ކ. ތުލުސްދޫގައި ކާބޯތަކެތީގެ ކުނި އަޅާ ޑަސްބިންތަކުގެ ކުނި މޫދަށް އަޅަމުން އަންނަކަމަށް ބުނެ އެންވަޔަރުމެންޓް ޕްރޮޓެކްޝަން އެޖެންސީ (އީޕީއޭ) އިން ކުރި ޖޫރިމަނާ ފައިސާ ނުދައްކާނެ ކަމަށް އެ ރަށު ކައުންސިލް އިން ބުނެފިއެވެ.

އީޕީއޭއިން އެ ރަށުގެ ކައުންސިލް ޖޫރިމަނާ ކުރީ 10 އޮގަސްޓުގައެވެ. އެގޮތުން، އެ ކައުންސިލް 45،000 ރުފިޔާއިން އީޕީއޭއިން ވަނީ ޖޫރިމަނާ ކޮށްފައެވެ.

މިކަމާ ގުޅޭ ގޮތުން ތުލުސްދޫ ކައުންސިލްއިން ނެރުނު ނޫސްބަޔާނުގައި ބުނީ އެ ކައުންސިލުން ހަދައިގެން އަމަލުކުރި ގަވާއިދެއްގެ ދަށުންކަމަށް ބުނެ ޖޫރިމަނާ ކުރި ނަމަވެސް އެފަދަ އެއްވެސް ގަވާއިދެއް އެ ކައުންސިލުން ހަދައި އަދި އަމަލުކޮށްފައި ނޯންނާނެކަމަށެވެ. އެހެންކަމުން، އެ ފައިސާއަކީ ދައްކަން ޖެހޭ އެއްޗެއް ނޫން ކަމަށް ދެކޭ ކަމަށް އެ ރަށު ކައުންސިލް އިން ވަނީ ބުނެފައެވެ.

ތުލުސްދޫ ކައުންސިލް އިން ބުނީ އެންވަޔަރުމެންޓް މިނިސްޓްރީގެ ގަވާއިދުގައި ބުނާގޮތުން، ކުނި މެނޭޖުކުރުމުގެ ގަވާއިދާ ޚިލާފުކަމެއް ހިނގާނަމަ، ޖޫރިމަނާކުރުމުގެ ކުރިން ތަންފީޒީ އިދާރާއަކުން ބަލާ ފާސްކޮށް، ކުނި މެނޭޖުކުރާ ފަރާތަށް ރިޕޯޓެއް ހަދާ ހުށަހަޅަން ޖެހޭނެ ކަމަށެވެ. ނަމަވެސް ޖޫރިމަނާ ކުރިއިރުވެސް އެފަދަ ރިޕޯޓެއް ކައުންސިލަށް ލިބިފައި ނުވާކަމަށް ބުނެފައި ވެއެވެ.

މީގެއިތުރުން 18 ނޮވެމްބަރު 2020ވަނަ އަހަރު ލޯކަލް ގަވަމަންޓް އޮތޯރިޓީ (އެލްޖީއޭ) މެދުވެރިކޮށް އީޕީއޭ އިން ހަމަ އެފަދަ މައްސަލައެއް އެ ކައުންސިލަށް އަންގާފައިވާކަމަށާއި އެ އެންގުމާ ގުޅިގެން ރަށުގައި ބަހައްޓާފައި ހުރި ޑަސްބިންތައް ނެގުމުން ރަށް އިތުރަށް ހަޑިވެ، މެހީގެ އުނދަގޫ ބޮޑުވެ ރަށުތެރޭގައި ބަލިމަޑުމަކެއް އުފެދިދާނެކަމުގެ ބިރުވެރިކަން ބޮޑުވެގެންދިޔަ ކަމަށް ތުލުސްދޫ ކައުންސިލުން ބުނެފައިވެއެވެ. އެހެންކަމުން، މިހާރު ކުނި މެނޭޖް ކުރަނީ އެލްޖީއޭއިން އެ ކައުންސިލަށް އަންގާފައިވާ ގޮތުގެމަތިން ކަމަށް ވެސް ބަޔާނުގައި ވަނީ ބުނެފައެވެ.

މިދިޔަ އަހަރު އެންވައެންވަޔަރުމެންޓް މިނިސްޓްރީއާއި ތުލުސްދޫ ކައުންސިލް އާއިއެކު އެރަށުގައި ވޭސްޓް މެނޭޖްމަންޓު ސެންޓަރެއް ގާއިމްކުރުމަށް އެއްބަސްވުމެއްގައި ސޮއިކުރި ނަމަވެސް މިއަދާ ހަމައަށް ވެސް އެ އެއްބަސްވުމާއި އެއްގޮތަށް އެއްވެސް މަސައްކަތެއް އެރަށުގައި ކޮށްފައިނުވާކަން ވެސް އެ ބަޔާނުގައި ފަހަގަކޮށްފައިވެއެވެ. އަދި ރަށުގެ ގިރާ ސަރަހައްދު ހިމާޔަތްކުރުމަށް ރަށުގެ ކުނިގޮނޑު އެހެން ސަރަހައްދަކަށް ބަދަލުކުރުމަށް ނުވަތަ އެކަމާ ގުޅޭ ޓެކްނިކަލް އެހީތެރިކަން ފޯރުކޮށްދިނުމަށް ވެސް މިނިސްޓްރީގައި ބުނި ކަމަށް ވެސް އެ ބަޔާނުގައި ބުނެފައިވެއެވެ.

އީޕީއޭއިން އަމަލުކުރިގޮތުން ރަށުގެ ނަން ކިލަނބުވެ ލޯކަލް ޓޫރިޒަމް އަށް އެކަމުގެ ނޭދެވޭ އަސަރުކުރާނެކަމަށް ވެސް ތުލުސްދޫ ކައުންސިލްގެ ބަޔާނުގައި ބުނެފައި ވެއެވެ.