ޔޫކްރެއިންގެ ދެވަނަ ސުލްހައިގެ ސަމިޓްގައި ރަޝިޔާ އިން ބައިވެރިވާން ޖެހޭނެ: ޒެލެންސްކީ

ޔޫކްރެއިން އަށް ދާއިމީ ސުލްހަވެރިކަން ގެނައުމަށް، ޔޫކްރެއިންގެ ދެވަނަ ސުލްހައިގެ ސަމިޓްގައި ރަޝިޔާ އިން ބައިވެރިވާން ޖެހޭނެ ކަމަށް ޔޫކްރެއިންގެ ރައީސް ވުލެޑެމިއަރ ޒެލެންސްކީ ވިދާޅުވެއްޖެއެވެ.

ރަޝިޔާ އިން ޔޫކްރެއިން އަށް އަރާ ފެށި ހަނގުރާމައަށް ދެ އަހަރަށް ވުރެ ގިނަ ދުވަސް ވެފައިވާއިރު، ޔޫކްރެއިން އަށް ސުލްހަ ގެނައުމަށް ދުނިޔޭގެ ވެރިންގެ ފެންވަރުގައި ހުސްވި މަހު ސްވިޓްޒަރލޭންޑްގައި ބޭއްވި ސުލްހައިގެ ސަމިޓަށް ރަޝިޔާ އަށް ދައުވަތު ދީފައެއް ނުވެއެވެ.

އެ ސަމިޓްގައި ބައިވެރިވެ ވަޑައިގެންނެވި ގައުމުތަކުގެ ވެރިން ވަނީ ޔޫކްރެއިންނަށް ސުލްހަ ގެނައުމުގައި ކުރެވޭ މަސައްކަތައް ތާއީދުކުރައްވާކަން ހާމަ ކުރައްވާފައެވެ.

އަނެއްކޮޅުން ސަމިޓްގައި ބައިވެރިވި ބައެއް ގައުމުތަކުން ވަނީ ޔޫކްރެއިންގެ ސުލްހައިގެ ވާހަކަތަކުގައި ރަޝިޔާ ބައިވެރި ކުރަން ޖެހޭނެ ކަމަށް ބުނެފައެވެ.

ދެވަނަ ބޮޑު ހަނގުރާމައިގެ ފަހުން ޔޫރަޕަށް ކުރިމަތިވި އެންމެ ނުރައްކާތެރި މައްސަލަ ކަމުގައި ބެލޭ ރަޝިޔާ-ޔޫކްރެއިން ހަނގުރާމަ އާ ބެހޭ ގޮތުން ސްވިޓްޒަރލޭންޑް ގައި ޖޫން 15 ގައި ބޭއްވި ފުރަތަމަ ސުލްހައިގެ ސަމިޓްގައި ދުނިޔޭގެ 90 ގައުމުން މަތީ ފެންވަރުގެ ވަފުދުތައް ވަނީ ބައިވެރިވެފައެވެ.

ރަޝިއާ އިން ބުނެފައިވަނީ ސުލްހަ ހޯދުމަށް އެ ގައުމު ބައިވެރި ނުކޮށް ކުރާ މަސައްކަތް ވެގެން ދާނީ ތާކުންތާކު ނުޖެހޭ މަސައްކަތެއް ކަމުގައެވެ.