ޝެއިހް ނިޝާންގެ ބަންދަށް އިތުރު ތިން ދުވަސް ޖަހައިފި
ނިޝަން އަކީ މިކަން ރާވައި ހިންގުމުގައި އިސްކޮށް އުޅުނު އެކަކު ކަމަށް ތުހުމަތު ކުރެވޭ
ޔޯގާ ހަރަކާތުގައި ހަމަނުޖެހުން އުފެއްދިކަމުގެ ތުހުމަތުގައި ހައްޔަރުކުރި ޝެއިހް އާދަމް ނިޝާން
ޔޯގާ ހަރަކާތުގައި ހަމަނުޖެހުން އުފެއްދިކަމުގެ ތުހުމަތުގައި ހައްޔަރުކުރި ޝެއިހް އާދަމް ނިޝާންގެ ބަންދަށް އިތުރު ތިން ދުވަސް ކްރިމިނަލް ކޯޓުން ޖަހައިފިއެވެ.
އާދަމް ނިޝާން ހައްޔަރުކުރީ ޖޫން 22 ވަނަ ދުވަހުއެވެ. އެ ފަހުން ބަންދުގެ މުއްދަތު އިތުރުކުރަމުން ގޮސް ޖުލައި 19 ގައި ބަންދަށް 16 ދުވަސް އިތުރުކޮށްފައިވެއެވެ. އެ މުއްދަތު ބުރާސްފަތި ދުވަހު ހަމަވެފައިވާއިރު ކްރިމިނަލް ކޯޓުން ވަނީ އިތުރު ތިން ދުވަސް އަނެއްކާވެސް ޖަހާފައެވެ.
ޔޯގާ ހަރަކާތުގައި ހަމަނުޖެހުން އުފެއްދިކަމުގެ ތުހުމަތުގައި ހައްޔަރުކުރި ޝެއިހް އާދަމް ނިޝާން ބަންދު ކުރުމަށް ކްރިމިނަލް ކޯޓުން ނިންމީ ރަނގަޅަށް ކަމަށް ހައިކޯޓުން ވަނީ ހުކުމްކޮށްފައެވެ.
މި މައްސަލައަކީ ކްރިމިނަލް ކޯޓުގެ އަމުރު އޭނާގެ ފަރާތުން އިސްތިއުނާފު ކުރުމުން ހައިކޯޓުގައި ކުރިއަށްދާ މައްސަލައެކެވެ. ބުރާސްފަތި ދުވަހު ކުރިއަށްދިޔަ އަޑުއެހުމަކީ މައްސަލައިގެ ޙުކުމް ކުރެއްވުމަށް ބާއްވާ އަޑުއެހުމެވެ.
މި މައްސަލައިގެ ރިޔާސަތު ބަލަހައްޓަވަނީ ފަނޑިޔާރު ހުޒައިފާ މުޙައްމަދުއެވެ. ބެންޗުގައި ދެން ހިމެނިވަޑައިގަންނަވަނީ ފަނޑިޔާރު ހާތިފް ހިލްމީއާއި، ފަނޑިޔާރު ހުސައިން ޝަހީދެވެ.
ފަނޑިޔާރު ހުޒައިފާ މުޙައްމަދު ޙުކުމް އިއްވަވަމުން ވިދާޅުވީ، ބަންދާމެދު ގޮތެއް ނިންމުމަށް ހުށައެޅި ފޯމުގައި އޭނާއަކީ އެކަން ރާވައި ހިންގުމުގައި އިސްކޮށް އުޅުނު އެކަކުކަމަށް ބަޔާން ކޮށްފައިވާ ކަމަށެވެ.
އެއީ މުޖުތަމައުގެ އަމާންކަމަށް ގެއްލުންވާ ކަންކަން ކަމަށް ބަޔާންކޮށް އޭނާއަކީ ބަންދުގައި ބަހައްޓަން ޖެހޭ މީހެއްކަމަށް ޤަބޫލު ކުރެވޭކަމަށް ތަހުގީގު ކުރި ފަރާތުން ބުނެފައިވާކަން ފަނޑިޔާރު ފާހަގަ ކުރެއްވިއެވެ.
ވުމާއެކު، އޭނާ ކަސްޓޯޑިއަލް ޖަލެއްގައި ބަންދު ކުރުމަށް ކްރިމިނަލް ކޯޓުން އޭރު ނިންމިއެވެ. ބަންދާއި ގުޅިގެން ދެ ފޯމެއް ހިމެނުނު ނަމަވެސް ޤާނޫނީ އިންޒާރުން ބޭރުން އައު ތުހުމަތެއް އުފައްދާފައިވާކަމަށް ބެލެވެން ނެތްކަމަށް ފަނޑިޔާރު ވިދާޅުވިއެވެ.
އެ އަމުރު ނެރެފައިވަނީ ޓެރަރިޒަމް މަނާ ކުރުމުގެ ޤާނޫނާ ޚިލާފަށްކަމަށް ބެލެވެން ނެތްކަމަށްވެސް ފަނޑިޔާރު ވިދާޅުވިއެވެ. އޭގެ އިތުރުން، މި މައްސަލައިގައި ހުށައެޅިފައިވާ އިންޓެލް ރިޕޯޓުގައި ފުރިހަމަވާން ޖެހޭ ކަންކަން ފުރިހަމަވާކަމަށްވެސް ފަނޑިޔާރު ވިދާޅުވިއެވެ.
އިންޓެލް ރިޕޯޓުގެ އިތުރުން، ވީޑިއޯއާއި ފުލުހުންގެ ބަޔާންވެސް އޭނާއާ ދެކޮޅަށް ހުށައެޅިފައިވެއެވެ. މި ހެކިތަކަށް ބަލާއިރު، އޭނާ ގަލޮޅު ދަނޑު ބޭރު ސަރަޙައްދުގައި ޙަރަކާތްތެރިވިކަމާއި، އެމީހުންނާ މުއާމަލާތުކޮށް ހެދިކަން އެނގޭކަމަށް ކޯޓު އަމުރުގައިވެސް ފާހަގަކޮށްފައިވެއެވެ.
އެ ސަބަބުތަކަށް ރިއާޔަތް ކުރައްވައި ފަނޑިޔާރު ވިދާޅުވީ، ކްރިމިނަލް ކޯޓުގެ އަމުރު ނެރެފައިވަނީ ޤާނޫނީ އުސޫލުތަކުން ބޭރުންކަމަށް ނިންމެވެން ނެތް ކަމަށެވެ. އެ އަމުރަށް ބަދަލެއް ގެންނަންޖެހޭ ތަނެއް ނެތްކަމަށް 3 ފަނޑިޔާރުންވެސް އިއްތިފާޤުވެލައްވައެވެ.
ބައިނަލްއަގުވާމީ ޔޯގާ ދުވަހުގެ ހެނދުނު ގަލޮޅު ދަނޑުގައި ކުރިއަށްދިޔަ ޔޯގާ ހަރަކާތް ހުއްޓުވުމަށް އެތަނަށް ވަދެ ބަޔަކު ވަނީ އެތަނުގައި ހުރި ތަކެއްޗާއި ހަރަކާތުގައި ތިބި މީހުންނަށް ހަމަލާ ދީފައެވެ. މި ހަމަނުޖެހުންތަކާ ގުޅިގެން ފުލުހުން ވަނީ ބައެއް މީހުން ހައްޔަރުކޮށްފައެވެ.
މި މައްސަލަ ސީރިއަސް މައްސަލައެއްގެ ގޮތުގައި ދިވެހި ފުލުހުންގެ ހިދުމަތުގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުން ދަނީ ތަހުގީގު ކުރަމުންނެވެ. އެ އަމަލު ހިންގުމުގައި ބައިވެރިވި މީހުންގެ މައްސަލަ ތަހުޤީޤުކޮށް، ޤާނޫނީ ފިޔަވަޅު އެޅުމަށް ކުރަންޖެހޭ މަސއްކަތްތައް ދިވެހި ފުލުހުންގެ ޚިދުމަތުން ކުރަމުންދާކަމަށް އެއިދާރާއިން ވަނީ ބުނެފައެވެ.
މި ޙަރަކާތުގެ ތެރެއިން ހަމަނުޖެހުން އުފެއްދި ފަރާތްތަކާމެދު ހަރުކަށި ފިޔަވަޅު އެޅުމުގެ އިތުރުން، ފުލުހުންގެ އޮޕަރޭޝަންތައް މިހާރަށްވުރެ ރަނގަޅު ކުރުމަށްވެސް މަސައްކަތް ކުރާނެކަން ފުލުހުން ބުނެފައިވެއެވެ.
މި ހަމަނުޖެހުންތަކާ ގުޅިގެން ފުލުހުން ވަނީ މިހާތަނަށް 23 މީހުން ހައްޔަރުކޮށްފައެވެ. ފުލުހުން ބޭއްވި ނޫސްވެރިންގެ ބައްދަލުވުމުގައި ކްރިމިނަލް އިންވެސްޓިގޭޝަން ކޮމާންޑުގެ ހެޑް، އެސިސްޓެންޓް ކޮމިޝަނަރ އޮފް ޕޮލިސް މުހައްމަދު ރިޔާޒު ވިދާޅުވީ، މި މައްސަލައާ ގުޅިގެން މީހުން ހައްޔަރުކުރަނީ ޔޯގާއާ ގުޅިގެން ޚިޔާލުފާޅުކުރުމުން ކަމަށް ބުނެ ޚަބަރު ފަތުރަމުންދާކަމަށާއި، ނަމަވެސް އެއީ ހަގީގަތާ ޚިލާފު ވާހަކަތަކެއް ކަމަށެވެ. އޭނާ ވިދާޅުވީ މީހުން ހައްޔަރުކުރަނީ ޔޯގާ ހަރަކާތް ކުރިއަށްދިޔައިރު ދައުލަތުން ހިމާޔަތްދޭންޖެހޭ ބަޔަކު ތިބި ތަނަކަށްވަދެ ހަމަނުޖެހުން ހިންގައި ބިރުދެއްކުމާއި އަނިޔާކުރުމާއި މުދަލަށް ގެއްލުންދިނުމުގެ މައްސަލައިގައިކަމަށެވެ.
ޔޯގާ ހަރަކާތް ހުއްޓުވުމަށް ބާރުގެ ބޭނުންކުރުމަށް، އެކަމުގައި އިސްކޮށް އުޅުނު ބައެއް ފަރާތްތަކުން ބާރުއަޅާފައިވާ ކަމަށާއި، ހައްޔަރުކުރި މީހުންގެ ތެރެއިން ބަޔަކު އޭގެތެރޭގައި ހިމެނޭކަމަށްވެސް ރިޔާޒު ވިދާޅުވިއެވެ.
