ލީގުގައި ޔުނައިޓެޑް ކުޅޭ ފުރަތަމަ މެޗުގެ ފުރަތަމަ 11ން ރޮނާލްޑޯއަށް ޖާގަ އެއް ނެތް؟
3 އޯގަސްޓު 2022 | ބުދަ 17:23ލީގުގައި ޔުނައިޓެޑްގެ ފުރަތަމަ މެޗު އޮންނާނީ މިއަންނަ އާދީއްތަ ދުވަހު
ރޮނާލްޑޯ
ޕްރިމިއަރ ލީގުގައި މެންޗެސްޓަރ ޔުނައިޓެޑް ކުޅޭ ފުރަތަމަ މެޗުގައި އެޓީމުން ނެރޭ ފުރަތަމަ 11 ގައި ކްރިސްޓިއާނޯ ރޮނާލްޑޯ ނުހިމެނުން ގާތްކަމަށް ރިޕޯޓުތައް ބުނެފިއެވެ.
ލީގުގައި ޔުނައިޓެޑްގެ ފުރަތަމަ މެޗު އޮންނާނީ މިއަންނަ އާދީއްތަ ދުވަހުއެވެ. މި މެޗުގައި ޔުނައިޓެޑް ނިކުންނާނީ ބްރިޓަންއާއި ދެކޮޅަށެވެ. ނަމަވެސް މި މެޗުގައި ޓީމުގެ ތަރި ކްރިސްޓިއާނޯ ރޯނާލްޑޯ ފުރަތަމަ 11ން ނުފެނުން ގާތްކަމަށް ރިޕޯޓުތައް ބުނެއެވެ. އޭނާގެ ބަދަލުގައި މާޝިއަލްއާއި މާކަސް ރަޝްފަޑް ފަދަ ކުޅުންތެރިންނަށް ފުރުސަތު ދިނުން ގާތެވެ.
ބޭރުގެ ރިޕޯޓުތައް ބުނާ ގޮތުން ލީގުގެ ފުރަތަމަ މެޗަށް ނިކުންނައިރު، ކޯޗު އެރިކް ޓެން ހާގްގެ ޕްލޭންގައި ރޮނާލްޑޯ ނުހިމެނެއެވެ. ނިމިގެންދިޔަ ޔުނައިޓެޑްގެ ޕްރީ ސީޒަންގެ ބޮޑު ބައެއްގައިވެސް ރޮނާލްޑޯ ބައިވެރި ނުވެއެވެ. ޕްރީ ސީޒަންގައި އޭނާ ޔުނައިޓެޑަށް ކުޅެދިނީ އެންމެ މެޗެކެވެ. އެއީ ރަޔޯ ވައެކާނޯ އާއި ދެކޮޅަށް ޔުނައިޓެޑް ކުޅުނު މެޗެވެ. ނަމަވެސް މި މެޗުގައިވެސް ރޮނާލްޑޯގެ ފަރާތުން މާ އެދެވޭ ކުޅުމެއް ނުފެނެއެވެ. ދެވަނަ ހާފަށް ކޯޗު ވަނީ އޭނާ ބަދަލުވެސް ކޮށްފައެވެ.
ޔުނައިޓެޑްގެ ޕްރީ ސީޒަންގެ ބޮޑު ބައެއްގައި ރޮނާލްޑޯ ބައިވެރި ނުވާއިރު އޭނާ ވަނީ ޓީމު ދޫކޮށްލަން ބޭނުންވާކަން ޔުނައިޓެޑްގެ މެނޭޖުމެންޓަށް އަންގާފައެވެ. އެއީ ކުރިއަށް އޮތް ސީޒަންގެ ޗެމްޕިއަންސް ލީގަށް ޔުނައިޓެޑް ކޮލިފައި ނުވުމުންނެވެ. ނަމަވެސް ރޮނާލްޑޯ ގެންދާނެ ކްލަބެއް މިހާތަނަށް އޭނާގެ އެޖެންޓު ޖޯޖް މެންޑޭސްއަށް ހޯދިފައެއް ނުވެއެވެ.
