އުހުދު ޙައްޖު އެންޑް އުމްރާ ގްރޫޕުގެ ފަރާތުން އުމްރާއަށް ދާ ފުރަތަމަ ގްރޫޕް މިމަހުގެ 11 ވަނަ ދުވަހުގެ ރޭ ފުރާނެކަމަށް އެގްރޫޕުން ބުނެފިއެވެ.

އެގްރޫޕުގެ ފަރާތުން އުމްރާއަށް ދާ މީހުންނާއެކު މައުލޫމާތު ދިނުމުގެ ބައްދަލުވުމެއް ވަނީ ބާއްވާފައެވެ. މިބައްދަލުވުމުގައި އުމްރާއަށް ގޮސްއުޅޭއިރު ސަމާލުކަންދޭންވީ ކަންކަމާއި ގުޅޭގޮތުން ވަނީ މައުލޫމާތު ދީފައެވެ. އަދި އުމްރާގެ އަޅުކަން ފުރިހަމަކުރާނެ ގޮތްތަކާއި ގުޅޭގޮތުން މައުލޫމާތު ދީފައިވެއެވެ. މީގެއިތުރުން ދީނީ މައުލޫމާތުވެސް ދީފައިވެއެވެ.

އުހުދު ހައްޖު އެންޑް އުމްރާ ގްރޫޕުގެ ފަރާތުން އުމްރާއަށް ދާ ފުރަތަމަ ގްރޫޕުގައި 38 މީހުން ދާނެކަމަށް އެޖަމާއަތުން ބުނެއެވެ. އެޑްވާންސް ޓީމު މިމަހުގެ 11 ވަނަ ދުވަހުގެ ރޭ ފުރާއިރު ބާކީ ތިބި މީހުން ފުރާނީ މިމަހުގެ 13 ވަނަ ދުވަހުގެ ރޭ ކަމަށް އެޖަމާއަތުން ބުނެއެވެ. އުމްރާގައި ޖުމްލަ 14 ދުވަސް ހޭދަކުރާނެއެވެ.

މީގެއިތުރުން އެޖަމާއަތުގެ އެހީގައި އުމްރާއަށް ދިޔުމަށް ގިނަ ފަރާތްތަކުން އެދެމުންދާތީ މިހާރު ޑިސެމްބަރު މަހު އުމްރާއަށް ދިޔުމަށް ހުޅުވާލާފައިވާކަމަށް އެޖަމާއަތުން ބުނެއެވެ. މިހާތަނަށް އައިއިރު 100ށް ވުރެ ގިނަ މީހުން ޑިސެމްބަރު މަހުގެ އުމްރާގައި ދިޔުމަށް ރަޖިސްޓްރީވެފައިވާކަމަށް އެޖަމާއަތުން ބުނެއެވެ.

ޑިސެމްބަރު މަހުގެ އުމްރާއަށް އުހުދު ޙައްޖު އެންޑް އުމްރާ ގްރޫޕް މެދުވެރިކޮށް ދާ ފަރާތްތަކުން ދައްކަން ޖެހޭނީ 29،950 ރުފިޔާއެވެ. މި ދަތުރު ޑިސެމްބަރު މަހުގެ 20 އާއި 25 އާ ދެމެދުގެ ތާރީހެއްގައި އޮންނާނެ ކަމަށް އެ ގްރޫޕުން މައުލޫމާތު ދެއެވެ.

އުހުދު ޙައްޖު އެންޑް އުމްރާ ގްރޫޕް މެދުވެރިކޮށް ޑިސެމްބަރުގެ އުމްރާއަށް ދާން ބޭނުންވާ ފަރާތްތަކަށް 9633991 ނުވަތަ 9903771 އަށް ގުޅައިގެން ރަޖިސްޓްރީ ކުރެވޭނެއެވެ. އެ ގްރޫޕް މެދުވެރިކޮށް ދާ ފަރާތްތަކަށް ދެކޮޅު ޓިކެޓާއި ހުރުމާއި ކެއުމާއި އުމްރާ ވިސާގެ އިތުރުން ޠާއިފް އަދި ޖިއްދާއަށް ދާން ބޭނުންވާ ފަރާތްތަކަށް އެ ފުރުސަތު ވެސް ލިބިގެންދާނެއެވެ.