ފަންނުވެށިން ދަރިވަރުންނަށް ދިރިއުޅުމަށް ބޭނުންވާ ހުނަރާއި ވަޒީފާގެ ފުރުސަތު ތަނަވަސްވާނެ: އެޑިއުކޭޝަން މިނިސްޓަރ
ފަންނުވެށީގެ ދަށުން 4 ޕްރޮގްރާމް އެއް ވަނީ ތައާރަފު ކޮށްފައި
ފަންނުވެށި އިފްތިތާހު ކުރުން
އިންކްލޫސިވް އެޑިއުކޭޝަންގެ ދަށުން ފެށި ފަންނުވެށި ޕްރޮގްރާމް އިން ހާއްސަ އެހީއަށް ބޭނުންވާ ދަރިވަރުންނަށް ދިރިއުޅުމަށް ބޭނުންވާ ތަފާތު ފަންނުތަކާއި ހުނަރުތައް ދަސްވާނެ ކަމަށް އެޑިއުކޭޝަން މިނިސްޓަރ ޑރ. އައިޝަތު އަލީ ވިދާޅުވެއްޖެއެވެ.
ފަންނުވެށި ޕްރޮގްރާމް ތައާރަފު ކުރުމަށް ބުރާސްފަތި ދުވަހުގެރޭ އިމާދުއްދީން ސްކޫލްގައި ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރ ވިދާޅުވީ އެ ޕްރޮގްރާމް ވެގެންދާނީ ޤައުމީ މަންހަޖުގެ ތެރެއިން ކޮންމެ ދަރިވަރަކީ ދިރިއުޅުމަށް ތައްޔާރުވެފައިވާ ދަރިވަރަކަށް ހެދުމަށް ކުރަމުން އަންނަ މަސައްކަތަށް އިތުރު ފުރިހަމަ ކަމެއް ގެނެސްދޭނެ ހަރަކާތެއް ކަމަށެވެ. އަދި ހާއްސަ އެހީއަށް ބޭނުންވާ ދަރިވަރުންގެ މުސްތަގުބަލު އުޖާލާކޮށްދޭނެ އަލިގަދަ ދަންމަރަކަށް ފަންނުވެށި ވެގެންދާނެ ކަމަށް ވެސް ވިދާޅުވިއެވެ.
މިނިސްޓަރ ވިދާޅުވީ ފަންނުވެށިން ހާއްސަ އެހީއަށް ބޭނުންވާ ދަރިވަރުންނަށް ބޭނުންވާ ތައުލީމާއި ތަމްރީން ފޯރުކޮށްދޭއިރު މި ޕްރޮގްރާމް ނިންމާ ދަރިވަރުންނަށް ސްކޫލް ނިންމާއިރު ދިރިއުޅުމަށް ބޭނުންވާ ހުނަރާއި ވަޒީފާގެ ފަހި ފުރުސަތުތައް ތަނަވަސްވެގެންދާނެ ކަމަށެވެ.
މިނިސްޓަރ އިތުރަށް ވިދާޅުވީ ދަރިންގެ ކުރިމަގު ބިނާކޮށް އެ ދަރިފުޅު ކިބައިގައި ހުރި ކުޅަދާނަކަން ފާހަގަކޮށް އެ ކުޅަދާނަކަމާއި ހުނަރުވެރިކަން ނެރެދެނީ ސްކޫލްތަކުގެ މުދައްރިންސުން ކަމަށެވެ. އެހެންކަމުން ފަންނުވެށިން އެފަދަ އެތައް ހުނަރަކާއި ދިރިއުޅުމަށް ބޭނުންވާ އެތައް ފަންނުވެރި މަސައްކަތްތައް ދަރިވަރުންނަށް ދަސްކޮށްދޭނެ ކަމަށް ވިދާޅުވިއެވެ.
މި ޕްރޮގްރާމުގައި ބައިވެރިވާ ދަރިވަރުން މާދަމާ ދިވެހި ފަސްގަނޑުގައި ކާމިޔާބު ފަންނުވެރިންގެ ގޮތުގައި ތަފާތު ދާއިރާތަކުން ފެނިގެންދިއުމަށް އުއްމީދު ކުރައްވާ ކަމަށް ވެސް މިނިސްޓަރ ވިދާޅުވިއެވެ.
ފަންނުވެއްޓަކީ ހާއްސަ އެހީއަށް ބޭނުންވާ ދަރިވަރުން ހިމެނޭހެން ރާއްޖޭގެ ހުރިހާ ދަރިވަރުންނަށް ހުނަރާއި އުފެއްދުންތެރިކަމުގެ ދާއިރާއިން ތައުލީމާއި ތަމްރީނު ދިނުމަށްޓަކައި ގާއިމްކުރާ ހަބް، ސްކޫލްތަކުގެ ތެރެއިން ހުނަރާއި އީޖާދުގެ މަރުކަޒެވެ. ފަންނުވެށީގެ ދަށުން އިފްތިތާހުކުރެވިގެން ދިޔަ 4 ޕްރޮގްރާމް އަކީ، ކެއްކުމުގެ ހުނަރުތައް ދަސްކޮށްދިނުމަށް ގާއިމުކޮށްފައިވާ ކައްކާވަތި، ބިއުޓީ ތެރަޕީގެ ހުނަރުތައް ދަސްކޮށްދިނުމަށް ގާއިމުކޮށްފައިވާ ނަލަވަތި، ޓެކްނޮލޮޖީގެ ހުނަރުތައް ދަސްކޮށްދިނުމަށް ގާއިމުކޮށްފައިވާ ޓެކްވަތި، އަދި ފެހުމުގެ ހުނަރުތައް ދަސްކޮށްދިނުމަށް ގާއިމުކޮށްފައިވާ ފަހާވަތި ޕްރޮގްރާމެވެ. މީގެ އިތުރުުން ވެސް މުސްތަގުބަލުގައި އިތުރު ފަންނުތައް ދަސްކޮށްދިނުމުގެ މަސައްކަތް ފެށުމަށް ވަނީ ހަމަޖެހިފައެވެ.
ފަންނުވެށިން ދަސްވެނި ވާ ދަރިވަރުންނަކީ ދިވެހިރާއްޖޭގެ ކޮލިފިކޭޝަން އޮތޯރިޓީ އިން ގަބޫލުކުރާ ސެޓްފިކެޓް ލެވެލް 3ގެ ސަނަދަކާއެކު ދަސްވެނިވާ ދަރިވަރުންނެވެ. އަދި މި ވެށީގައި އުނގެނޭ ދަރިވަރުންނަށް މި ހުނަރާއި ފަންނު އިތުރަށް ތަރައްގީކުރުމަށްޓަކައި އަމަލީގޮތުން ވެސް މަސައްކަތްކުރާނެ ފުރުސަތު ލިބިގެންދާނެއެވެ.
ދިވެހިރާއްޖޭގެ ތައުލީމީ ނިޒާމަށް ގެނެވުނު މި އިންގިލާބީ ބަދަލުގެ ފުރަތަމަ ފިޔަވަހީގެ މަސައްކަތްތައް ކުރިއަށް ގެންދިއުމަށް ހަމަޖެހިފައިވަނީ އިމާދުއްދީން ސްކޫލުގައެވެ.
