މަންމަ މަރާލާނެކަމަށް ބުނެ ބިރު ދައްކާފައިވާ މައްސަލައެއްގައި، ދައުވާ ލިބޭ ދަރިފުޅާއި ދެކޮޅަށް މަންމަ ހެކިބަސް ނުދިނުމުން އެ ދަރިފުޅު ދައުވާއިން ސަލާމަތްވެއްޖެއެވެ.

މި މައްސަލައަކީ ގދ. ގައްދޫ އަޅިފަށުއިގެ، މުހައްމަދު ޔަޒީންގެ މައްޗަށް ބިރުދެއްކުމުގެ ކުށުގެ ދައުވާއަކާއި ގުޅިގެން ކްރިމިނަލް ކޯޓުން ކޮށްފައިވާ ހުކުމެކެވެ. ބިރު ދެއްކުމުގެ ކުށުގެ ދައުވާ ކޮށްފައިވަނީ މުހައްމަދު ޔަޒީން 19 އޮކްޓޯބަރ 2018 ވަނަ ދުވަހު އޭނާ ދިރުއުޅުނު ގޭތެރޭގައި ޒުވާބުކޮށް އޭނާގެ މަންމަ ގދ. ގައްދޫ އާޒާދުގެ ސާރިޔާ ހުސައިންދީދީ މަރާލާނަމޭ ބުނެ ބިރުދައްކާފައިވާތީކަމަށް ދައުލަތުން ބުނެއެވެ.

މި މައްސަލައިގައި ޔަޒީން ދައުވާއަށް އިންކާރުކުރުމާއި ގުޅިގެން، ދައުވާ ސާބިތުކުރުމަށް ދައުލަތުން ހުށަހަޅާފައިވަނީ 3 ޝަފަވީ ހެއްކެކެވެ. އޭގެ ތެރޭގައި ޝަރީއަތުގެ މަޖިލީހުގައި ހެކިބަސްދީފައިވަނީ އެންމެ މީހެކެވެ. އަދި އެމީހާގެ ހެކި ބަހުގައި ޔަގީން، ސާރިޔާ މަރާލާނަމޭ ބުނެފައިވާކަން އެނގެން ނެތްކަމަށް ހުކުމުގައި ބުނެފައިވެއެވެ.

އަދި ޝަފަވީ ހެކިންގެ އިތުރުން ދައުލަތުން މައްސަލަ ސާބިތުކުރަން ހުށަހަޅާފައިވަނީ ސާރިޔާ ތަހުގީގަށް ދީފައިވާ ބަޔާނެވެ. އަދި ސާރިޔާ ހެއްކެއްގެ ގޮތުގައި ދައުލަތުން ހުށަހަޅާފައި ނުވާތީއާއި، ދިފާއީ ހެއްކެއްގެ ގޮތުން ސާރިޔާ ޝަރީއަތަށް ހާޒިރުވި ނަމަވެސް، ހެކިބަސްދޭން ބޭނުން ނުވާކަމަށް ބުނެފައިވާތީ، ސާރިޔާ ދީފައިވާ ބަޔާނުގައިވާ ކަންތައްކަށް ބާރުދޭނެ އެހެން ހެތްކެއް ނުވަތަ ގަރީނާއެއް ނެތުމުން، ސާރިޔާ ދީފައިވާ ބަޔާނުގައިވާ ކަންތައްތަކަކީ ހެކި ގަރީނާގެ ގޮތުގައި ޝަރީއަތުން ރިއާޔަތްކުރެވޭނެ ކަންތަކެއް ކަމަށް ނުފެންނަކަމަށް ބުނެފައިވެއެވެ.

އަދި މައްސަލައިގެ ހެކިބަސް ލިބިފައިނުވާ ނަމަވެސް، ހުށަހެޅިފައިވާ ބަޔާންތަކަށް ރިއާޔަތްކޮށްދިނުމަށް ދައުލަތުން އެދިފައިވެއެވެ. ނަމަވެސް ލިބިފައިވާ ހެކިބަހަށް ބަލާއިރު، ބަޔާންތަކުގައިވާ ކަންކަމަށް ބާރުދޭނެ ހެކި ނެތުމުން ހަމައެކަނި ބަޔާންތަކަށް ރިއާޔަތްކޮށް މައްސަލަ ސާބިތުވާކަމަށް ނިންމުމަކީ އިންސާފުވެރިގޮތެއް ނޫންކަމަށް ބުނެފައިވެއެވެ. އަދި ދައުލަތުން ހުށަހެޅި ހެކި ގަރީނާއަށް ބަލާއިރު، ޔަޒީން، ސާރިޔާ މަރާލާނެކަމަށް ބުނެފައިވާކަން ސާބިތުވާ ވަރަށް ހެކި ލިބިފައި ނުވެއެވެ. އެހެންކަމުން ދައުވާކޮށްފައިވާ ކުށުގެ މާއްދީ ރުކުން ސާބިތު ނުވެއެވެ.

ދައުވާއާ މެދު ނިންމާފައިވާ ގޮތަކީ ޔަޒީން، ސާރިޔާ މަރާލާނަމޭ ބުނިކަން ސާބިތުވެފައި ނުވާތީ، ޔަޒީންގެ މައްޗަށް ކޮށްފައިވާ ބިރުދެއްކުމުގެ ކުށުގެ ދައުވާ ގާނޫނުއަސާސީގެ 51 ވަނަ މާއްދާގެ (އ) ގައި ބަޔާންކުރާ އެކަށީގެންވާ ޝައްކެއް ނެތް މިންވަރަށް ސާބިތު ނުވާކަމަށް ކަނޑައަޅާފައިވެއެވެ.

މި މައްސަލައިގެ ހުކުމުގައި ބުނެފައިވަނި ސާރިޔާ މަރާލާނެ ކަމަށް ބުނެ ބިރުދައްކާފައިވާކަން ސާބިތުވެފައި ނުވާތީ، ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫނުގެ 2 ވަނަ މާއްދާގެ (ހ) އާއި ހަވާލާދީ އެ މައްދާގެ (ރ) ގެ ދަށުން ޔަޒީންގެ މައްޗަށް ދައުލަތުން ކުޅަ ބިރުދެއްކުމުގެ ކުށުގެ ދައުވާ ސާބިތުވެފައި ނުވާކަމަށް ހުކުމްކޮށްފައިވެއެވެ.