ސެރީނާ ވިލިއަމްސް ކުޅުން ހުއްޓާލާކަން އިއުލާންކޮށްފި

މިހާރު ޓެނިސް ކުޅުމަށްވުރެ މުހިއްމު އެހެންކަންކަން އެބަހުރިކަމަށް ބުނެ, ކުޅުން ހުއްޓާލާކަން އެމެރިކާގެ ސެރީނާ ވިލިއަމްސް އިއުލާންކޮށްފިއެވެ.

23 ފަހަރު ގްރޭންޑް ސްލޭމްސްގެ ސިންގަލްސް ޗެމްޕިއަންކަން ހޯދާފައިވާ ކުޅުންތެރިޔާ ކުޅުން ހުއްޓާލަނީ މިމަހު ފަހުކޮޅު އޮންނަ ޔޫއެސް އޯޕަން ޓެނިސް މުބާރާތަށްފަހުއެވެ. އިންސްޓަގްރާމް އެކައުންޓްގައި އޭނާ ލިޔެފައިވަނީ "ކައުންޓްޑައުން ފެށުނީކަމަށެވެ." ސެރީނާ ވިލިއަމްސް އަނިޔާއަކަށްފަހު ކުޅުމުގެ ތެރެއަށް އައީ ޖޫންމަހުއެވެ. މިމަހު ފަހުކޮޅު އޮންނަ ޔޫއެސް އޯޕަން މުބާރާތުގައި ކުޅޭނެކަމުގެ ޔަޤީންކަންވެސް ސެރީނާ ވިލިއަމްސް ވަނީ ދީފައެވެ. އެކަމަކު އެމުބާރާތް ކާމިޔާބުކުރެވޭނެކަމުގެ ޔަޤީންކަން ނެތްކަމަށްވެސް އޭނާ ވަނީ ބުނެފައެވެ.

ބޮޑަތި މުބާރާތްތަކުގެ ސިންގަލްސް ޗެމްޕިއަންކަން އެންމެ ގިނަ ފަހަރު ހޯދާފައިވާ އަންހެން ކުޅުންތެރިއަކީ ސެރީނާ ވިލިއަމްސްއެވެ. ސެރީނާ ވިލިއަމްސް ކުޅުމާ ދުރަށް ދަނީ ދަރިފުޅަށް ވަގުތު ދިނުމަށާއި, ފިރިމީހާއަށް ވަގުތު ދިނުމަށެވެ. އަދި ވިޔަފާރީގައި ބޮޑަށް ހަރަކާތްތެރިވުމަށެވެ.

ސެރީނާ ވިލިއަމްސްގެ އެންމެ ފުރަތަމަ ބޮޑު މުބާރާތަކީ 1999 ވަނަ އަހަރު އޮތް ޔޫއެސް އޯޕަން ޓެނިސް މުބާރާތެވެ. އެމުބާރާތުގައި ވާދަކުރިއިރު ސެރީނާގެ އުމުރަކީ 17 އަހަރެވެ. މިހާރު އޭނާގެ އުމުރަކީ 40 އަހަރެވެ.