ރޭޕްކުރިކަން ސާބިތުވެ މީހަކު 15 އަހަރަށް ޖަލަށްލާން ހުކުމްކޮށްފިއެވެ.

މި މައްސަލައަކީ ށ.މިލަންދޫ / ބްލޫހައުސް، ޔޫސުފް ޙުސާމް، 2019 އޮކްޓޯބަރު 04 ވަނަ ދުވަހުގެ ރޭގަނޑު 11:00 އެހާކަންހާއިރު، އަންހެނަކު ގެއަކަށް ގެންގޮސް، ރޭޕްކޮށްފައިވާ ކަމަށްބުނެ ކޮށްފައިވާ ދައުވާއެކެވެ.

ޤާނޫނު ނަންބަރު 17/2014 (ޖިންސީ ކުށުގެ ޤާނޫނު) ގެ 14 ވަނަ މާއްދާގެ (ހ) އާއި ޙަވާލާދީ، އެ މާއްދާގެ (ނ) ގެ ދަށުން ދައުލަތުން ދަޢުވާކުރި ރޭޕުކުރުމުގެ ކުށުގެ މި ދަޢުވާއަށް ޔޫސުފް ޙުސާމް އިންކާރުކޮށްފައިވީނަމަވެސް، ދަޢުވާގައި ބަޔާންކޮށްފައިވާ ވާޤިޢާ އެގޮތުގައި ހިނގާފައިވާކަމަށް އިޤުތިނާޢުވެވޭ މިންވަރަށް ދައުލަތުން ހެކި ހުށަހަޅާފައިވާތީ، ޔޫސުފް ޙުސާމްގެ މައްޗަށް ދައުލަތުން ކުޅަ ރޭޕްކުރުމުގެ ކުށުގެ ދަޢުވާ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 51 ވަނަ މާއްދާގެ (އ) ގައި ބަޔާންކުރާ، އެކަށީގެންވާ ޝައްކެއްނެތް މިންވަރަށް ޝަރީޢަތަށް ސާބިތުވާކަމަށް ކަނޑައަޅާފައިވެއެވެ.

ޤާނޫނު ނަންބަރު 17/2014 (ޖިންސީ ކުށުގެ ޤާނޫނު) ގެ 14 ވަނަ މާއްދާގެ (ހ) އާއި ޙަވާލާދީ، އެ މާއްދާގެ (ނ) ގެ ދަށުން، ރޭޕްކުރުމުގެ ކުށުން ށ.މިލަންދޫ / ބްލޫހައުސް، ޔޫސުފް ޙުސާމް ކުށްވެރިވެއްޖެކަމަށް ކަނޑައަޅައި މި ކުށުގެ ޢުޤޫބާތެއްގެ ގޮތުން، ޤާނޫނު ނަންބަރު 17/2014 (ޖިންސީ ކުށުގެ ޤާނޫނު) ގެ 14 ވަނަ މާއްދާގެ (ހ) އާއި ޙަވާލާދީ، އެ މާއްދާގެ (ނ) ގެ ދަށުން، ޔޫސުފް ޙުސާމް 15 (ފަނަރަ) އަހަރު ދުވަހަށް ޖަލަށްލުމަށް ޙުކުމްކޮށްފައިވެއެވެ.

ޖިނާއީ އިޖުރާއަތުގެ ޤާނޫނުގެ 186 ވަނަ މާއްދާއަށް ރިޢާޔަތްކޮށް، ޔޫސުފް ޙުސާމް މި މައްސަލައިގެ ތަޙުޤީޤު މަރުޙަލާއާއި ޝަރީޢަތުގެ މަރުޙަލާގައި ބަންދުގައި ހޭދަކުރި 3 އަހަރާއި 2 މަހާއި 6 ދުވަސް ޔޫސުފް ޙުސާމްގެ މައްޗަށް ކަނޑައެޅުނު ޖަލު އަދަބުން އުނިކުރުމުން، ތަންފީޒުކުރަންޖެހޭ އަދަބަކީ 11 އަހަރާއި 9 މަހާއި 24 ދުވަސް ކަމަށް ކަނޑައަޅައި، އެގޮތުގެމަތިން ޙުކުމްކޮށްފައިވެއެވެ

މި ޤަޟިއްޔާ ބަލައި ނިޔާ ކަނޑައެޅީ ޤާޟީ އާދަމް މުޙައްމަދުއެވެ.