މަދަރުސާއެއްގެ ފެންވަރަކީ އިމާރާތުގެ ފުރިހަމަކަމާއި އުސްކަމަށް ނިސްބަތްވާ ކަމެއް ނޫން ކަމަށް އެޑިއުކޭޝަން މިނިސްޓަރ ޑރ. އައިޝަތު އަލީ ވިދާޅުވެއްޖެއެވެ.

މަޖީދިއްޔާ ސްކޫލްގެ 95 ވަނަ އަހަރީ ދުވަހުގެ މުނާސަބާ ފާހަގަކުރުމުގެ ގޮތުން ދަރުބާރުގޭގައި ބޭއްވި ޚާއްޞަ ޖަލްސާގައި ވާހަކަދައްކަވަމުން މިނިސްޓަރ ވިދާޅުވީ މަދަރުސާގެ ފެންވަރަކީ އެތަނުން ނިކުންނަ ކުދިންގެ ފެންވަރު ކަމަށާއި އަދި އެ ކުދިންގެ އުޅުމުގެ އަބުރުވެރިކަން ކަމަށް ވެސް ވިދާޅުވިއެވެ.

މަދަރުސާއެއްގެ މޮޅުކަން ބިނާވެފައިވަނީ އެ ދަރިވަރުންގެ ފަރާތުން މުޖުތަމައު އަށް ކުރާ އަސަރަށްކަން މިނިސްޓަރ ފާހަގަކުރެއްވިއެވެ.

މިނިސްޓަރ ވިދާޅުވި އެއްގޮތަށްވުރެ ގިނަ ގޮތްގޮތުން މަދީޖިއްޔާގެ ފުރަތަމަ 50ގެ އަހަރުތަކަށްވުރެ ދެވަނަ 50ގެ އަހަރުތަށް މަޖީދިއްޔާ އަށް ވަރަށް ބޮޑު ގޮންޖެހުންތަކެއް ކުރިމަތިވި ކަމަށެވެ. މި ޙާލަތުގައި މާޒީގެ ޝަރަފުވެރި ދުވަސްތައް އަނބުރާ ގެނެވިދާނެތޯ މިނިސްޓަރ ވަނީ ސުވާލު އުފައްދަވާފައެވެ.

އެހެން މަދުރަސާތަކާއި ވާދަކޮށްގެން އެހެން ސްކޫލްތަކުގެ ޙަރަކާތްތައް ނަކަލުކޮށްގެން މަޖީދިއްޔާއަކަށް އުޖަލާމަގެއް ނުކޮށޭނެ ކަމަށާއި މަޖީދިއްޔާގެ ރަންދުވަސްތައް ގެނެވޭނީ މަޖީދިއްޔާއަށް މަޖީދިއްޔާ ހެދިކަންތައްތަކަށް ރުޖޫޢަވެގެން ކަމަށް ވެސް ވިދާޅުވިއެވެ.

މިނިސްޓަރ އިތުރަށް ވިދާޅުވީ މަޖިދީއްޔާ ސްކޫލަކީ ރާއްޖޭގެ ވޭތުވެދިޔަ 95 އަހަރުގެ ތެރޭގައި ކުލަ ގަދަ ޒަމާން ގެނައުމުގައި މުހިންމު ރޯލެއް ކުޅެފައިވާ ތަނެއް ކަމަށެވެ.

މަޖީދިއްޔާއަކީ ރާއްޖޭގެ ތަޢުލީމީ ދާއިރާގެ މުހިއްމު ހިއްސާދާރެއް ކަމަށާއި ސްކޫލެއްގެ ކާމިޔާބީ ފާހަގަވެގެންދަނީ އެ ސްކޫލެއްގެ ދަރިވަރުންގެ ތެރެއިން ޤައުމީ ޚިދުމަތަށް ނުކުންނަ ދަރިވަރުންގެ ނިސްބަތުން ކަމަށް ވެސް ވިދާޅުވިއެވެ. އެގޮތުން ދިވެހި ދައުލަތުގެ އެންމެ ފާހަގަކުރެވޭ މަޤާމުތަކުގައި މަޖީއްދިއްޔާ ސްކޫލަށް ނިސްބަތްވާ ދަރިވަރުން ތިބުމަކީ ސްކޫލްގެ ކާމިޔާބީއެއް ކަމަށް ވެސް ވިދާޅުވިއެވެ.

މަޖީދިއްޔާ ސްކޫލަކީ 1927 ވަނަ އަހަރު އައްސުލްޠާން މުޙައްމަދު ޝަމްސުއްދީން 3 ވަނައިގެ އިސްނެންގެވުމަކަށް މަދަރުސަތުއް ސަނިއްޔާގެ ނަމުގައި އުފެއްދި ސްކޫލެކެވެ. އެސްކޫލްގެ ނަން މަޖީދިއްޔާ ސްކޫލަށް ބަދަލުކުރެވުނީ 1947ގައެވެ.