މެލޭޝިއާއިން ކުކުޅު އެކްސްޕޯޓްކުރުން މަނާކުރިކުރުން މިމަހު 31 ގައި ނިމުމަކަށް އަންނާނެ ކަމަށް އެގައުމުގެ މިނިސްޓަރ އޮފް އެގްރިކަލްޗަރ އެންޑް ފުޑް އިންޑަސްޓްރީސް ރޮނާލްޑް ކިއާންޑީ ވިދާޅުވެއްޖެއެވެ.
މި ނިންމުން ނިންމަވާފައިވަނީ އެގައުމުގައި ކުކުޅުގެ ސަޕްލައި އަދި އަގުވެސް ރަނގަޅު މިންވަރެއްގައި ހުރުމުންނެވެ. މިނިސްޓަރާ އަމާޒުކުރާ ސުވާލުތަކަށް ޖަވާބުދެއްވުމަށް ބުރާސްފަތި ދުވަހު މަޖިލީހަށް ހާޒިރުވެވަޑައިގެން ވާހަކަފުޅުދައްކަވަމުން ރޮނާލްޑް ވިދާޅުވީ ކުކުޅު އެކްސްޕޯޓްކުރުން މަނާކުރަން ނިންމެވި ނިންމެވުމަކީ ވަގުތީ ނިންމެވުމެއް ކަމަށެވެ.
ކުކުޅުގެ ސަޕްލައި އިތުރުކޮށް އަގު ކޮންޓޯލްކުރުމަށް އެގައުމުގެ ސަރުކާރުން ކުކުޅު އެކްސްޕޯޓްކުރުން މަނާކުރީ ޖޫން 1 އިން ފެށިގެންނެވެ. ބައެއް ވިޔަފާރިވެރިން ވަނީ ވަރަށް ބޮޑު އަގުގައި ކުކުޅު ވިއްކަން ފަށާފައެވެ.
މެލޭޝިއާއިން ކުކުޅު އެކްސްޕޯޓުކުރުން މަނާކުރުމުގެ ކުރިން ސިންގަޕޫރަށް އެތެރެކުރާ 34 އިންސައްތަ ކުކުޅަކީ މެލޭޝިއާއިން އެތެރެކުރާ ކުކުޅެވެ. އެއާއެކު ސިންގަޕޫރުން ވަނީ އިންޑޮނޭޝިއާއާއި، ތައިލެންޑް ހިމެނޭހެން އެހެން ގައުމުތަކުން އެގައުމަށް ކުކުޅު އެތެރެކުރާނެ ކަމަށް ބުނެފައެވެ.
މިއާއެކު މެލޭޝިއާއިން ވަނީ އެގައުމަށް މާކެޓެއް ގެއްލިފައިވާކަމަށް ބުނެފައެވެ.
