ދިރިހުއްޓާ ވަޅުލި މީހަކު ސަންދޯއް ފަޅާލާފައި ނުކުމެއްޖެ
އޭނާ ވަޅުލާފައި ވަނީ ބޮލީވިއާގައި ބޭއްވި ފެސްޓިވަލެއްގެ ބައިވެރިން
އަލްވަރޭޒް
ބޮލީވިއާގައި ދިރިހުއްޓާ ވަޅުލި މީހަކު ސަންދޯއް ފަޅާލާފައި ނުކުމެއްޖެއެވެ.
ރިޕޯޓްތައް ބުނާ ގޮތުން އޭނާ ވަޅުލާފައި ވަނީ ބޮލީވިއާގައި ބޭއްވި ފެސްޓިވަލެއްގެ ބައިވެރިންނެވެ. އޭނާ ވަޅުލާފައި ވަނީ ގުދުރަތީ ނިޒާމަށް ކުރާ ގުރުބާނީއެއް ކަމަށް ބުނެއެވެ. އޭނާ ވަޅުލާފައި ވަނީ އެ ފެސްޓިވަލްގައި ގިނަ އަދަދަކަށް ރާ ބުއިމުގެ ސަބަބުން ހޭނެތުނު ވަގުތު ކަމަށް މީޑިއާތަކުގައި ވަނީ ރިޕޯޓުކޮށްފައެވެ. މި ހާދިސާ ހިނގާފައި ވަނީ މަދަރ އާތް ފެސްޓިވަލްގެ ނަމުގައި ކުރިއަށްގެންދިޔަ ފެސްޓިވަލްއެއްގެ ތެރެއިންނެވެ.
ދިރިހުއްޓާ ވަޅުލާފައި ވަނީ ވިކްޓަރ ހޫގޯ މިކާ އަލްވަރޭޒް މިކާ ކިޔާ މީހެކެވެ. އޭނާ ބުނިގޮތުގައި އޭނާ އަށް ހޭލެވުނު އިރު އޭނާ އޮތީ ފެސްޓިވަލްގެ ބައިވެރިންނާއި 50 ވަރަކަށް މޭލުދުރުގައި ސަންދޯކަކަށް ލުމަށް ފަހު ވަޅުލާފައެވެ.
މިފަދަ ފެސްޓިވަލްތަކުގައި ގުދުރަތީ ނިޒާމަށް ކުރާ ގުރުބާނީގެ ނަމުގައި މީހުން ވަޅުލުމަކީ ކޮށް އުޅޭ ކަމެކެވެ. މި ފެސްޓިވަލްގެ ބައިވެރިން ގުރުބާން ކުރާ ތަކެތީގެ ތެރޭގައި ޖަނަވާރުގެ އިތުރުން ގަސްގަހާގެހި އަދި ފޮނި ތަކެތި ހިމެނެއެވެ. އެހެންނަމަވެސް މީހުން ގުރުބާން ކުރުމުގެ އަމަލުތައް ހިންގަނީ ސިއްރުންނެވެ.
މި މައްސަލަ ބެލުމަށް އެ ސަރަހައްދުގެ ފުލުހުން ވެސް ވަނީ ދެކޮޅު ހަދާފައެވެ. ސަބަބަކީ ވަޅުލާފައި އޮއްވާ ސަލާމަތްވި އަލްވަރޭޒް ހުރީ މަސްތުގެ ހާލަތުގައި ކަމަށް ވުމުން އޭނާގެ ވާހަކައަށް ބަރޯސާ ވެވެން ނެތުން ކަމަށް ފުލުހުން ވަނީ ބުނެފައެވެ.
