"ނާދިރު ބަޠަލް": ޒެލެންސްކީ އެކްޝަން ފިގަރއަކަށް

ފެބުރުއަރީ 24 ވަނަ ދުވަހުން ފަށައިގެން ވަރުގަދަ ހަނގުރާމައެއްގައި ބެދިފައި ވާ ޔޫކްރައިންގެ ރައީސް ވްލޮޑޮމީރް ޒެލެންސްކީގެ އެކްޝަން ފިގަރއެއް އުފައްދައިފިއެވެ.

ޒެލެންސްކީގެ އެކްޝަން ފިގަރ އުފައްދާފައި ވަނީ ބްރޫކްލިންގެ ޑިޒައިން ކުންފުންޏެއް ކަމަށް ވާ 'ފެކްޓްރީ"އިން ކިކްސްޓާޓަރގައި ކުރިއަށް ގެންދިޔަ ކެމްޕޭނަކުން އެއްކުރި ފައިސާގެ އެހީގައެވެ.

މީގެ 2 ހަފުތާއެއްހާ ދުވަސް ކުރިން، ކެމްޕޭން ލޯންޗްކުރީ 3 ގަޑިއިރުގެ ތެރޭގާއި 30000 ޑޮލަރު ހޯދުމަށެވެ. ނަމަވެސް އެ ކެމްޕޭނަށް 120000 ޑޮލަރު ލިބިފައިވެއެވެ. ވިއްކާލާ ކޮންމެ ފިގަރއެއް ނުވަތަ ބުދަކަށް 1 ޑޮލަރު ހަދިޔާ ކުރަން ނިންމާފައި ވަނީ އޯގަސްޓް 12 ވަނަ ދުވަހު ނިންމާލާ ޔޫކްރައިން ކެމްޕޭނަށެވެ.

ޒެލެންސްކީގެ އެކްޝަން ފިގަރގެ ޕްރޮޓޯޓައިޕް ނުވަތަ ފުރަތަމަ ބުދު އުފައްދާފައި ވަނީ މަށި ބޭނުން ކޮށްގެންނެވެ. 6 އިންޗީގެ އެ އެކްޝަން ފިގަރ ފަރުމާ ކުރީ ސިއޭޓަލްގެ ފަންނުވެރިއެއް ކަމަށް ވާ މައިކް ލިއަވިޓްއެވެ. މި ފަރުމާއަށް ޕްލާސްޓިކުން ތައްޔާރު ކުރާ ބުދުތައް އުފައްދަން ހަމަޖެހިފައި ވަނީ ޗައިނާގައެވެ. އަދި މަރޗް 2023 ހިސާބުގައި ވިއްކަން ފެށޭ ވަރު ވާނެ ކަމަށް މައުލޫމާތު ލިބެއެވެ.

މިހާރު އުމުރުފުޅުން 44 އަހަރުގެ ޒެލެންސްކީ، ޔޫކްރައިންގެ ރައީސްކަން ކަށަވަރު ކުރެއްވީ މީގެ 3 އަހަރު ދުވަސް ކުރިންނެވެ. ރަޝިއާގެ ސަރުކާރުގެ އެއްބާރުލުމާއެކު، ޔޫކްރައިންގެ މައި ސަރުކާރުން ވަކިވެގަތުމަށް، އެ ގައުމުގެ އިރުމަތީގައި ހަރަކާތްތެރިވާ ގުރޫޕުތަކާ ދެމެދު އޮތް ހަނގުރާމަ ނިމުމަކަށް ގެންނަވާނެ ކަމަށް ވެވަޑައިގެންނެވި ވައުދުފުޅުތަކާއެކުގައެވެ.

ދުނިޔޭގެ އެންމެ ނުފޫޒުގަދަ ޤައުމުގެ މަޤާމުގައި އޮތް އެމެރިކާގެ ސިޔާސީ މަސްރަހުގެ ތެރެއަށް ޔޫކްރައިން ވަންނަން މަޖުބޫރުވީ، އެމެރިކާގެ އޭރުގެ ރައީސް ޑޮނާލްޑް ޓްރަމްޕްގެ ފޯނުކޯލަކާ ގުޅިގެންނެވެ. އެއީ އެމެރިކާގެ އަދުގެ ރައީސް ޖޯ ބައިޑަން، ޔޫކްރައިންއާއެކު ވިޔަފާރީގެ އެއްބަސްވުންތަކެއް ހެއްދެވި ކަމަށް ޓްރަމްޕް ފެއްޓެވި ތަޙްޤީޤެއްގެ ތެރެއިން ކުރެއްވި ކޯލެކެވެ.

މީގެ ކުރިން ކޮމީޑިއަންއެއްގެ ގޮތުގައި އެކްޓް ކުރަމުން ގެންދެވި ޒެލެންސްކީ، އާންމުންގެ ތެރޭގައި މަޤުބޫލުވީ "ސަރވަންޓް އޮފް ޕީޕަލް" ޓީވީ ސީރީޒްއިންނެވެ. އެ ސީރީޒްގައި ޒެލެންސްކީ ފެނިގެންދަނީ އިޚުލާސްތެރިކަމާއެކު ސްކޫލެއްގައި ކިޔަވައިދެމުން ދިޔަ ޓީޗަރެއްގެ ރޯލުންނެވެ. ހައްޤުން އެއްކިބާވެފައިވާ މަޖިލީސް މެންބަރުންނާއި ވިޔަފާރިވެރިން ބަލި ކުރައްވާ، ޤައުމުގެ ރައީސްކަން އެ ޓީޗަރު ކަށަވަރު ކުރެއެވެ.

ޙަޤީޤީ ދިރިއުޅުމަށް ބަލާއިރު، ޔޫކްރައިންގެ ރައީސްކަން ޒެލެންސްކީ ކަށަވަރު ކުރެއްވީ އޭޕްރިލް 2019 ގައެވެ. ކޮމިއުނިޒަމްއިން ޑިމޮކްރަސީއަކަށް ބަދަލު ވުމަށް ޔޫކްރައިނުން ކުރަމުންދާ ބުރަ މަސައްކަތަށް އެޅިފައިވާ އެންމެ ބޮޑު ހިޔަނި ކަމަށް ވާ ކޮރަޕްޝަނާ ދެކޮޅަށް މަސައްކަތް ކުރައްވާނެ ކަމަށް ވައުދުވެވަޑައިގެންނެވިއެވެ.