ކ. މާލެ
|
5 ފެބްރުއަރީ 2023 | އާދީއްތަ 07:11
ސިއްދީގީ (ވ2) އޭނާގެ އާއިލާއާއި ވަކީލާއެކު
ސިއްދީގީ (ވ2) އޭނާގެ އާއިލާއާއި ވަކީލާއެކު
ޓްވިޓަރ
އިންޑިއާ
ރޭޕް ރިޕޯޓް ކުރަން އުޅުމުން ހައްޔަރު ކުރި އިންޑިއާގެ ނޫސްވެރިޔާ ދޫކޮށްލައިފި
 
ސިއްދީގީ ހައްޔަރު ކޮށްފައިވަނީ ޤައުމުގެ މަސްލަހަތު ނަގާލައި އާއްމުންނާއި ސިފައިންނާ މެދު ހަމަނުޖެހުން އުފައްދަން ރޭވުމުގެ ތުހުމަތުގައި

ރޭޕުގެ މައްސަލައެއް ރިޕޯޓު ކުރަން އުޅެނިކޮށް އިންޑިއާއިން ހައްޔަރު ކުރި އެ ޤައުމުގެ ނޫސްވެރިޔާ، ދެ އަހަރު ދުވަހަށްވުރެ ގިނަ ދުވަސް ފަހުން ދޫކޮށްލައިފިއެވެ.

އިންޑިއާގެ އުއްތަރުޕްރަދޭޝްގެ ސިފައިން ނޫސްވެރިޔާ ސިއްދީގީ ކައްޕަން ހައްޔަރު ކުރީ އެ ސަރަހައްދުގެ މަތީ ފަންތީގެ ބަޔަކު ވެގެން ދަށު ފަންތީގެ އަންހެނަކު ރޭޕް ކުރުމުން އެ މައްސަލަ ރިޕޯޓް ކުރުމަށް މަސައްކަތް ކުރުމުންނެވެ. މި ހާދިސާގައި އެ އަންހެން މީހާއަށް ލިބުނު އަނިޔާތަކުގެ ސަބަބުން ވަނީ މަރުވެފައެވެ. މި މައްސަލައިގައި އިންޑިއާގައި ގިނަބަޔަކު ވަނީ މުޒާހަރާ ވެސް ކޮށްފައެވެ.

މި މައްސަލައިގައި ސިއްދީގީ ހައްޔަރު ކޮށްފައިވަނީ ޤައުމުގެ މަސްލަހަތު ނަގާލައި އާއްމުންނާއި ސިފައިންނާ މެދު ހަމަނުޖެހުން އުފައްދަން ރޭވުމުގެ ތުހުމަތުގައެވެ. އޭނާ ހައްޔަރު ކުރީ 2020 ވަނަ އަހަރުގެ އޮކްޓޯބަރު މަހުއެވެ. އޭނާއާއެކު އެވަގުތު ކާރުގައި ތިބި އިތުރު ތިން މީހަކު ވެސް ހަމަ އެ ތުހުމަތުގައި ވަނީ ހައްޔަރު ކޮށްފައެވެ.

ސިއްދީގީ ހައްޔަރު ކުރުމާ ގުޅިގެން އެ ޤައުމުގައި ނޫސްވެރިކަމުގެ މިނިވަންކަމަށް ވަކާލާތު ކުރާ ފަރާތްތަކުން ވަނީ އެކަން ކުށްވެރިކޮށްފައެވެ. އަދި އެއީ ޤައުމުގައި ނޫސްވެރިންނަށް ނުރައްކާތެރިކަން އިތުރުވާ ފަދަ އަމަލެއް ކަމަށް ވަނީ ބުނެފައެވެ. އިންޑިއާ އޮތީ ނޫސްވެރިކަމުގެ މިނިވަންކަމުގެ އިންޑެކްސްގައި ދުނިޔޭގެ 150 ވަނައިގައެވެ.

ސިއްދީގީގެ މައްޗަށް ދެ ދައުވާއެއް އުފުލާފައިވާއިރު ފުރަތަމަ ދައުވާއިން އޭނާ ސަލާމަތްވީ މިދިޔަ އަހަރުގެ ސެޕްޓެމްބަރު މަހުއެވެ. އަދި މިހާރު އޭނާ ވަނީ ކަފާލާތުގެ ދަށުން މިނިވަން ވެފައެވެ.

މިނިވަންވުމަށްފަހު މީޑިއާތަކާ ވާހަކަދައްކަމުން ސިއްދީގީ ބުނީ އޭނާ ކުރިއަށްދާނީ އަދިވެސް ނޫސްވެރިކަމުގެ ދާއިރާއިން ކަމަށެވެ. އަދި އޭނާ ހައްޔަރުކޮށް، އުއްތަރުޕްރަދޭޝްގެ ސިފައިން އޭނާއަށް އަނިޔާ ކުރިކަމަށާއި ހަކުރުބައްޔަށް ބޭސް ނުލިބޭ ގޮތް ވެސް ހެދި ކަމަށް އޭނާގެ އާއިލާއިން ވަނީ ބުނެފައެވެ.

މި ވާހަކަތަކަށް އެ ސަރަހައްދުގެ ސިފައިން ވަނީ ދޮގުކޮށްފައެވެ. އަދި އޭނާއާ ޓެރަރިސްޓް ޖަމާއަތަކާ ގުޅުން އޮންނަ ކަމަށް ވެސް ވަނީ ތުހުމަތު ކޮށްފައެވެ.

އެންމެ ފަހުން އަޕްޑޭޓް ކުރީ: 4 ހަފްތާ ކުރިން
ރިވިއު ކުރީ: މަރްޔަމް ދާނިޝް ނަޝީދު
0%
0%
0%
0%
0%
0%
ކޮމެންޓް