތު ކުއްޖަކު ނުބެލޭނެތީ، ވިހޭ ދަރިފުޅު އެޑޮޕްޝަންއަށްލިއެވެ. ފިރިހެން ކުއްޖެކެވެ. އެކުއްޖާ ބޮޑުވަމުން އައީ އެކުވެރިންނާއި އަވަށްޓެރިންގެ ފުރައްސާރައާ އެކުގައެވެ. ބައްޕަ ކަށަވަރުނުވާ ކުއްޖަކަށްވާތީއެވެ. އެންމެފަހުން އެދަރިފުޅުގެ އުމުރުން 13 އަހަރުގައި ދަރިފުޅު ގެނެސް މަންމައާ ހަވާލުކުރިއެވެ. ދަރިފުޅާ މަންމަ ބައްދަލުވެ މަންމަގެ ހާލު ދަރިފުޅަށް ފެނުމުން މަންމައަށް އަނިޔާ ދިން މީހުން ހޯދުމަށް ދަރިފުޅު ހިތްވަރުދިނެވެ. އަދި 2020 ވަނަ އަހަރު މަންމަ އެމީހުންނާ ދެކޮޅަށް ކޭސް ފައިލްކޮށް، އެކަން ކާމިޔާބުވެސް ކުރިއެވެ.

އިންސާފުގެ ދޮރުތަކުގައި ޓަކި ޖަހަމުން މަންމަ ހިނގިއިރު ފުލުހުންނާއި ގާނޫނީ ވަކީލުންވެސް ބުނަނީ އެހާ ކުރީގެ މައްސަލައަކަށްވާތީ ނުބެލޭނެކަމަށެވެ. ނަމަވެސް އޭނާ ހިތްވަރު ދޫކޮށްނުލައި އެ ދެމީހުން ހޯދުމަށް މަސައްކަތްކުރިއެވެ. ކޮންމެވެސް ގޮތަކުން ފޯނު ނަމްބަރު ހޯދައިގެން ގުޅުމުން އެކަކު ބުނިކަމަށްވެއެވެ. "ކަލޭ އަދިވެސް މަރެއްނުވޭހެއްޔެވެ؟" އަންހެންމީހާ ޖަވާބުގައި ބުނިކަމަށް ވެއެވެ. "މިއީ ކަލޭމެން މަރުވާންވީ ދުވަހެވެ."

އަންހެންމީހާ ރޭޕްކުރި ދެމީހުންގެ ތެރެއިން އެކަކު މީގެ 10 ދުވަސް ކުރިން ހައްޔަރުކޮށްފައިވާއިރު، ބުދަ ދުވަހު ވަނީ ދެވަނަ މީހާ ހައްޔަރުކޮށްފައެވެ.

އަންހެންމީހާ ކިޔައިދިންގޮތުގައި، ކުޑައިރުންފެށިގެންވެސް އޭނާ ހުރީ ކިޔަވައިގެން މޮޅުވެ ޕޮލިސް އޮފިސަރަކަށް ވުމުގެ ހުވަފެން ދެކިދެކިއެވެ. ނަމަވެސް އޭނާއަށް ޖެހުނީ ކިޔެވުމާވެސް ވަކިވާށެވެ. ހަޔާތް މުޅިން އެފުށްމިފުށަށް ޖެހުނެވެ. އޭނާ ކިޔައިދިންގޮތުގައި އޭނާ ފަހުން މީހަކާވެސް އިނެވެ. ނަމަވެސް އޭނާއަކީ ރޭޕްކުރެވި. އެކަމުގެ ސަބަބުން ދަރިއަކު ލިބިފައިހުރި މީހެއްކަން އެނގުމުން ވަރިކޮށްލީއެވެ. އަނެއްކޮޅުން، ލިބުނު ދޮށީ ދަރިފުޅުގެ ބައްޕަގެ ނަން ޖަހާފައި ނެތުމުން ސްކޫލްގައިވެސް ވަރަށް ފުރައްސާރަކުރިއެވެ. ނަމެއް ނެތް ހަޔާތެއް ވޭތުކުރަން ބޭނުންނޫންކަމަށް ބުނެ ދަރިފުޅު އަމިއްލައަށް މަރުވާން އުޅުނެވެ. އެހާހިސާބުން ދަރިފުޅުގެ ހަގީގަތް މަންމަ ދަރިފުޅަށް ކިޔައިދިނެވެ. ނަމަވެސް ރުޅިއައިސް މާޔޫސްވުމުގެ ބަދަލުގައި ދަރިފުޅު މަންމައަށް ދިނީ ހިތްވަރެވެ. މަންމަގެ ހިތުގައި އަޅާވޭން ފެންނާތީއެވެ. އެންމެފަހުން ދެމައިން ހިތްވަރުކޮށްފައި، އަނިޔާ ދިން މީހުން ހޯދީއެވެ.

އިންސާފުން މައްސަލަ ނިންމުމާއި ނުނިންމުން އޮތީ އަދުލުގެ ނިޒާމުގެ އަތްމަތީގައެވެ.