200 މީޓަރުގެ ސެމީ ފައިނަލުން އިބާދުﷲ ޖާގަ ހޯދައިފި

އިސްލާމިކް ސޮލިޑާރިޓީ ގޭމްސްގެ 200 މީޓަރުގެ ދުވުމުގެ ސެމީ ފައިނަލުން ރާއްޖޭގެ އިބާދުﷲ އާދަމް ޖާގަ ހޯދައިފިއެވެ.

ބުދަ ދުވަހު ކުރިއަށް ދިޔަ 200 މީޓަރުގެ ދުވުމުގެ ފުރަތަމަ ހީޓުގައި އިބާދުﷲ ވަނީ ވާދަކޮށްފައެވެ. މި ހީޓުގައި ޖުމްލަ އަށް ދުވުންތެރިޔަކު ދުވާ ގޮތަށް އޮތީ ހަމަޖެހިފައެވެ. ނަމަވެސް ތިން ދުވުންތެރިޔަކު ޑިސްކޮލިފައިވުމުން ދުވެފައިވަނީ ފަސް ދުވުންތެރިންނެވެ. ޑިސްކޮލިފައިވެފައިވަނީ މެލޭޝިއާގެ އަރްސިއާދު، އައިވަރީ ކޯސްޓުގެ ޑިޖޭރޯ އަދި އީރާންގެ ތަފްތިއާންއެވެ.

މި ހީޓުގައި ދުވެ އިބާދުﷲ ވަނީ ތިން ވަނައިގައި ރޭސް ނިންމާފައެވެ. އެއީ 21.75 ސިކުންތުން ހީޓު ނިންމައިގެންނެވެ. ސެމީ އިން ޖާގަ ލިބެނީ ކޮންމެ ހީޓަކުން ވެސް ގަދަ ހަތަރެއްގައި ހިމެނޭ ދުވުންތެރިންނަށެވެ.

ބުދަ ދުވަހު ކުރިއަށް ދިޔަ 200 މީޓަރުގެ ދެ ވަނަ ހީޓުގައި ރާއްޖޭގެ އެންމެ ބާރު ދުވުންތެރިޔާ ހަސަން ސާއިދު ވަނީ ދުވެފައެވެ. މި ހީޓުގައި ސާއިދަށް ލިބުނީ ފަސް ވަނައެވެ. އެއީ 21.69 ސިކުންތުން ހީޓު ނިންމައިގެންނެވެ. މި ހީޓުގައި ވާދަކުރި ދުވުންތެރިޔަކު ވަނީ ޑިސްކޮލިފައިކޮށްފައެވެ. އެއީ އޮމާންގެ އަލް ސާދީ އެވެ.