34 ވަނަ ޕޮލިސް އިނީޝިއަލް ޓްރެއިނިންގ ކޯހުގައި ހުރިހާ ގޮތަކުން އެންމެ މޮޅު ދަރިވަރަކަށް ކޮންސްޓަބަލް މުހައްމަދު މިސްދާދް މީޝާގް ހޮވިއްޖެއެވެ.
ހޮނިހިރު ދުވަހުގެ ރޭ ވަނީ ޕޮލިސް އިނީޝިއަލް ޓްރެއިނިންގ ކޯހުގެ ދަސްވެނިވެ، ހިނގާލުމުގެ ރަސްމިއްޔާތު ބާއްވާފައެވެ. މި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހެވެ. ޖުމްލަ 164 ފުލުހުން ވަނީ މި ކޯސް ފުރިހަމަކޮށްފައެވެ.
ހުރިހާ ގޮތަކުން އެންމެ މޮޅު ދަރިވަރު ކޮންސްޓަބަލް މުހައްމަދު މިސްދާދް މީޝާގަށް ކޮމިޝަނަރސް އެކްސަލަންސް އެވޯޑް ވަނީ ލިބިފައެވެ. އެވޯޑް ހަވާލުކޮށްދެއްވީ ކޮމިޝަނަރ އޮފް ޕޮލިސް މުހައްމަދު ހަމީދެވެ.
އެކި ސްކޮޑްތަކުން އެއްވަނަ ހާސިލްކުރި ދަރިވަރުންނަށް ވަނީ ސެޓްފިކެޓާއި އެވޯޑް ދީފައެވެ. އެގޮތުން އައިނައްލަ ސްކޮޑުން އެއްވަނަ ހާސިލްކުރީ ކޮންސްޓަބަލް އައިމިނަތު ޝިރަންއެވެ. ހާޖީ ސްކޮޑުން ކޮންސްޓަބަލް ފާތިމަތު ފައިހާ އެއްވަނަ ހާސިލްކޮށްފައިވާއިރު ރަންވިއްކާ ސްކޮޑުން އެއްވަނަ ހާސިލްކުރީ ކޮންސްޓަބަލް މުހައްމަދު މިސްދާދް މީޝާގެވެ.
އައުޑް ޑޯ މާއްދާތަކުން އެންމެ މޮޅު ދަރިވަރަކަށް ހޮވިފައިވަނީ ކޮންސްޓަބަލް އާސިޔަތު ސުޒީއެވެ. އަދި އިންޑޯ މާއްދާތަކުން އެންމެ މޮޅު ދަރިވަރަކަށް ހޮވިފައިވަނީ ކޮންސްޓަބަލް އާމިނަތު ހަމީޒާ އަހްމަދެވެ.
ހުރިހާ ގޮތަކުން އެންމެ މޮޅު ސްކޮޑަށް ހޮވިފައިވަނީ ރަންވިއްކާ ސްކޮޑެވެ. ރަސްމިއްޔާތުގައި ދަސްވެނިވި ފުލުހުންނަށް ޑިއުޓީ ބެޓަންވެސް ވަނީ ހަވާލުކޮށްދީފައެވެ.
ރައްޔިތުންނަށް ޚިދުމަތް ދިނުމުގައި ފުލުހުންނަށް ލިބިގެންވާ ބާރާއި އިޚްތިޔާރުގެ ބޭނުންކުރުމަށް އިރުޝާދުވެސް ލައިދީފައިވާއިރު، ޕޮލިސް އިނީޝިއަލް ޓްރެއިނިންގ ކޯސް ފުރިހަމަކުރި ފުލުހުން ވަނީ ޝަރަފުގެ ހިނގާލުމެއްވެސް ބާއްވާފައެވެ.
