60 ބައިވެރިންނާއެކު 7 ވަނަ މެރިން އެކްސްޕޯ ފަށައިފި
އެކްސްޕޯ ކުރިއަށް ދާނީ 3 ދުވަހުގެ މުއްދަތަކަށް
މެރިން އެކްސްޕޯގެ ތެރެއިން
60 ބައިވެރިންނާއެކު، 7 ވަނަ މެރައިން އެކްސްޕޯ ފަށައިފިއެވެ.
ބުރާސްފަތި ދުވަހު ހަވީރު ބޭއްވި ރަސްމިއްޔާތެއްގައި އެ އެކްސްޕޯ ހުޅުވައިދެއްވީ ޓުއަރިޒަމް މިނިސްޓަރު ޑރ.އަބްދުﷲ މައުސޫމްއެވެ. މި އެކްސްޕޯއަކީ މޯލްޑިވްސް ނޭޝަނަލް ބޯޓިން އެސޯސިއޭޝަން އޮފް މޯލްޑިވްސްއިން އިންތިޒާމްކޮށްގެން ބާއްވާ އިވެންޓެއް ކަމަށް ވާއިރު، މި އެކްސްޕޯ ކުރިއަށް ދާނީ 3 ދުވަހުގެ މުއްދަތަކަށެވެ. މި އެކްސްޕޯއާ މެދު ވާހަކަދައްކަވަމުން މޯލްޑިވްސް ބޯޑިންގ އެސޯސިއޭޝަންގެ ރައީސް އިސްމާއިލް ހަމީދު ވިދާޅުވީ މިފަދަ އެކްސްޕޯއެއް ބޭއްވުމަށް ދިމާވާ އެންމެ ބޮޑު ގޮންޖެހުމަކީ މިފަދަ އިވެންޓްތައް ބާއްވާނެ ރަނގަޅު ތަނެއް ނެތުން ކަމަށެވެ. އެގޮތުން މޫސުން ގޯސްވުމުގެ ސަބަބަބުން މިފަހަރުގެ އެކްސްޕޯއަށް ވެސް ގޮންޖެހުންތަކާއި ކުރިމަތިލާން ޖެހުނުކަމަށް އޭނާ ވިދާޅުވިއެވެ.
މި އެކްސްޕޯ މިފަހަރު ބާއްވާފައިވަނީ 1 އަހަރު ދުވަހުގެ މެދުކެނޑުމަކަށް ފަހުގައެވެ. އެހެންނަމަވެސް މިދިޔަ އަހަރެކޭ އެއްފަދައިން މިއަހަރުވެސް ކާމިޔާބުކަމާއެކު އެކްސްޕޯ މިވަނީ ފަށާފައެވެ.
މި އެކްސްޕޯއަކީ ދިވެހިރާއްޖެގައި ބާއްވާ އެންމެ ދިގު މުއްދަތެއްވީ އަދި މި ސިނާޢަތުގައި ބާއްވާ އެންމެ ބޮޑު އިވެންޓެވެ. މި އެކްސްޕޯގައި ދިވެހިރާއްޖޭގެ އެންމެ މަޤްބޫލު ބޯޓް ބިލްޑަރުންނާއި، އިންޖީނު ބްރޭންޑްތަކާއި، ބައިނަލްއަޤްވާމީ މެރިން ބްރޭންޑްތަކުގެ އިތުރުން ވޯޓަރ ސްޕޯރޓްސްއާއި ޑައިވް ބްރޭންޑްތައް ބައިވެރިވެއެވެ. އަދި މި އެކްސްޕޯގެ ތެރެއިން އައު ޕްރޮޑަކްޓްތައް ލޯންޗްކުރުމާއި، ޕްރޮޑަކްޓްތަކުގެ މައުލޫމާތު ދިނުންފަދަ ސެޝަންތައް ފޯރުކޮށްދޭ ޕެނަލް ޑިސްކަޝަންތަކުގެ އިތުރުންވެސް އެތައް ހަރާކާތްތަކެއް ކުރިއަށް ގެންދިއުމަށް ވަނީ ހަމަޖެހިފައެވެ. މެރިން އެކްސްޕޯގައި 60 ކުންފުންޏަކުން ބައިވެރިވެއެވެ.
