ޕޮލިސް އެކަޑަމީގެ ތަމްރީނުތައް ފަށައިފި
6 އޯގަސްޓު 2022 | ހޮނިހިރު 15:28ކޯސް ފަށާފައި ވަނީ 197 ރެކްރޫޓުންނާއެކު
އައްޑޫ ޕޮލިސް އެކަޑަމީގެ ތަމްްރީނުތައް ފެށުން
އިންޑިއާ ސަރުކާރުގެ ހިލޭ އެހީގައި އައްޑޫ ސިޓީގައި ގާއިމްކުރި ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުންގައި ރަސްމީކޮށް ތަމްރީނުތައް ފަށައިފިއެވެ.
އެތަނުގައި ހޮނިހިރު ދުވަހު ފަށާފައިވަނީ ފުލުހުންގެ 34 ވަނަ ތަމްރީނު ކޯހެވެ. މި ކޯސް ފަށާފައި ވަނީ 197 ރެކްރޫޓުންނާއެކުއެވެ. މިއީ މި އެކަޑަމީ ހުޅުވި ފަހުން ފުރަތަމަ ފަހަރަށް އެތަނުގައި ބާއްވާ ތަމްރީނުތަކެވެ.
ކޯސްތައް ފެށުމާއި ގުޅިގެން ޕޮލިސް ކޮމިޝަނަރ މުހައްމަދު ހަމީދު ވިދާޅުވީ ކޯސްތައް ފަށާފައިވަނީ ކަރިކިއުލަމް މުރާޖައާ ކުރުމަށްފަހު ފުލުހުންގެ ހިދުމަތް ދިނުމުގައި ދިމާވާ ދަތިތަކާ ކުރިމަތިލެވޭނެ ގޮތަށް ކަމަށެވެ.
މިދިޔަ މާޗް މަހު މި ކޮލެޖު ހުޅުއްވައި ދެއްވީ ރައީސް އިބްރާހިމް މުޙައްމަދު ސާލިހު އާއި އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. އެސް ޖައިޝަންކަރު އާއި ދެ ބޭފުޅުންނެވެ. އިންޑިއާ ސަރުކާރުގެ ހިލޭ އެހީގައި އައްޑޫ ސިޓީގައި ގާއިމްކުރި ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުން ރަމްޒު ކޮށްދެނީ ރާއްޖެ އާއި އިންޑިއާއި އާދެމެދު އޮތް ޒަމާންވީ ގާތް ގުޅުން ކަމަށް އިންޑިއާގެ އެކްސްޓާނަލް އެފެއަރޒް މިނިސްޓަރު ޑރ. ސުބްރަމާނިޔަމް ޖައިޝަންކަރް ވަނީ ވިދާޅުވެފައެވެ.
ޖައިޝަންކަރް ވިދާޅުވީ މި ގާއިމްކުރެވުނު އިންސްޓިޓިއުޓް އަކީ މިސަރަހައްދުގައި ފާހަގަކޮށްލެވޭ އިންސްޓިޓިއުޓް އަކަށް ވާނެ ކަމަށެވެ. އަދި މިތަނުގެ ސަބަބުން ކުރިއަށް އޮތްތަނުގައި ވަރުގަދަ ފުލުހުންގެ ފައުޖެއް އުފެދިގެންދާނެ ކަމަށް އުންމީދުކުރައްވާ ކަމަށް ވިދާޅުވިއެވެ.
ޖައިޝަންކަރު ވިދާޅުވީ ރާއްޖޭގެ ތަރައްގީއަށް ގިނަގުނަ އެހީތެރިކަން ފޯރުކޮށް ދެމުންދާ ކަމަށެވެ. އެގޮތުން މަޝްރޫއުތައް ހިންގަމުންދަނީ ރާއްޖެއާއި، ރައްޔިތުންނަށް އެންމެ ފައިދާ ހުރި ގޮތަށް ކަމަށް ޖައިޝަންކަރު ވިދާޅުވިއެވެ. އިންޑިޔާ ސަރުކާރުގެ އެހީގައި އަތޮޅުތެރޭގެ ރަށްރަށުގައި ގާއިމްކުރާ ޕޮލިސް ސްޓޭޝަންތަކަށް އިޝާރަތް ކުރައްވާ ޖައިޝަންކަރު ވިދާޅުވީ މަޝްރޫއަށް ބޭނުންވާ 40 މިލިއަން ޑޮލަރުގެ ފައިނޭންސް އެގްޒިމް ބޭންކުން މިހާރު ދޫކޮށްފައިވާ ކަމަށާއި އެ މަޝްރޫއުގައި އެކި ރަށްތައް ހިމެނޭ ގޮތަށް 61 ޕޮލިސް ސްޓޭޝަނެއް ގާއިމުކުރާނެ ކަމަށެވެ.
