އަޒްޕިލިކުއޭޓާ އާ އެއްބަސްވުމަކާއެކު ޗެލްސީގައި މަޑުކޮށްފި
5 އޯގަސްޓު 2022 | ހުކުރު 02:372024 ގެ ނިޔަލަށް ކްލަބްގައި ހުންނާނެ
ސެޒާ އަޒްޕިލިކުއޭޓާ އާ އެއްބަސްވުމުގައި ސޮއިކުރުމަށްފަހު: ފޮޓޯ-އަޒްޕިލިކުއޭޓާ ޓްވީޓަރ
ޗެލްސީގެ ކެޕްޓަން ސެޒާ އަޕްޕިލިކުއޭޓާ އާ އެއްބަސްވުމަކާއެކު ކްލަބްގައި މަޑުކޮށްފިއެވެ.
ކްލަބް ދޫކޮށްލަފާނެކަމުގެ އަޑުތައްއެރި ސްޕެއިންގެ ޑިފެންޑަރ ޗެލްސީގައި މަޑުކުރީ ދެ އަހަރުގެ އާ އެއްބަސްވުމަކާއެކުއެވެ. އާ އެއްބަސްވުމުގެ ދަށުން 2024 ގެ ނިޔަލަށް އޭނާ ކްލަބްގައި މަޑުކުރާނެއެވެ. ސްޕެއިންގެ ޑިފެންޑަރ ބާސެލޯނާއަށް ހިނގައިދާނެކަމަށް ބެލެވުނެވެ. މިހާރު 32 އަހަރުގެ ޑިފެންޑަރ 2012 ވަނަ އަހަރު ޗެލްސީއާ ގުޅުނީ ފްރާންސްގެ މާސޭއިންނެވެ. މިދިޔަ އަހަރުތަކުގައި އޭނާ ވަނީ ޗެލްސީއަށް 476 މެޗު ކުޅެ 17 ގޯލް ޖަހައިދީފައެވެ.
އޭނާ ވަނީ ޗެލްސީއާއެކު ހުރިހާ ކާމިޔާބީއެއް ހޯދާފައެވެ. ޕްރިމިއަރ ލީގާއި, އެފްއޭކަޕާއި, ލީގު ކަޕާއި, ޗެމްޕިއަންސްލީގާއި, ޔުއެފާ ސުޕަރ ކަޕާއި, ފީފާ ކްލަބް ވަރލްޑްކަޕްވެސް ޗެލްސީގައި ވަނީ އުފުލާލާފައެވެ.
