ރަޝިއާގެ ސަރައްދަށް ވަތް ޔޫކްރެއިން ސިފައިން ދަނީ އިތުރަށް ކުރިއަށް ޖެހެމުން ކަމަށް އެ ގައުމުގެ ރައީސް ވޮލޮޑިމިރ ޒެލެންސްކީ ބުދަ ދުވަހު ވިދާޅުވެއްޖެއެވެ.
ބޯޑަރު ހުރަސް ކޮށް ޔޫކްރެއިން ސިފައިން ރަޝިއާގެ ކާސްކަށް އަރާ އެތައް އަވަށްތަކެއް އެމީހުންގެ ބާރުގެ ދަށަށް ގެނައުމަށް ދިން ހަމަލާ ވެގެން ގޮސްފައިވަނީ ދެ ވަނަ ބޮޑު ހަނގުރާމައިގެ ފަހުން ބޭރުގެ ސިފައިން ރަޝިއާ އަށް އަރާ ދީފައިވާ އެންމެ ވަރުގަދަ ހަމަލާގެ ގޮތުގައެވެ.
ޔުކްރެއިންގެ ސިފައިން ރަޝިއާގެ ކާސްކް ސަރަޙައްދަށް ވަނީ އޯގަސްޓް 6 ވަނަ ދުވަހުއެވެ.
އަނެއްކޮޅުން ޔޫކްރެއިނުން ވަނީ އަންގާރަ ދުވަހުގެ ރޭ ރަޝިއާގެ ހަތަރު ވައިގެ ބަނދަރަކަށް ޑްރޯން މެދުވެރިކޮށް ހަމަލާދީފައެވެ. ކީވްގެ ސަލާމަތީ ޚިދުމަތްތަކުގެ މަސްދަރަކުން އޭއެފްޕީއަށް މަޢުލޫމާތު ދިން ގޮތުގައި މިއީ 2022 ގައި މޮސްކޯއިން ޔުކްރެއިނަށް އެރި ފަހުން، ޔޫކްރެއިން އިން ރަޝިއާ އަށް ދިން މިބާވަތުގެ "އެންމެ ބޮޑު ހަމަލާ" އެވެ.
"ކާސްކް ސަރަޙައްދުގައި އެއް ކިލޯމީޓަރުން ދެ ކިލޯމީޓަރުން އެކި ދިމަދިމާލުން އަހަރެމެން މިދަނީ ކުރިއަށް ޖެހެމުން،" ރައީސް ޒެލެންސްކީ ސޯޝަލް މީޑިއާ ގައި ކުރެއްވި ޕޯސްޓެއްގައި ވިދާޅުވިއެވެ.
ޒެލެންސްކީ އިތުރަށް ވިދާޅުވީ މި މުއްދަތުގެ ތެރޭގައި ޔުކްރެއިނުން "100 އަށްވުރެ ގިނަ ރަޝިއާގެ ސިފައިން" ހައްޔަރުކޮށްފައިވާ ކަމަށެވެ.
އިންސްޓިޓިއުޓް ފޯ ދަ ސްޓަޑީ އޮފް ވޯ (އައިއެސްޑަބްލިއު) އިން ދީފައިވާ މަޢުލޫމާތުގެ މައްޗަށް ބިނާކޮށް އޭއެފްޕީގެ ދިރާސާތަކުން ދައްކާގޮތުގައި ހޯމަ ދުވަހާ ހަމައަށް ޔޫކްރެއިނުގެ ސިފައިން ރަޝިއާގެ 800 އަކަ ކިލޯމީޓަރުގެ ބޮޑު ސަރަހައްދަކަށް ވަނީ ވަދެފައެވެ.
ޔޫކްރެއިން އިން އަންގާރަ ދުވަހު ބުނީ ރަޝިއާ އިން ހިފާފައިވާ ބިން ހިސާރުކޮށްގެން ތިބެން ބޭނުން ނުވާ ކަމަށާއި ރަޝިއާ އިން އިންސާފުވެރި ސުލްހައަށް އެއްބަސްވާނަމަ ހަމަލާތައް ވަގުތުން ހުއްޓާލާނެ ކަމުގައެވެ.
