ކުޑަހުވަދޫގެ މުޒާހަރާގައި ވަނީ ފަތުރުވެރިން ހައިޖެކްކޮށްފައި: މަންތާ
2 އޯގަސްޓު 2022 | އަންގާރަ 10:20ބަލިމީހުން ސީޕްލޭންގައި ނުއުފުލެނީ ސްޓްރެޗަރ ނޭރުވޭތީ: މަންތާ
ކުޑަހުވަދޫ އެއަރޕޯޓު ކައިރީގައި އާންމުން މުޒާހަރާކުރަނީ
މަންތާ އެއަރގެ ފުލައިޓަކަށް ބަލި މީހަކު އަރުވަން ދެކޮޅުހެދިކަމަށް ބުނެ ދައްކަނީ އެއްވެސް ހަގީގަތެއް ނެތް ދޮގު ވާހަކަތަކެއް ކަމަށާއި، އެ މައްސަލައިގައި މުޒާހަރާކުރަމުންދާ މީހުން ވަނީ މަންތާގެ ފްލައިޓްގައި ދަތުރުކުރި ފަތުރުވެރިން ހައިޖެކްކޮށްފައިކަމަށް، އެ އެއަރލައިންގެ ސީއީއޯ މުހައްމަދު ޚަލީލް ވިދާޅުވެއްޖެއެވެ.
ދ. ކުޑަހުވަދޫގައި ބަލިމީހަކު އުފުލަން މަންތާއިން ދެކޮޅުހެދިކަމަށް ބުނެ އެ ރަށު ރައްޔިތުން އެއަރޕޯޓު ސަރަހައްދުގައި މުޒާހަރާކުރަން ފެށީ ހޯމަ ދުވަހުގެ ރޭގެ ވަގުތެއްގައެވެ. އެކަމާގުޅިގެން މިއަދު ބޭއްވި ނޫސްވެރިންގެ ބައްދަލުވުމެއްގައި ޚަލީލް ވިދާޅުވީ، ކުޑަހުވަދޫގައި ކުރިއަށްދާ މުޒާހަރާއާ ގުޅިގެން މަންތާ އެއަރގެ އޮޕަރޭޝަންތަކަށް ބުރުއަރާފައިވާކަމަށެވެ.
މުޒާހަރާގެ ބައިވެރިން މަގު ބަންދުކޮށް، ފަތުރުވެރިން ނުކުތުމަށް ހުރަސްއެޅުމުގެ ސަބަބުން 5 ވަރަކަށް ގަޑިއިރު އެއަރޕޯޓުގައި ތާށިވެފައި ފަތުރުވެރިން ތިބިކަމަށް އޭނާ ވަނީ ވިދާޅުވެފައެވެ. އެއަރޕޯޓު ސަރަހައްދުގައި މުޒާހަރާކުރުމުގެ ސަބަބުން ރިސޯޓަށް ނުދެވިފައި ތިބީ 12 ފަތުރުވެރިން ކަމަށާއި، އޭގެ ތެރޭގައި ކުޑަ 4 ކުދިން ތިބިކަމަށް އޭނާ ވިދާޅުވިއެވެ.
މިއީ ކުރިއަށް އޮތްތަނުގައި ފަތުރުވެރިކަމުގެ ސިނާއަތަށް ވެސް އެކަމުގެ ނޭދެވޭ އަސަރު ކުރާނެ ކަމެއްކަން އޭނާ ވަނީ ފާހަގަކުރައްވާފައެވެ. އެގޮތުން ރާއްޖެއަކީ ފަތުރުވެރިންނަށް ރައްކާތެރި އަމާންތަނެއްގެ ގޮތުގައި ސިފަކުރާއިރު، މިފަދަ މަންޒަރެއް ފެނުމަކީ ރާއްޖެއާމެދު ފަތުރުވެރިންނާއި އިންވެސްޓަރުންގެ އިތުބާރު ގެއްލުމަށް މެދުވެރިވާނެ ކަމެއް ކަމަށްވެސް ޚަލީލް ވަނީ ވިދާޅުވެފައެވެ.
އެ ނޫސްވެރިންގެ ބައްދަލުވުމުގައި ވާހަކަދައްކަވަމުން މަންތާ އެއަރގެ ކޮމާޝަލް މެނޭޖަރ އިބްރާހީމް ޝިފާން ވަނީ, މިހާތަނަށް އައިއިރުވެސް ރަސްމީ ސިފައެއްގައި، އަދި އެނޫންވެސް ގޮތަކަށް ބަލި މީހަކު އުފުލަން މަންތާގައި އެދިފައިނުވާކަމަށް ވިދާޅުވެފައެވެ. މަންތާ އެއަރއިން ވަނީ މަންތާ އެއަރއިން ބޭނުންކުރާ ސީޕްލޭންތަކަކީ، ބަލި މީހުން އަރުވަން ބޭނުންކުރާ ސްޓްރެޗަރ އެރުވޭ ގޮތަށް ފަރުމާކޮށްފައި ހުންނަ ބޯޓުތަކެއް ނޫންކަން ފާހަގަކޮށްފައެވެ. އަދި އެއީ ވައިގެ ދަތުރުފަތުރުގެ ގާނޫނުތަކާ އެއްގޮތަށް ބެލި ނަމަވެސް ނުކުރެވޭނެ ކަމެއްކަމަށް އެ އެއަރލައިނުން ފާހަގަކުރެއެވެ.
މި މައްސަލައާ ގުޅިގެން ހޯމް މިނިސްޓްރީއާއި ޓުއަރިޒަމް މިނިސްޓްރީގެ އިތުރުން ސަލާމަތީ ޚިދުމަތްތަކާ ވާހަކަދެކެވިފައިވާކަމަށާއި، އެ ފަރާތްތަކުގެ އެހީތެރިކަން ލިބޭކަމަށް މަންޓާ އެއަރއިން ބުނެއެވެ. މި މައްސަލައިގައި މިއަދު ވެސް ކުޑަހުވަދޫގައި ވަނީ މުޒާހަރާކޮށްފައެވެ.
