ރައީސުލްޖުމްހޫރިއްޔާގެ ނައިބު، ސަގާފީ މަސައްކަތްތަކާއި ގުޅޭ މައުރަޒު ހުޅުއްވަައިދެއްވައިފި
13 އޯގަސްޓު 2022 | ހޮނިހިރު 11:54މި މައުރަޒަކީ އެއް ދުވަހުގެ މުއްދަތައް ކުޅުދުއްފުށީގައި ކުރިއަށްގެންދާ މައުރަޒެއް
ނައިބު ރައީސް ފައިސަލް ނަސީމް ކުޅުދުއްފުއްޓަށް ވަޑައިގަތުން
ބައިނަލްއަގުވާމީ ޒުވާނުންގެ ދުވަހުގެ ހަރަކާތްތަކުގެ ތެރޭގައި ހިމެނޭ ސަގާފީ މަސަައްކަތްތެރިކަމާގުޅޭ މައުރަޒު "ސަގާފީ މަސައްކަތް ދިރުވުން" ރައީސުލް ޖުމްހޫރިއްޔާގެ ނައިބު ފައިސަލް ނަސީމް ހުޅުއްވައި ދެއްވައިފިއެވެ.
މިމައުރަޒު ކުރިޔަށް ދަނީ ކުޅުދުއްފުށި ސިޓީގެ ޖަލާލުއްދީން ސްކޫލްގައެެވެ. މައުރަޒު ހުޅުއްވައިދެއްވުމަށްފަހު ރައީސުލްޖުމްހޫރިއްޔާގެ ނައިބު ވަނީ މައުރަޒު ބައްލަވާލައްވާފައެވެ.
އެއް ދުވަހުގެ މުއްދަތަށް ކުރިޔަށް ގެންދާ މި މައުރަޒުގައި ވަނީ، ދިވެހިންގެ ސަގާފީ މަސައްކަތްތަކާއި ދިވެހިންގެ އުފެއްދުންތެރިކަމުގެ ބައެއް ތަކެތި ދައްކާލަން ބަހައްޓާފައެވެ. މިގޮތުން ކަނބުރުވެރިކަމާއި ވަޑާމުގެ މަސައްކަތާއި ކަސަބު ވިޔުމާއި ރޯނުވެށުންފަދަ މަސައްކަތްތައް ކުރިޔަށްދާގޮތްވެސް ދައްކާލާފައިވެއެވެ.
މިމައުރަޒުގެ މަގުސަދަކީ، ޒުވާނުންނާއި އުމުރުން ދުވަސްވީ މީހުން ގުޅިގެން މަސައްކަތްކުރުމުގެ ރޫހު އާލާކޮށް، އުމުރުން ދުވަސްވީ މީހުންގެ ފަރާތުން އަގުހުރި ހުނަރާއި އިލްމު ލިބިގަތުމުގެ ފުރުސަތު ޒުވާނުނަށް ހޯދައިދިނުމެވެ.
ޒުވާނުންގެ ދުވަހާ ގުޅިގެން ބާއްވާ މިމައުރަޒު ހުޅުއްވައިދެއްވުމުގެ ކުރިން، ރައީސުލްޖުމްހޫރިއްޔާގެ ނައިބު ވަނީ ކުޅުދުއްފުށީ ރީޖަނަލް ހޮސްޕިޓަލަށް ޒިޔާރަތްކުރައްވާފައެވެ. މިޒިޔާރަތުގައި އެހޮސްޕިޓަލްގެ ޚިދުމަތްތައް ހުރިގޮތް ބައްލަވާލައްވައި ބަލި މީހުންނާ ބައްދަލުކޮށްލެއްވިއެވެ. އަދި ހޮސްޕިޓަލުގެ ތަރައްގީއަށް މިހާރު ކުރެވެމުންދާ މަސައްކަތްތައް ބައްލަވާލައްވައި ހޮސްޕިޓަލުގެ އިސްވެރިންނާއި މުވައްޒަފުންނާއި ބައްދަލުކުރެއްވިއެވެ.
މިބައްދަލު ކުރެއްވުމުގައި ރައީސުލްޖުމްހޫރިއްޔާގެ ނައިބުވަނީ ކުޅުދުއްފުށީ ރީޖަނަލް ހޮސްޕިޓަލުގައި އޮތީ ވަރަށް ރަނގަޅު ޓީމެއްކަން ފާހަގަކުރައްވާފައެވެ. އަދި ކުޅުދުއްފުށީ ރީޖަނަލް ހޮސްޕިޓަލަކީ އެ ސަރަހައްދުގެ އެންމެ މުހިންމު ހޮސްޕިޓަލަށް ވާއިރު، ރަށުން ބޭރުން ހޮސްޕިޓަލަށް ޚިދުމަތްތައް ހޯދަން އަންނަ ފަރާތްތަކަށް ފަސޭހަވާނެގޮތަަށް ޚިދުމަތްތައް ފޯރުކޮށްދެއްވުމަށް އެދިވަޑައިގެންނެވިއެވެ.
