"ޤައުމީ ޓީމް މިހާރު ދެމިއޮތީ މާޒިޔާގެ ސަބަބުން"

ރާއްޖޭގެ ޤައުމީ ޓީމް މިހާރު ދެމިއޮތީ މާޒިޔާގެ ސަބަބުންކަމަށް މިދިޔަ 10 އަހަރު އެޓީމަށް ކުޅުނު މިޑްފީލްޑަރ މުޙައްމަދު އިރުފާން (އިރޭ) ބުނެފިއެވެ.

ޤައުމީ ޓީމަށްވެސް ކުޅެމުން އަންނަ އިރޭ ބުނީ ރާއްޖޭގެ ކްލަބްތަކުން ކުޅުންތެރިންނަށް މުސާރަ ނުދޭތީ ކުޅުންތެރިން ކުޅުމާ ދުރަށް ދާކަމަށެވެ. ނުވަތަ ކުޅުމަށް ދޭންޖެހޭ ސަމާލުކަން ނުދޭކަމަށެވެ. އެކަމަކު އެހާލަތާއެކުވެސް ޤައުމީ ޓީމް ދެމިއޮތީ މާޒިޔާއިން ކުޅުންތެރިންނަށް މުސާރަ ދޭތީކަން އިރޭ ފާހަގަކުރިއެވެ. މިދިޔަ ދިހަ އަހަރު އޭނާ އެޓީމަށް ކުޅުނުއިރު މުސާރައިގެ އެއްވެސް މައްސަލައެއް ދިމާނުވާކަން ފާހަގަކޮށް އިރޭ ބުނީ މާޒިޔާގެ މެނޭޖްމަންޓާ އެހެން ކްލަބެއްގެ މެނޭޖްމަންޓް އަޅާވެސް ނުކިޔޭނެކަމަށެވެ.

އިރޭ ބުނީ އޭނާއާ އެހެން ޓީމްގެ ކުޅުންތެރިންނާ ދިމާވާކަމަށާއި, އެކުޅުންތެރިން އަބަދުމެ ދައްކާ ވާހަކައަކީ މުސާރަ ނުލިބޭ ވާހަކަ ކަމަށެވެ. އެއީ ރާއްޖޭގެ ފުޓްބޯޅަ ކުރިއަރަންވެސް އޮތް ހުރަހެއްކަން އިރޭ ފާހަގަކުރިއެވެ. މާޒިޔާގެ މެނޭޖަރު އިބްރަހީމް ވަހީދު ބުނީ މާޒިޔާއިން ކުޅުންތެރިންނަށް ބަރާބަރަށް މުސާރަ ދިން ނަމަވެސް, އެއަށްފަހު އެހެންކަންކަން ކުރުމަކީ ދަތި ކަމެއްކަމަށެވެ. އެގޮތުން ކްލަބް ޕްރޮމޯޓްކޮށް, ސަޕޯޓަރުންގެ ބައިވެރިވުން އިތުރުކުރުމަށް އެންމެ އެކަށީގެންވާ މިންވަރަށް މަސައްކަތް ނުކުރެވެނީވެސް މާލީ ދަތިތައް ހުރުމުންކަމަށެވެ.

މާޒިޔާއަކީ އެންމެ ފަހުގެ ތިން އަހަރުގެ ލީގު ޗެމްޕިއަން ޓީމެވެ. މިދިޔަ ތިން އަހަރުވެސް ޤައުމީ ޓީމްގެ ކުޅުންތެރިންގެ %90 ހިއްސާކުރަނީ މާޒިޔާއިންނެވެ.