ރިސޯޓެއްގެ ގޮތުގައި ހިންގަމުން އަންނަ މ. މަޑިފުށި ގޮނޑުދޮށް ހިމާޔަތް ކުރުމާއި ގޮނޑުދޮށް ހެދުމުގެ މަސައްކަތްތައް ގަވައިދާ ހިލާފަށް ކޮށްފަައިވާތީ އެ ރިސޯޓް ހިންގާ ކުންފުނި ޖޫރިމަނާ ކޮށްފިއެވެ.

އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) އިން ބުނެފައިވާ ގޮތުގައި މަޑިފުށި ރިސޯޓް އޮޕަރޭޓް ކުރާ، މޯލްޑިވްސް އިންފްލައިޓް ކޭޓަރިން ޕްރައިވެޓް ލިމިޓެޑު ޖޫރިމަނާ ކޮށްފައިވަނީ 20،000 ރުފިޔާއިންނެވެ. އެ ކުންފުންޏަކީ ހުޅުލެ އައިލެންޑް ހޮޓެލް (އެޗްއައިއެޗް) ވެސް ހިންގާ ކުންފުންޏެވެ.

އީޕީއޭ އިން ބުނެފައިވާ ގޮތުގައި، ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުން ލިބިދޭ ބާރުގެ ދަށުން މޯލްޑިވްސް އިންފްލައިޓް ކޭޓަރިން ޕްރައިވެޓް ލިމިޓެޑް ޖޫރިމަނާ ކުރީ އީއައިއޭ ފުރިހަމަ ނުކުރުމާއި ތިމާވެށީގެ ކްލިއަރެންސް ނުހޯދައި ކުރި މަސައްކަތްތަކާ ގުޅިގެންނެވެ.

ސަރުކާރު ބަންދު ދުވަސްތައް ހިމަނައިގެން 30 ދުވަހުގެ ތެރޭގައި ޖޫރިމަނާ ފައިސާ ދައްކަން މޯލްޑިވްސް އިންފްލައިޓް ކޭޓަރިންއަށް އަންގާފައިވާ ކަމަށްވެސް އީޕީއޭ އިން ބުނެފައިވެއެވެ.

މަޑިފުށި ޕްރައިވެޓް އައިލެންޑް ރިސޯޓަކީ މި އަހަރު ހުޅުވި ފުރަތަމަ ރިސޯޓެވެ. އެ ރިސޯޓުގައި 80 ބީޗް އަދި އޯވަރ ވޯޓާ ވިލާ ހަދާފައިވެއެވެ.